پاکستان کوں عالمی ورچوئل ایسیٹس معیشت اچ قائدانہ مقام ݙیواݨ کیتط پاکستان ورچوئل ایسیٹس ریگولیٹری اتھارٹی دا کردار اہم اے، وفاقی وزیر خزانہ محمد اورنگزیب اجلاس نال خطاب

اسلام آباد۔26اگست(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو پاکستان کوں عالمی ورچوئل ایسیٹس معیشت اچ قائدانہ مقام ݙیواݨ کیتے پاکستان ورچوئل ایسیٹس ریگولیٹری اتھارٹی دا کردار وݙا اہم اے۔ او اسلام آباد اچ پاکستان ورچوئل ایسیٹس ریگولیٹری اتھارٹی (پی وی اے آر اے) بورڈ دے پہلے اجلاس نال الیندے پئے ہن۔ اجلاس اچ وزیر مملکت برائے کرپٹو و بلاک چین و چیئرمین پی وی اے آر اے بلال بن ثاقب، گورنر سٹیٹ بینک آف پاکستان، وزارتِ آئی ٹی اَتے وزارتِ قانون و انصاف دے وفاقی سیکرٹریز، فیڈرل بورڈ آف ریونیو دے چیئرمین، سکیورٹیز اینڈ ایکسچینج کمیشن آف پاکستان دے چیئرمین اَتے ٻئے اہم شراکت داراں سودھا نیشنل سائبر کرائم انویسٹی گیشن ایجنسی دے نمائندے وی موجود ہن۔ وفاقی وزیر خزانہ پی وی اے آر اے دے قیام کوں پاکستان دی معاشی ارتقا اچ ہک انقلابی سنگِ میل قرار ݙتا اتے آکھیا جو پاکستان کوں عالمی ورچوئل ایسیٹس معیشت اچ قائدانہ مقام ݙیواݨ اچ مددگار تھیسی۔ وزیر خزانہ پاکستان کرپٹو کونسل دے بنیادی کردار اَتے اسٹیک ہولڈرز، اداریاں اَتے ماہرین نال وسیع مشاورت تے شکریہ ادا کیتا جیندی وجہ نال پی وی اے آر اے دے قیام اچ مدد ملی۔ اجلاس اچ اہم ترجیحات ڄیویں پی وی اے آر اے کوں عالمی اینٹی منی لانڈرنگ اَتے دہشت گردی دی مالی معاونت روکݨ دے معیارات نال ہم آہنگ بݨاوݨ، ورچوئل ایسیٹس اچ مہارت رکھݨ آلے آزاد ڈائریکٹرز دی منظوری کیتے سفارشاں ݙیوݨ، اتے اتھارٹی دے بنیادی فریم ورک دی تشکیل شامل اے۔ ایں سانڳے پیش رفت کیتے بورڈ خصوصی کمیٹیاں دے قیام دا فیصلہ کیتا جو سینڈ باکس ایکسپیریمنٹیشن، ٹیکسیشن پالیسیز، ریگولیٹری ڈرافٹنگ اَتے بین الاقوامی روابط تے توجہ مرکوز رکھسن، ہک مجوزہ لائسنسنگ فریم ورک دا مسودہ وی اراکین نال مشاورت کیتے پیش کیتا ڳیا جیکوں آندے ݙینھاں اچ حتمی شکل ݙتی ویسی۔ اجلاس اچ شکایات کیتے ہک پورٹل دے قیام دی وی منظوری ݙتی ڳئی جیکوں نیشنل سائبر کرائم انویسٹی گیشن ایجنسی دے تعاون نال تیار کیتا ویسی تاں جو ورچوئل ایسیٹس دے مسئلیاں کوں حل کیتا ونڄ سگے اَتے ویلھے تے ریلیف ݙتا ونڄے۔ بورڈ اسٹیٹ بینک آف پاکستان دے بی پی آر ڈی سرکلر نمبر 03 آف 2018 دے خاتمے تے وی غور کیتا، جیںدے تحت مالیاتی اداریاں کوں ورچوئل کرنسیز اَتے ٹوکنز توں لین دین توں روک ݙتا ڳیا ہا۔