وزیراعظم دی متاثرہ علاقیاں توں عوام دے ویلھے تے انخلاء اتے امدادی سرگرمیاں دی نگرانی یقینی بݨاوݨ دی ہدایت، متاثرین دی بحالی ترجیح اے”، شہباز شریف

اسلام آباد۔5ستمبر(اے پی پی)وزیراعظم محمد شہباز شریف متاثرہ علاقیاں توں عوام دے ویلھے تے انخلاء اتے امدادی سرگرمیاں دی ہر ویلھے نگرانی کرݨ دی ہدایت کریندے آکھیے جو بارشاں و سیلاب دے متاثرین دی بحالی حکومت دی ترجیح اے، وفاقی حکومت صوبائی حکومتاں دی ہر قسم دی معاونت کیتے تیار اے۔ وزیراعظم محمد شہباز شریف دی اڳواݨی اچ سیلاب نال تھیوݨ آلے نقصانات اتے متاثرہ علاقیاں اچ امداد و بحالی دیاں سرگرمیاں دا جائزہ ڳھنݨ کیتے اجلاس تھئے۔ وزیراعظم آفس دے میڈیا ونگ توں جاری بیان موجب اجلاس نال خطاب کریندے وزیراعظم آکھیا جو اڄوکیاں بارشاں و سیلاب دے متاثرین دی بحالی حکومت دی ترجیح اے۔ انہاں آکھیا جو وفاقی حکومت صوبائی حکومتاں دی ہر قسم دی معاونت کیتے ہر ویلھے تیار اے۔ انہاں متاثرہ علاقیاں توں ویلھے تے انخلاء اتے امدادی سرگرمیاں دی ہر ویلھے نگرانی یقینی بݨاوݨ دی ہدایت کریندے آکھیا جو سیلاب متاثرین دی مکمل بحالی تئیں وفاقی حکومت صوبائی حکومتاں دے نال رل تے کم جاری رکھیسی، اینڄھے متاثرین جیڑھے نادرا نال رجسٹرڈ نئیں، انہاں تئیں مالی معاونت پڄاوݨ کیتے کمیٹی ٻݨائی ونڄے۔ انہاں وزارت موسمیاتی تبدیلی کوں آئندے سال دے مون سون کیتے ہݨ توں تیاری کرݨ اتے پاکستان کوں موسمیاتی تبدیلی دے منفی اثرات بشمول موسلادھار بارشاں و سیلاب توں بچاوݨ اتے انہاں دے نقصانات کوں گھٹ توں گھٹ کرݨ کیتے ݙو ہفتے اچ ہک جامع لائحہ عمل پیش کرݨ دا حکم ݙتا۔ وزیراعظم این ڈی ایم اے، پی ڈی ایم ایز، پاک فوج اتے ریسکیو و ریلیف دے وفاقی و صوبائی اداریاں دیاں ریسکیو و ریلیف کیتے کارروائیاں کوں سراہیا۔ اجلاس کوں متاثرہ علاقیاں اچ تھیوݨ آلے نقصانات اتے ریسکیو و ریلیف دیاں کارروائیاں دے نال نال سیلابی ریلے دی موجودہ صورتحال بارے ݙسایا ڳیا۔ اجلاس کوں ݙسایا ڳیا جو مون سون دا آخری سپیل ختم تھیوݨ دے بعد متاثرین دی بحالی دا کم شروع کیتا ویسی۔ ایں ویلھے سارے وسائل و افرادی قوت ریسکیو، ریلیف و انخلاء اچ مصروف عمل اے۔ سیلابی ریلے دی صورتحال بارے ݙسایا ڳیا جو دریائے راوی، ستلج اتے چناب اچ سیلابی ریلے ایں ویلھے وسطی اتے جنوبی پنجاب اچ پڄ ڳئے جیہڑا تیکھے پنجند توں لنگھ ویسی۔ پنجند تے 10 توں 12 لکھ کیوسک ریلے توں بچاؤ دی تیاری مکمل کیتی ڳئی اے جݙاں جو سیلابی ریلے دی اصل مقدار توقع توں گھٹ 6 لکھ کیوسک دے نیڑے ہوسی۔ ملتان اچ ایں ویلھے انتظامیہ، پاک فوج اتے ریسکیو ادارے سیلابی ریلے کوں بغیر کہیں بند کون تروڑیے لنگھاوݨ دی بھرپور کوشش اچ مکمل تیاری نال ردھے ہوئن، ملک دے بالائی اتے وسطی علاقیاں اچ بجلی دے متاثرہ نظام اچوں 80 فیصد کوں بحال کر ݙتا ڳئے جݙاں جو متاثرہ پل تے شاہراہواں کوں رابطیاں دی بحالی کیتے مرمت کر تے ٹریفک کیتے کھول ݙتا ڳئے۔ اجلاس کوں ݙسایا ڳیا جو مجموعی طور تے پورے ملک اچ 20 لکھ توں ودھ لوکاں دی ویلھے تے نقل مکانی کوں یقینی ٻݨایا ڳیا جݙاں جو سیلاب توں متاثرہ علاقیاں توں 4100 توں ودھ پھس ڳئے لوکاں کوں ریسکیو کیتا ڳئے۔ وفاقی حکومت ولوں متاثرین کیتے 6300 ٹن توں ودھ امدادی سامان پڄایا ڳئے۔ اجلاس کوں ݙسایا ڳیا جو متاثرین کوں طبی امداد ݙیوݨ کیتے 2400 توں ودھ میڈیکل کیمپس ٻݨائے ڳن۔ اجلاس کوں ݙسایا ڳیا جو ملک بھر اچ جاں بحق اتے زخمی تھیوݨ آلے لوکاں اتے مالی نقصانات دے حوالے نال وفاقی حکومت ولوں مالی معاونت ترجیحی بنیاداں تے نادرا توں مکمل کیتی ویندی پئی اے۔ اجلاس اچ گلگت بلتستان، آزاد جموں و کشمیر سودھا چارے صوبیاں دے چیف سیکریٹریز وی آپݨے آپݨے صوبیاں دے حوالے نال جائزہ پیش کیتا۔ وزیراعظم صوبائی حکومتاں کوں وفاقی حکومت ولوں ہر قسم دی معاونت ݙیوݨ دی ہدایت کیتی۔ اجلاس اچ وفاقی وزراء احد خان چیمہ، عطا اللہ تارڑ، سردار اویس خان لغاری، چیئرمین این ڈی ایم اے، چیئرمین نادرا اتے متعلقہ اعلیٰ حکام شرکت کیتی۔ گلگت بلتستان اتے آزاد کشمیر سودھا چارے صوبیاں دے چیف سیکریٹریز ویڈیو لنک دے ذریعے شرکت کیتی۔