وزیراعلیٰ پنجاب مریم نواز شریف دیرہ غازی خان اچ الیکٹرک بس سروس دا افتتاح کرݙتا

دیرہ غازی خان۔25 ستمبر(اے پی پی) وزیراعلیٰ پنجاب مریم نواز شریف دیرہ غازی خان اچ الیکٹرو بس پراجیکٹ دا افتتاح کرݙتا۔ تقریب اچ وفاقی توانائی سردار اویس احمد خان لغاری، سینئر صوبائی وزیر مریم اورنگ زیب، ارکان قومی و صوبائی اسمبلی، ضلعی افسران اتے مسلم لیگ ن دے کارکنان وݙی تعداد اچ شرکت کیتی۔ تقریب توں خطاب کریندے مریم نواز شریف آکھیا جو دیرہ غازی خان ڈویژن کیتے 101 الیکٹرک بساں ݙتیاں ویسن جݙاں جو تکھے ہی دیرہ غازی خان اچ میٹرو بس سروس وی شروع کیتی ویسی۔ راجن پور، لیہ، مظفرگڑھ اتے تونسہ سودھے ہر ضلع اچ الیکٹرک بساں چلائیاں ویسن۔وزیراعلیٰ تقریب دا آغاز سرائیکی زبان اچ کیتا اتے شرکاء نال خطاب کریندے آکھیا جو ’’تساں کنےآتے ٻہوں خوشی تھئی اے، تہاکوں ݙیکھ تے ہاں ٹھرڳئے ‘‘۔ انہاں آکھیا جو جتھاں تخت لاہور اے، اتھاں ہی تخت بہاولپور، رحیم یار خان، ملتان اتے دیرہ غازی خان وی ہن۔ مریم نواز شریف آکھیا جو جنوبی پنجاب دے عوام عزت اتے پیار دی چادر پوائی اے، جیڑھی ہمیشہ یاد رہسی۔ انہاں آکھیا جو دیرہ غازی خان دے عوام دی خوشی ݙیکھ تے حوصلہ ودھدا پئے، ارباں روپے خرچ تھی ویسن پر دیرہ غازی خان کوں ضیان نہ تھیوݨ ݙیسوں۔وزیراعلیٰ آکھیا جو پنجاب دے عوام کنے میلی اکھ نال ݙیکھݨ دی اجازت نہ ݙیساں اتے جیڑھا پنجاب دے عوام کنے انگلی چیسی ایں کوں سختی نال روکیا ویسی۔ انہاں دا آکھݨ ہئی جو پنجاب اچ ٻئے صوبیں توں ڈھائی کروڑ لوک روزگار دے سلسلے اچ رہندے پئن اتے پنجاب دے ہسپتال ٻئے صوبیں دے عوام کیتے وی کُھلئے پہن۔ انہاں آکھیا جو سندھ اچ آفت آسی تاں پنجاب نال کھڑا تھیسی۔ انہاں آکھیا جو انہاں کیتے جنوبی، وسطی اتے اُتلے پنجاب اچ کوئی فرق کائنی، سارے برابر ہن اتے او ساریں دی وزیراعلیٰ ہن۔ مریم نواز شریف واضح کیتا جو ساؤتھ پنجاب دے عوام کوں ساریں توں پہلے الیکٹرو بس اتے غذائی قلت دے شکار نیاݨیاں کیتے منصوبے ݙتے ڳئن۔ انہاں آکھیا جو مسلم لیگ (ن) موٹروے اتے ایکسپریس وے جیھے وݙے منصوبے ساؤتھ پنجاب کوں ݙتے۔وزیراعلیٰ آکھیا جو چھل متاثرین دی بحالی کیتے ارباں روپے خرچ کیتے ڳئن اتے بی آئی ایس پی دے ذریعے متاثرہ خانداناں کوں 10 ہزار نی بلکہ لکھاں روپے تئیں ݙیوݨ دا عزم رکھیندوں تاں جو انہاں دا ضیان پورا تھی سڳے۔ انہاں آکھیا جو پنجاب ٻاہرلی امداد دے بغیر آپݨے وسیلے نال منصوبے پورے کریسی۔انہاں آکھیا جو دیرہ غازی خان دے لوکاں دے خواباں کوں ہݨ تعبیر ملدی پئی اے، میکوں ماݨ اے جو بارڈر ملٹری پولیس اچ پنجاب دیاں دھیریں یونیفارم پاتے خدمتاں انجام ݙیندیاں پئن۔ عوام توں اپیل کیتی جو او الیکٹرو بساں کوں آپݨی سواری وانڳوں صاف اتے محفوظ رکھن کیونجو اے منصوبے عوام دی امانت ہن۔ انہاں خبردار کیتا جے کہیں ضیان پڄایا تاں سخت کارروائی تھیسی، میانوالی اچ الیکٹرو بس تے پتھر سٹݨ آلے بندے کوں گرفتار کرتے عبرت دا نشان بݨایا ویسی۔ خطاب دے چھیکڑ اچ وزیراعلیٰ مریم نواز آکھیا جو انہاں دی پوری کابینہ عوام دی خدمت کیتے جاڳدی پئی اے اتے او عوامی خدمت اچ کوئی کسر نہ چھوڑیسن۔