یوم دفاع و شہداء دے موقع تے آئی ایس پی آر دی نویں ڈاکیومنٹری جاری

اسلام آباد-6 ستمبر (اے پی پی) یوم دفاع و شہداء دے موقع تے مسلح افواج دے شعبہ تعلقات عامہ (آئی ایس پی آر) 6 ستمبر 1965 دے حوالے نال نویں ڈاکومنٹری جاری کر ݙتی اے۔ ڈاکومنٹری وچ جنگ ستمبر دے غازیاں دی نہ بھلݨ آلی داستان انہاں دی زبانی پیش کیتی ڳئی اے۔ میجر جنرل (ریٹائرڈ) زاہد محمود، ہلال امتیاز ملٹری دا آکھݨ ہئی جو اساں جنگ دے میدان وچ رہ تے جنگ لڑی اتے بہوں وݙے حالات دا سامݨا کیتے، ݙینھ دے ختم تھیوݨ تے جݙاں دشمن سامݨے ہووے اتے زندگی اتے موت دا معاملہ ہووے، تاں صرف اللہ نال تعلق رہندے۔ ایویں ریٹائرڈ ائیر مارشل مسعود اختر ہلال امتیاز ملٹری وی اپݨے جذبات دا خوبصورتی نال اظہار کیتا اتے آکھیا جو ایہا پاک فوج دی دلیری، جرات، حوصلہ اتے یقین اے۔ ڈاکومنٹری وچ بحری سرحداں دے محافظ رئیر ایڈمرل ریٹائرڈ فواد امین بیگ ہلال امتیاز ملٹری دشمن دا عبرتناک انجام یاد ݙیوایا اتے آکھیا جو دشمن اے جاݨ ڳیا جے او آپݨی قوت ساݙے پاݨی وچ آزماوݨ چاہوے تاں اوں دا انجام سمندر دی تہہ وچ دفن تھیوݨا اے۔ انہاں آکھیا جو صدر ایوب خان آکھیا ہئی جو دشمن کوں پتہ ہی نئیں جو اوں کئیں کوں للکارئے، اے دراصل پوری قوم دی آواز ہئی۔ رئیر ایڈمرل ریٹائرڈ فواد امین بیگ آکھیا جو ہک پوری قوم جنگ وچ چھال مارݨ اتے ہر قربانی ݙیوݨ کیتے تیار ہئی۔ پاکستانی مسلح افواج دا دفاع دا وعدہ صرف ہک نعرہ نئیں بلکہ ہک حلف اے، پاک فوج دا مٹی توں گھدا ڳیا حلف پچھاݨ اتے عزم دی یاد ݙیوݨ آلا اے۔ ڈاکومنٹری وچ پاک فوج دے ریاست دے نال تعلق اتے دفاع دی خوبصورت عکاسی کیتی ڳئی، وطن کیتے آپݨاں سارا کجھ قربان کرݨ دی آمادگی اتے جذبہ پاک فوج دے خون وچ شامل اے۔