ڈی آئی خان حملے دیاں تنداں کابل نال مِلدن، ملک اچ تھیوݨ والی 70 فیصد دہشتگردی اچ افغان ملوث ہین، وزیرِ مملکت طلال چوہدری دی پریس کانفرنس

اسلام آباد۔28 ستمبر(اے پی پی)وزیرِ مملکت برائے داخلہ سینیٹر طلال چوہدری انکشاف کیتے جو پاکستان اچ چپھلے ڈھائی ترائے سالاں اچ تھیوݨ والیاں دہشتگردی دیاں کارروائیاں اچ 70 فیصد افغان شہری ملوث ہن، ڈی آئی خان چیک پوسٹ حملے اچ ملوث دہشتگرد دا ٹانکا وی کابل توں ملیے۔ اسلام آباد اچ وفاقی وزیرِ اطلاعات و نشریات عطا تارڑ دے نال پی ٹی وی ہیڈکوارٹرز اچ پریس کانفرنس کریندے ہوئے وزیرِ مملکت برائے داخلہ سینیٹر طلال چوہدری آکھیے جو ڈی آئی خان چیک پوسٹ حملے اچ سکیورٹی اہلکاراں سودھا معصوم شہری، تریمیتں، ٻال اتے غیر مسلح ریسکیو اہلکار شہید تھئن، ہلاک دہشتگرد دا نادرا اچ کوئی ریکارڈ نئیں ملیا، اوپن سورس انٹیلی جنس تصدیق کیتی اے جو ایںدی تصویر کابل دے ہک چوک دی اے، ڄیندے نال ثابت تھیندے جو اے پراکسیز مشرقی سرحد توں فنڈ اتے مغربی سرحد دی محفوظ پناہ گاہواں توں آپریٹ تھیندیاں پئن۔ وزیرِ مملکت آکھیا جو پاکستان ݙو طرفہ سطح، بین الاقوامی فورماں، ڈوزیئرز اتے مذاکرات نال کئی واری کابل انتظامیہ کوں سمجھایا ٻھل افغان عبوری حکومت اپݨی سرزمین دا پاکستان دے خلاف استعمال نئیں روکیا، معصوم شہریاں اتے ریسکیو اہلکاراں تے حملے ڈالراں کیتے کیتاں ونڄݨ والی کھلی دہشتگردی اے۔ انہاں وزیراعلیٰ خیبر پختونخوا تے تنقید کیتی جو انہاں اپݨی پریس کانفرنس اچ افغانستان دا ناں وی نئیں چاتا، صوبائی قیادت دہشتگرداں دے خلاف آخر کیوں ݙھیلی پئی ہوئی اے؟ کے پی حکومت این ایف سی دا ملݨ وال 800 ارب روپیا کتھاں خرچ کیتے؟ صوبے اچ سیکیورٹی فورسز کولو کوئی سہولت اے نا کوئی ٹریننگ ڄݙاں جو پولیس ایکٹ اچ ترامیم کر تے پولیس توں اختیارات وی کھسݨ دی وی کوشش کیتی ڳئی۔ انہاں آکھیا جو کے پی قیادت سکیورٹی اجلاساں، اے پی سی اتے نیشنل کاؤنٹر ٹیررازم میٹنگز اچ شرکت نئیں کریندی، صرف این ایف سی فنڈز منگݨ اسلام آباد آندی اے، ڄݙاں صوبائی حکومت قومی سلامتی دے فورماں توں راہِ فرار اختیار کریسی اتے دشمن دا ناں گھنݨ توں کنی کریسی تاں دہشتگردی دے خلاف جنگ کیویں جیتی ویسی؟ صحافیاں دے سوالاں دا ولدا ݙیندے ہوئیں طلال چوہدری واضح کیتا جو اسلام آباد دے 325 رستیاں اچوں کوئی بند نئیں کیتا ڳیا، شہریاں دے جان و مال دے تحفظ اتے عدالتی احکامات دے تحت کنٹینراں سودھا احتیاطی انتظامات رکھیے ڳئن ڄنہاں کوں ضرورت پووݨ تے استعمال کیتا ویسیے، ڄݙاں جو سامان والے کنٹینر روکݨ دی کوئی شکایت نئیں ملی۔ ہک ٻئے سوال تے انہاں آکھیا جو فرانزک لیبز، سیف سٹیز اتے جدید آلات دے بغیر امن قائم نئیں تھی سڳدا، ٻھل کے پی دے ادھے توں ودھ ضلعیاں اچ اڄ وی سی ٹی ڈی موجود نئیں۔ دہشتگردی توں شدید متاثرہ پشاور اچ صرف 25 کیمرے ہین اتے پہلا سیف سٹی پروجیکٹ ہݨ مکمل تھیوݨ دے نیڑے اے۔ پنجاب سی ٹی ڈی اتے سیف سٹیز ٻݨا اتے دہشتگردی دا خاتمہ کیتا ڄݙاں جو کے پی حکومت 14 سال اچ ادارے قائم نئیں کیتے۔ انہاں آکھیا جو او تیکھے وفاقی وزیرِ اطلاعات نال نیشنل ایکشن پلان دے 14 نکات تے وفاق اتے صوبیاں دی کارکردگی تے تفصیلی بریفنگ ݙیسن۔