پورٹ قاسم دی عالمی پذیرائی قومی اعزاز اے، وفاقی وزیر جنید انوار چوہدری

اسلام آباد۔ 27 ستمبر(اے پی پی): وفاقی وزیر بحری امور محمد جنید انوار چوہدری ورلڈ بینک دی طرفوں پورٹ قاسم کوں دنیا دی تکھے ترقی کرݨ آلیاں بندرگاہواں اچ شامل کرݨ دی تعریف کریندے آکھیے جو اے کامیابی حکومت دی مسلسل اصلاحات تے جدیدیت دے عمل دا ثمر اے۔ ورلڈ بینک ایس اینڈ پی گلوبل مارکیٹ انٹیلیجنس دے اشتراک نال جاری کیتے ڳئے تازہ ترین کنٹینر پورٹ پرفارمنس انڈیکس (CPPI) 2024 اچ پورٹ قاسم کوں دنیا دی ٹاپ 20 ترقی پذیر بندرگاہواں اچ شامل کیتے ۔ رپورٹ موجب 2020 کنوں 2024 وچال پورٹ قاسم دی کارکردگی اچ 35.2 پوائنٹس دا ودھارا ریکارڈ کیتا ڳیا۔ جنید انوار چوہدری آپݨے بیان اچ آکھیے جو محمد بن قاسم پورٹ دا دنیا دی بہترین ترقی کرݨ آلیاں بندرگاہواں اچ شامل تھیوݨ قومی فخر دا باعث اے۔ اے اساݙی مسلسل جدوجہد، جدید تقاضیں موجب اصلاحات تے عالمی معیار دی بہترین پالیسیاں دا نتیجہ اے۔ انہاں آکھیے جو حکومت دا عزم اے جو پاکستان دے بحری شعبے کوں نہ صرف ملکی بلکہ علاقائی تجارت کیتے وی ہک مؤثر تے مسابقتی مرکز بݨایا ونڄے۔ وفاقی وزیر جاری پالیسی اقدامات، ریگولیٹری اصلاحات تے جدید ٹیکنالوجی اچ سرمایہ کاری کوں ایں کامیابی دا بنیادی عنصر قرار ݙتا۔ وفاقی وزیر خاص طور تے نجی آپریٹرز دے کردار دی تعریف کیتی ، بالخصوص ڈی پی ورلڈ دے قاسم انٹرنیشنل کنٹینر ٹرمینل (QICT) دا ذکر کریندے آکھیے جو انہاں دی انتظامیہ پورٹ قاسم دے آپریشنز کوں عالمی معیار موجب یقینی بݨایا۔ انہاں مزید آکھیا جو وزارت بحری امور پورٹ چینل دی ڈریجنگ دے ہک پراݨے منصوبے دی منظوری ݙے ݙتی اے جیں کنوں وݙے جہازاں دی آونڄ ممکن تھیسی تے تجارتی گنجائش اچ ودھارا تھیسی۔