وزیر خارجہ اسحاق ڈار 25 توں 26 اگست 2025 کوں سعودی عرب دا دورہ کریسن

اسلام آباد۔24اگست (اے پی پی) نائب وزیراعظم / وزیر خارجہ اسحاق ڈار 25 توں 26 اگست 2025 کوں سعودی عرب دا دورہ کریسن۔ اسحاق ڈار جدہ اچ اسلامی تعاون تنظیم (او آئی سی) وزرائے خارجہ کونسل دے غیر معمولی اجلاس اچ شریک تھیسن۔ نائب وزیراعظم ڈھاکہ دے دورے دے بعد سدھے جدہ روانہ تھیسن۔ دفتر خارجہ توں جاری بیان موجب جدہ اچ تھیوݨ آلے او آئی سی اجلاس اچ فلسطین دی موجودہ صورتحال دے تناظر اچ سانجھی حکمت عملی تے غور تھیسی۔ اسرائیلی جارحیت اتے غزہ تے فوجی کنٹرول دے منصوبے تے وی اجلاس اچ ڳالھ مہاڑ کیتی ویسی۔ او آئی سی وزرائے خارجہ فلسطینی عوام دے حقوق دیاں سنگین خلاف ورزیاں تے غور کریسن۔ پاکستان ہمیشہ عالمی فورمز تے فلسطینی عوام دی حمایت کریندا رہیے۔ اسحاق ڈار اجلاس اچ فلسطین دی غیر متزلزل حمایت دا اعادہ کریسن۔ وزیرخارجہ اسرائیل دے قبضے آلے سارے علاقیں بشمول یروشلم توں انخلا دا مطالبہ کریسن۔ بیان اچ آکھیا ڳئے جو پاکستان ولوں غزہ تے اسرائیلی فوجی کنٹرول دے منصوبے کوں رد کیتا ویسی، پاکستان فلسطینی عوام کیتے فوری انسانی امداد دی لوڑھ تے زور ݙیسی۔ اسحاق ڈار اجلاس اچ فلسطینی ریاست دے قیام دے مطالبے کوں دوہریسن۔ ایں موقع تے اسحاق ڈار دیاں اہم رکن ملکاں دے وزرائے خارجہ نال ݙو طرفہ ملاقاتاں وی متوقع ہن۔