پاکستان اتے چین وچال مختلف شعبیاں اچ تعاون، سرمایہ کاری کیتے 21 مفاہمت دیاں یادداشتاں تے دستخط، آپسی تعاون ݙوہاں ملکاں دی اقتصادی ترقی کیتے لانگ مارچ ثابت تھیسی، وزیراعظم شہباز شریف

بیجنگ۔4ستمبر(اے پی پی)پاکستان اتے چین زراعت، الیکٹرک وہیکلز، شمسی توانائی، صحت، کیمیکل و پیٹرو کیمیکل، آئرن اتے اسٹیل سودھا مختلف شعبیاں اچ تعاون دے ودھارے اتے سرمایہ کاری کیتے 4.2 ارب ڈالر مالیت دیاں 21 مفاہمت دیاں یادداشتاں تے دستخط کیتن جݙاں جو وزیراعظم محمد شہباز شریف چینی سرمایہ کاراں کوں پاکستان اچ خصوصی اقتصادی زونز سودھا مختلف شعبیاں اچ سرمایہ کاری دا سݙا ݙتے۔ بیجنگ اچ اتھاں پاکستان چین بی ٹو بی سرمایہ کاری کانفرنس دے موقع تے مفاہمت دیاں یادداشتاں اتے جوائنٹ وینچرز تے دستخط تھئے۔ ایں موقع تے نائب وزیراعظم وزیر خارجہ اسحاق ڈار، متعلقہ وفاقی وزراء، اتے ممتاز پاکستانی اتے چینی کمپنیاں دے نمائندیاں دی وݙی تعداد وی موجود ہئی۔ 1.54 ارب ڈالر دے جوائنٹ وینچرز ہائی ٹیک، زراعت، میڈیکل و صحت، کیمیکل و پیٹرو کیمیکل، آئرن اسٹیل و تاݶبا، شمسی توانائی، الیکٹرک وہیکلز دے شعبیاں بارے ہن، متعلقہ کمپنیاں دے نمائندیاں مفاہمت دیاں یادداشتاں اتے جوائنٹ وینچرز تے دستخط کیتے۔ پاکستان چین بی ٹو بی سرمایہ کاری کانفرنس نال خطاب کریندے وزیراعظم آکھیا جو اے ماݨ دی ڳالھ اے جو میں اپݨی حیاتی دی سب توں وݙی کانفرنس اچ شریک تھیاں، پاکستان اتے چین دی دوستی دی کوئی مثال نئیں ملدی، ساݙی اے دوستی دیانتداری، آپسی احترام اتے ہک ݙوجھے نال ہر خوشی اتے اوکھے ویلھے اچ تعاون دی بنیاد تے قائم اے۔ وزیراعظم آکھیا جو ݙوہاں ملکاں وچال تعلقات روز ݙیہارے تیزی نال تکڑے تھیندے پین، 2015 اچ چین اتے پاکستان سی پیک دے معاہدے تے دستخط کیتے اتے چین دے صدر شی جن پنگ پاکستان دا دورہ وی کیتا اتے ساݙے نال سی پیک دے معاہدے تے دستخط کیتے جیندے نال چینی کمپنیاں 35 ارب ڈالر دی سرمایہ کاری پاکستان اچ کیتی۔ وزیراعظم آکھیا جو چینی سرمایہ کاری نال 22، 22 گھنٹے دی لوڈ شیڈنگ مکی اے اتے 2018 اچ پاکستان توانائی دیاں ضرورتاں اچ خود انحصار تھی ڳیا، صنعتاں بحال تھئن، زراعت بحال تھئی، انفراسٹرکچر دے وݙے منصوبے، روڈ نیٹ ورک، اورنج لائن لاہور، ڈیمز اتے ݙوجھے ٻہوں سارے منصوبے شروع تھئے اتے پاکستان دی معیشت کوں ترقی ملی۔ وزیراعظم آکھیا جو بدقسمتی نال وچو کڄھ اے سلسلہ رک ڳیا ٻھل ہݨ اے منصوبے بحال تھئن ٻھل ݙو طرفہ اعتماد، آپسی احترام اتے گرمجوشی وی ودھی اے۔ وزیراعظم آکھیا جو اج اساں سی پیک ٹو دی شروعات کریندے پئے ہیں، اے سی پیک 2.0 بی ٹو بی سرمایہ کاری تے مشتمل اے۔ وزیراعظم آکھیا جو زراعت دا شعبہ پاکستان دی معیشت دی ریڑھ دی ہڈی اے اتے ساݙی معیشت دا 60 فیصد انحصار زراعت تے اے۔ چینی سرمایہ کاراں اتے کاروباری شخصیات کوں سݙا ݙینداں جو آپݨے تجربے، مہارت تے سرمایہ کاری پاکستان دے زرعی شعبے تے لاون جیندا ݙوہاں ملکاں کوں فائدہ تھیسی، انفارمیشن ٹیکنالوجی (آئی ٹی) اتے مصنوعی ذہانت (اے آئی) ہک ݙوجھا اہم باصلاحیت شعبہ اے جیندے اچ چین عالمی سطح تے سب توں اڳو اے۔ کان کنی اتے معدنیات آپسی تعاون دا ہک ݙوجھا اہم باصلاحیت شعبہ اے۔ وزیراعظم آکھیا جو بلاشبہ خصوصی اقتصادی زونز سی پیک 2.0 دے بنیادی ستون ہین جیہڑے چینی سرمایہ کاراں کیتے پرکشش مواقع ݙیندن، چین ٹیکسٹائل، چمڑا اتے ݙوجھے شعبیاں دیاں صنعتاں کوں پاکستان منتقل کر سڳدے اتے پاکستان دی افرادی قوت توں فیدہ چا سڳدے جیہڑی ݙوجھے ملکاں دے مقابلے اچ گھٹ لاگت آلی اے۔ چینی سرمایہ کار تھرڈ ملکاں دے مقابلے اچ پاکستان اچ ایں سہولتاں توں فیدہ ڳھندے ہوئیں آپݨا منافع ودھا سڳدن۔” وزیراعظم آکھیا جو میں چینی سرمایہ کاراں تے زور ݙینداں جو او اڳو ودھن اتے ایں موقع توں فیدہ چاون۔ وزیراعظم آکھیا جو بیجنگ اچ پاکستانی وزراء اتے توانائی، انفارمیشن، ٹیکنالوجی، کامرس اتے سارے شعبیاں دے حکام موجود ہن جیہڑے چینی سرمایہ کاراں کوں سہولت ݙیسن۔ انہاں آکھیا جیکر اساݙی معیشت پکی تھیسی تاں ݙوہاں ملک تکڑے تھیسن۔ انہاں آکھیا جو الحمدﷲ پاکستان دی معیشت ہݨ تکڑی اے اتے اقتصادی اشاریے مستقبل دی مثبت پیشرفت دا ݙسیندن، قلیل المدتی، وسط مدتی اتے طویل المدتی سطح تے معاشی ترقی تھیسی۔”

وزیراعظم آکھیا جو “چین دے صدر شی جن پنگ دے پاکستان دے نال تعاون دے ذاتی عزم دی وجہ نال اے ساریاں گالھیں ممکن تھئن اتے ہݨ اساں اقتصادی ترقی دی دروک اچ چین دے تعاون نال ݙوجھے ملکاں دے مقابلے کیتے تیار ہیں۔ وزیراعظم واضح کیتا جو چینی ٻھراواں اتے ٻھیݨیں دی پاکستان اچ سکیورٹی اساݙی پہلی ترجیح ے، ساکوں چین اتے پاکستان دے عوام دی ترقی و خوشحالی کیتے رَل مِل تے کم کرݨا ہوسی۔ محمد شہباز شریف آکھیا جو “چینی بھراواں کوں پاکستان اچ سرمایہ کاری کیتے سہولت ݙیوݨ اچ کہیں وی قسم دی تاخیر برداشت نئیں کرسوں۔ ایں موقع تے انہاں ݙو ترائے ہفتے پہلے چینی گروپ دے لوکاں دی نشاندہی تے درپیش مسئلے کوں 24 گھنٹے اچ حل کرݨ دی مثال ݙتی اتے آکھیا جو اسلام آباد اچ چینی گروپ ملاقات اچ ݙسایا جو انہاں کوں کڄھ مسئلے ہین جیندے تے میں آپݨی کابینہ دے ارکان کوں ہدایت کیتی جو 24 گھنٹے اچ ایں مسئلے کوں حل کیتا ونڄے اتے او مسئلہ حل کر ݙتا ڳئے، ایہا وجہ اے جو میں تہاکوں یقین ݙینداں جو پاکستان تہاݙا ݙوجھا گھر اے جیویں چین ساݙا ݙوجھا گھر اے۔ آؤ اڳوں ودھو اتے جوائنٹ وینچر سرمایہ کاری کروا، سارے وزارتاں، ادارے اتے محکمے چینی سرمایہ کاراں دے نال بھرپور تعاون کریسن اتے تیکھے اساں چینی اتے پاکستانی سرمایہ کاری دے ذریعے صرف ہک نئیں ٻھل ہک توں ودھ خصوصی اقتصادی زونز ٻݨیسوں۔ وزیراعظم آکھیا جو اے میݙا خواب اے اتے اساں ایں خواب کوں معاہدیاں تے عملدرآمد نال پورا کریسوں، سی پیک ٹو سب توں پہلی ترجیح اے۔” وزیراعظم آکھیا جو “چین 15 سال اچ دنیا دی ݙوجھی سب توں وݙی معیشت ٻݨ ڳئے اتے دنیا دی بہترین عسکری قوت اے اتے اے صرف محنت نال ممکن تھئے اتے اساں چینی ماڈل دے ذریعے پاکستان کوں تبدیل کرݨ چاہندے ہیں۔ وزیراعظم آکھیا جو “چینی صدر شی جن پنگ دی قیادت اچ چین کوں جیہڑی شاندار ترقی ملی اے ایںدی مثال نئیں ملدی، چین 700 ملین لوکاں کوں غربت توں کݙھیے اتے نہ صرف آپݨے لوکاں کوں روزگار ݙتے ٻھل دنیا دے ہزاراں لوکاں کوں روزگار دو سݙیندا پئے اتتے خوشحالی ودھدی پئی اے، اج آپݨے تجربیاں نال صنعتی ترقی دو ودھݨ دا ویلھا اے اتے پاکستان ہک ݙینھ متحرک معیشت اچ تبدیل تھیسی۔ وزیراعظم آکھیا جو سرمایہ کاراں وچال مفاہمت دیاں یادداشتاں چنڳی ڳالھ اے، پہلے وی اینھےا قدامات تھئین، ٻھل انتھک کوششاں اتے سخت محنت نال اے ممکن تھئے پاکستان اچ چین دے سفیر، چینی حکومت اتے چین دیاں عظیم کاروباری شخصیات ایکوں ممکن بݨائے۔ متعلقہ وفاقی وزراء، سرمایہ کاری بورڈ، ایس آئی ایف سی اتے صوبائی حکومتاں اتے متعلقہ محکمہ وچال بہتر رابطے نال ایں سانڳے پیشرفت تھئی اے۔ مفاہمت دیاں یادداشتاں نال ݙوہاں ملکاں وچال تعاون ودھسی، 1.5 ارب ڈالر دے جوائنٹ وینچرز تے پاکستان اتے چینی کمپنیاں دستخط کیتن، مفاہمت دیاں یادداشتاں کوں معاہدیاں اچ تبدیل کرݨ اتے انہاں تے عملدرآمد کرانا اساݙے کیتے ہک چیلنج اے۔ ایں سانڳے رَل مِل تے کم کرݨا ہوسی، اتے ݙوہاں حکومتاں کوں نیڑے دے رابطے دے ذریعے اڳوں ودھݨا ہوسی۔ یقین اے جو اساں آپݨے اہداف حاصل کرݨ اچ کامیاب تھیسوں، ݙوہاں ملکاں وچال مفاہمت دیاں یادداشتاں اتے جوائنٹ وینچرز تے ڄیکر اساں عملدرآمد کرݨ اچ کامیاب تھی ڳئے تاں اے ݙوہاں ملکاں دی اقتصادی ترقی کیتے لانگ مارچ ہوسی اتے اے لانگ مارچ بیجنگ توں شروع تھی تے اسلام آباد آپݨی منزل تے پج تے مکسی اتے اے لانگ مارچ پاکستان کوں اینڄھے ملک اچ تبدیل کریسی جتھاں ارباں ڈالر دی سرمایہ کاری تھیسی، منافع بخش روزگار دے لکھاں موقع پیدا تھیسن، اساݙی جی ڈی پی ترقی کریسی اتے معیشت مضبوط تھیسی۔ وزیراعظم آکھیا جو ایں چیلنج کوں قبول کریندے اساں اج شام توں ترقی دا لانگ مارچ شروع کریسوں اتے اقتصادی ترقی دی منزل تئیں پجݨ تئیں آرام نال نا ٻہسوں جیندے کیتے سارے حکومتی ادارے، محکمے اتے نجی شعبہ رَل مِل تے مکمل ہم آہنگی اتے تعاون نال کم کریسن۔