پاکستان دی ریٹنگ اچ بہتری نال ملکی معیشت دے استحکام کیتے حکومتی اقدامات تے ٻاہرلے اعتماد دی عکاسی تھیندی پئی اے، وفاقی وزیر خزانہ محمد اورنگزیب

اسلام آباد۔27اگست (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو وختی فیصلے اتے انہاں تے شیڈول دے موجب عملدرآمد بہتر مینجمنٹ دیاں خوبیاں ہن، کلیدی ریٹنگ ایجنسیاں ولوں پاکستان دی ریٹنگ اچ بہتری نال ملکی معیشت دے استحکام کیتے حکومت ولوں چاتے ڳئے اقدامات تے ٻاہرلے اعتماد دی عکاسی تھیندی پئی اے، موسمیاتی تبدیلیاں اتے ودھدی ہوئی آبادی پاکستان کیتے وجودی خطرے ہن، نجی شعبے کوں اڳواݨی اتے حکومت کوں بہتر ماحول دی فراہمی دے حوالے نال کردار ادا کرݨا چاہیدے۔ اے گالھ انہاں اتھاں انسٹیٹیوٹ آف چارٹرڈ اکاونٹنٹس آف پاکستان دے زیر اہتمام پبلک فنانشل مینجمنٹ دے موضوع تے منعقدہ کانفرنس توں خطاب کریندیں آکھی۔ وزیر خزانہ آپݨے کلیدی خطاب اچ آکھیا جو کوئی ادارہ ہووے یا ملک وختی فیصلے اتے انہاں تے شیڈول موجب عملدرآمد بہتر مینجمنٹ دیاں خوبیاں ہن، بہترین نظم و نسق اچ پبلک سرونٹس دا کردار کلیدی اہمیت رکھیندے۔ وزیر خزانہ آکھیے جو ملکی معیشت بہتری آلے پاسے گامزن اے، لمبے عرصے دے بعد ترائے کلیدی ریٹنگ ایجنسیاں فچ، ایس اینڈ پی اتے ہݨ موڈیز پاکستان دی ریٹنگ بہتر کیتی اے، ایں اقدام نال گزریل کجھ سالاں اچ ملک دی ملکی معیشت دے استحکام کیتے حکومت ولوں چاتے ڳئے اقدامات تے ٻاہرلے اعتماد دی عکاسی تھیندی پئی اے۔ وزیر خزانہ آکھیا جو گیلپ سروے سودھے اڄوکے سروے رپورٹاں توں وی واضح تھئے جو معیشت دی بہتری دے حوالے نال اساݙی صحیح پاسے اے۔ وزیر خزانہ آکھیا جو معیشت دے استحکام دے بعد تکھے ترقی و ودھارے کیتے اے ہک بہترین اتے مناسب ویلھا اے، اساں کوں ماضی اچ معیشت دے لہہ چڑھ دے چکر توں ہݨ نکلݨا ہوسی، ایل سیز دے حوالے نال بہتری آئی اے، سرمایہ کاراں کوں انہاں دا منافع ملدا پئے، ترسیلات اچ بہتری آندی پئی اے، انہاں اقدامات نال بہتری دی عکاسی تھیندی پئی اے۔ وزیر خزانہ آکھیا جو و آوݨ آلے ہفتے وزیراعظم دے نال چین دے دورے تے ویندے پئن اتے ایں دورے اچ بین الاقوامی کیپٹل مارکیٹ اچ پاکستان دے ول داخلے دے حوالے نال ڳالھ مہاڑ اتے مذاکرات دا سلسلہ ول شروع تھیسی، پاکستان پانڈا بانڈز دے ذریعے بین الاقوامی کیپٹل مارکیٹ اچ داخلے دا خواہشمند اے، اساں کوں امید اے جو ایں سال دے دوران پانڈا بانڈز دا افتتاح تھیسی ، اساں ݙوجھیاں بین الاقوامی کیپٹل مارکیٹاں توں وی فیدہ حاصل کرݨ دے خواہشمند اوں۔ وزیر خزانہ موسمیاتی تبدیلیاں اتے ودھدی ہوئی آبادی کوں پاکستان کیتے وجودی خطرے قرار ݙیندیں آکھیا جو پاکستان کوں موسمیاتی تبدیلیاں دے منفی اثرات دا سامݨا کرݨا پوندا پئے اتے ایں دے اثرات اساݙے سامݨے ہن۔ ماحولیاتی مناسبت اتے مطابقت کیتے منصوبیاں اچ سارے متعلقہ شراکت داراں اتے نجی شعبے کوں حکومت دا ساتھ ݙیوݨا چاہیدے، موسمیاتی تبدیلیاں دی وجہ نال نہ صرف معیشت بلکہ ٻہوں قیمتی انسانی زندگیاں کوں ضیان پڄدا پئے، اڄوکے مینھ تے چھل توں ہݨ تئیں 800 قیمتی انسانی جاناں ضائع تھئن جنہاں دا کوئی نعم البدل کائںی، ایں تناظر اچ اساں کوں انہاں منصوبیں کوں ترجیح ݙیوݨی ہوسی جیڑھے وسائل دے اندر رہندیں مکمل تھی سڳدن۔ وزیر خزانہ آکھیا جو توانائی، ٹیکس، پبلک فنانس اتے ایس او ایز سودھے اداریں اچ ڈھانچہ جاتی اصلاحات دا عمل جاری اے، ایف بی آر اچ پیپل، پراسیس اتے ٹیکنالوجی دی بنیاد تے اصلاحات تھئی اے، اڄوکے بجٹ اچ تنخواہ دار طبقے کوں ریلیف ݙیوݨ دی کوشش کیتی ڳئی اے، فائلرز کیتے گوشوارے جمع کرݨ دے طریقہ کار کوں سادہ اتے سوکھا بݨایا ڳئے، 75 فیصد توں گھن تے 80 فیصد تئیں دا تنخواہ دار طبقہ ہݨ آپݨے گوشوارہ جات آپوں جمع کر سڳسن، ٹیکس نظام اچ بہتری کیتے پالیسی دے شعبے کوں ایف بی آر توں واپس گھن تے وزارت خزانہ کوں ݙتا ڳئے ایں نال پالیسیاں دے تسلسل کوں یقینی بݨاوݨ اچ مدد ملسی اتے مقامی اتے غیر ملکی سرمایہ کاراں کوں وی فیدہ پُجسی۔ وزیر خزانہ آکھیا جو “سرکاری ملکیت آلے اداریں اچ اصلاحات دا عمل جاری اے، 43 وزارتاں اتے انہاں نال جڑیاں 400 اداریں دا جائزہ ڳھدا ویندا پئے، 24 اداریں کوں نجکاری کمیشن دے حوالے کر ݙتا ڳئے، پی ڈبلیو ڈی اتے یوٹیلیٹی سٹورز کارپوریشن ختم کر ݙتے ڳئن، اے سخت فیصلے ہن مگر ایں نال بدعنوانی کوں ختم کرݨ اتے شفافیت کوں ودھاوݨ اچ مدد ملسی، اساں سمجھدوں جو نجی شعبے کوں اڳواݨی اتے حکومت کوں بہتر ماحول ݙیوݨ دے حوالے نال کردار ادا کرݨا چاہیدے، ایویں نجکاری دا عمل وی بتدریج اڳوں ودھدا پئے، پنشن دے نظام اچ اصلاحات گھن آئیاں ڳئن۔