پاکستان اتے بیلا روس وچال دوستانہ تعلقات ویلھے نال ٻئے تکڑے تھیندے پئن، وزیر اعظم شہباز شریف

اسلام آباد۔27اگست(اے پی پی)وزیر اعظم محمد شہباز شریف ہنرمند پاکستانی افرادی قوت کوں بیلاروس اچ نوکریاں ݙیوݨ کیتے ݙوہیں ملکاں وچال مفاہمتی یادداشت تے دستخطاں دا خیر مقدم کریندے آکھیے جو “پاکستان اتے بیلا روس وچال دوستانہ تعلقات ویلھے نال ٻئے تکرے تھیندے پین۔ وزیر اعظم محمد شہباز شریف نال بیلا روس دے وزیر داخلہ ایون کبرکوف دی اڳواݨی اچ وفد اسلام آباد اچ ملین۔ وزیراعظم بیلاروس دے وزیر داخلہ دا پاکستان آوݨ تے خیر مقدم کریندے آکھیا جو “پاکستان اتے بیلا روس وچال دوستانہ تعلقات ہن، جیڑھے ویلھے دے نال ٻئے تکڑے تھیندے پئن۔ انہاں ایں سال آپݨے دورہ بیلاروس دا ݙسیندے بیلاروس دے صدر الیگزینڈر لوکاشینکو کیتے آپݨیاں نیک خواہشات ݙتن اتے آکھیے جو انہاں دورے اچ پاکستان اتے بیلا روس وچال مختلف شعبیاں اچ تعاون دے کئی معاہدیاں اتے مفاہمتی یادداشتاں تے دستخط کیتن، خوشی اے جو میݙے دورہ بیلاروس اچ پاکستان توں ہنر مند لوکاں کوں بیلا روس اچ مختلف شعبیاں اچ نوکریاں دے موقعے ݙیوݨ کیتے ݙوہیں ملکاں وچال مفاہمتی یادداشت تے دستخط کیتے ڳن۔ وزیراعظم آکھیا جو اساں بیلاروس دے صدر دے پاکستان دے دورے دے تانڳھی ہیں۔ بیلاروس دے وزیر داخلہ وزیراعظم کوں بیلاروس دے صدر ولوں نیک خواہشات پچاعن اتے پاکستان نال زراعت اتے صنعت سودھا مختلف شعبیاں اچ تعاون ودھاوݨ اتے رَل تے کم کرݨ دی خواہش ݙسائی۔ انہاں وفاقی وزیر داخلہ محسن نقوی اتے وفاقی وزیر سمندر پار پاکستانی و انسانی وسائل چوہدری سالک حسین نال آپݨیاں ملاقاتاں دا وی ݙسایا۔ وفاقی وزیر داخلہ محسن نقوی وزیراعظم کوں ݙسایا جو بیلاروس دے وزیر داخلہ وفد نال نیشنل ڈیٹا بیس رجسٹریشن اتھارٹی دا دورہ وی کیتے۔ وفاقی وزیر سمندر پار پاکستانی و ترقی انسانی وسائل چوہدری سالک آکھیا جو ہنر مند پاکستانیاں کوں بیلاروس بھیجݨ دے حوالے نال ݙوہیں ملکاں وچال مفاہمتی یادداشت تے دستخط تھئن جیںدے بعد ہنر مند پاکستانیاں کوں بیلا روس بھیجݨ دا عمل باقاعدہ شروع تھی ویسی۔ بیلا روس پاکستانی ہنر مند افرادی قوت کوں میڈیکل سودھا سماجی تحفظ دیاں ݙوجھیاں سہولتاں وی ݙیسی۔ ملاقات اچ وفاقی وزیر داخلہ محسن نقوی، وفاقی وزیر سمندر پار پاکستانی و ترقی انسانی وسائل چوہدری سالک حسین، وزیر مملکت برائے داخلہ طلال چوہدری، وزیر مملکت برائے سمندر پار پاکستانی و ترقی انسانی وسائل محمد عون چوہدری اتے ٻئے سرکاری افسران وی موجود ہن۔