پاکستان دا بھارت کوں اقوام متحدہ وچ بھرپور جواب

اقوام متحدہ ۔28ستمبر(اے پی پی) اقوام متحدہ وچ پاکستان بھارت دے اے دعویٰ کرݨ تے جو اوں پاکستان کوں “دہشت گرد” آکھیا، ایں دی سخت مذمت کیتی تے اینکوں “شرمناک” تے “چھوٹا پن” قرار ݙتا۔ اقوام متحدہ وچ پاکستانی مشن دے سیکنڈ سیکرٹری محمد راشد جنرل اسمبلی وچ اپݨے حق جواب دے استعمال نال بھارتی ملک رینٹالا سری نواس دے بیان کوں “انتہائی شرمناک” تے “بچگانہ” آکھیا۔ انہاں آکھیا جو اے وݙی شرم دی ڳالھ اے جو بھارت ہک ملک دے ناں کوں وگاڑݨ کیتے ایں قدر جھکا تھی تے ڈھہہ ڳئے ۔ ہک خود مختار ریاست دے ناں دا مذاق اُݙاوݨ نہ صرف غیر مہذب اے بلکہ ایندا مقصد ہک پوری قوم دی توہین کرݨ اے۔ انہاں آکھیا جو اے کوئی مقامی سیاسی جلسہ کائنی، ایں طرح دیاں ڳالھیں کرتے بھارت آپݨی ساکھ کوں خراب کریندا پئے تے دنیا کوں ݙکھیندا پئے جو اوں کول کوئی ٹھوس دلیل کائنی، صرف سستیاں ڳالھیں ہن۔ پاکستانی سفیر دے ایں تکھے جواب تے بھارتی سیکرٹری کوئی جواب کائنی ݙتا۔محمد راشد آکھیا جو بھارت سرحد پار دہشت گردی دی حمایت تے سرپرستی کریندا پئے تے انہاں بھارتی خفیہ ایجنسیاں دے ایجھے نیٹ ورکس دا حوالہ ݙتا جیڑھے پڑوسی ملکاں کوں کوں غیر مستحکم کرݨ وچ ملوث ہن۔ انہاں آکھیا جو ایں طرح دے کم بھارت دے دہشت گردی دے خلاف ہووݨ دے دعوے دا ݙوڑا معیار ݙکھیندن۔ انہاں بھارتی وزیر خارجہ دے اے بیان تے وی اعتراض کیتا جیندے وچ انہاں پاکستان کوں “عالمی دہشت گردی دا مرکز” آکھیا ہئی۔ محمد راشد اینکوں حقائق کنوں خالی قرار ݙیندے آکھیا جو بھارت نہ صرف دہشت گردی دا مستقل مجرم اے بلکہ ہک علاقائی بدمعاش وی اے جیڑھا جموں تے کشمیر وچ ریاستی دہشت گردی وچ ملوث اے۔ انہاں بھارتی نیول آفیسر کلبھوشن جادھو دا وی ذکر کیتا جیڑھا پاکستان وچ جاسوسی کرݨ پاروں وٹھیا ڳیا۔ انہاں بھارت دی عادت تے وی تنقید کیتی جو اوں ہمیشہ بغیر ثبوت دے پاکستان تے الزام لیندے۔ انہاں مئی 2024 دے واقعے دا حوالہ ݙیندے آکھیا جو بھارت  ایں واقعے دی آڑ وچ پاکستان تے حملہ کیتا جیندے نال 54 نشوم لوکاں، جنہاں وچ ٻال تے تے تریمتاں وی شامل ہن، دیاں جاناں ڳئیاں۔چھیکڑ اچ ، محمد راشد پاکستان دے امن دے عزم دا اعادہ کریندے آکھیا جو جنوبی ایشیا دے 1.9 ارب لوک خوشحالی تے استحکام دے مستحق ہن پر اے مقصد ڈرامے تے تڑیاں نال حاصل کائنی تھی سڳدے۔ انہاں آکھیا جو حقیقی ترقی کیتے خلوص نیت، سانجھے احترام، ڳالھ مہاڑ تے سفارت کاری دی لوڑھ اے، جیڑھے اصولاں تے پاکستان ہمیشہ عمل کیتے تے بھارت کوں وی انہاں تے عمل کرݨا چاہیدے