“نبی کریم ﷺ دی سیرت انسانیت کیتے ہدایت اتے رہنمائی دا سرچشمہ اے، سردار ایاز صادق

اسلام آباد۔6ستمبر (اے پی پی) سپیکر قومی اسمبلی سردار ایاز صادق عید میلاد النبی ﷺ دے موقع تے امت مسلمہ کوں مبارخ ݙیندیں آکھیا جو نبی کریم ﷺ دی سیرت انسانیت کیتے ہدایت اتے رہنمائی دا سرچشمہ اے، رحمت، محبت اتے رواداری دے 1500 سال دا آوݨ باعثِ رحمت اے۔ ڈائریکٹر میڈیا توں جاری بیان موجب سپیکر سردار ایاز صادق آکھیا جو آپ ﷺ دی سیرت طیبہ دنیا کیتے رحمت، ہدایت اتے اُچی اخلاقیات دا سر چشمہ اے، 1500 سالہ جشنِ رحمت، محبت اتے رواداری امت مسلمہ کیتے فخر دا باعث اے، نبی کریمﷺ جہالت، نفرت اتے ناانصافی دے اندھاریں کوں علم، عدل اتے رواداری نال بدلیا۔ سپیکر سردار ایاز صادق آکھیے جو اللہ تعالیٰ نبی کریم ﷺ کوں سارے جہاناں کیتے سراپا رحمت بݨایا، آپ ﷺ دی سیرت ہر دور دے انسان کیتے بہترین رہنمائی ݙیندی اے، پرامن معاشرے کیتے امانت، دیانت، عدل اتے خدمت خلق اپناوݨ ضروری اے۔ سپیکر سردار ایاز صادق آکھیا جو پارلیمان عوام دیاں امِیداں دا مرکز اے، قانون سازی اچ سیرتِ نبوی ﷺ دی روشنی توں رہنمائی گھنݨاں ناگزیر اے۔سپیکر سردار ایاز صادق آکھیا جو نویں نسل کوں سیرتِ رسول ﷺ نال واقف کراوݨ ویلھے دی اہم لوڑھ اے، اسوہ حسنہ ﷺ تے عمل نال نینگراں اُچا کردار اتے اسلامی اقدار دے وارث بݨ سڳدن۔ سپیکر سردار ایاز صادق آکھیا جو “عید میلاد النبی ﷺ تجدیدِ عہد اتے خود احتسابی دا ݙینھ اے، عید میلاد النبی ﷺ دے موقع تے چھل متاثرین کوں نئیں بھلݨا چاہیدا۔ سپیکر سردار ایاز صادق آکھیا جو چھل اچ لوک آپݨے گھر، مال مویشی اتے روزگار توں محروم تھی ڳئن، چھل متاثرین دے نال یکجہتی اتے مدد ساریاں دی ذمہ واری اے۔ سپیکر سردار ایاز صادق آکھیا جو ارکان پارلیمان اختلافات بھلا تے قوم دی رہنمائی کرن، قوم نبی کریم ﷺ دیاں تعلیمات تے عمل کر تے چھل متاثرین دی مدد کرن۔سپیکر سردار ایاز صادق فلسطین اتے کشمیر دے عوام نال اظہارِ یکجہتی کریندیں آکھیا جو فلسطین اتے کشمیر دی آزادی دی جدوجہد دی پوری حمایت کریندوں، عالمی برادری فلسطین و کشمیر اچ ظلم مکاوݨ کیتے اقدامات کرن۔ سپیکر سردار ایاز صادق آکھیا جو پاکستان امن، انصاف اتے انسانی حقوق دے ودھارے کیتے جدوجہد جاری رکھیسی۔ سپیکر سردار ایاز صادق وطن عزیز، چھل متاثرین اتے فلسطین و کشمیر دے عوام کیتے دعا منڳی۔