پاکستان علاقائی امن و استحکام چاہندے، ملکی علاقائی سالمیت دی کہیں وی بالواسطہ یا بلاواسطہ خلاف ورزی دا مضبوط اتے فیصلہ کن جواب ݙتا ویسی، چیف آف آرمی سٹاف فیلڈ مارشل سید عاصم منیر

راولپنڈی۔21اکتوبر(اے پی پی)چیف آف آرمی سٹاف فیلڈ مارشل سید عاصم منیر آکھیے جو دہشت گرداں دا تعاقب کرݨ اتے صوبہ بلوچستان کوں ایں لعنت توں نجات ݙیواوݨ کیتے سارے ضروری اقدامات کیتے ویندے پئن، پاکستان علاقائی امن اتے استحکام چاہندے ، ملکی علاقائی سالمیت دی کہیں وی بالواسطہ یا بلاواسطہ خلاف ورزی دا مضبوط اتے فیصلہ کن جواب ݙتا ویسی، آپݨے شہریاں دیاں زندگیاں اتے فلاح و بہبود دا تحفظ کیتا ویسی۔ آئی ایس پی آر توں جاری بیان موجب چیف آف آرمی سٹاف فیلڈ مارشل سید عاصم منیر جنرل ہیڈ کوارٹرز اچ 17 ویں قومی ورکشاپ بلوچستان دے شرکاء نال ڳالھ مہاڑ کیتی۔ انہاں شرکاء نال آپݨی ڳالھ مہاڑ اچ آکھیے بلوچستان پاکستان دا ماݨ اے، ٻہوں متحرک، لچکدار اتے محب وطن لوکاں نال مالا مال اے جیڑھے ایں دی اصل دولت ہن۔ انہاں وفاقی اتے صوبائی حکومتاں دے ترقیاتی اقدامات تے وی روشنی پاتی جیڑھے بلوچستان دے سماجی و اقتصادی منظر نامے کوں عوام تے مبنی نقطہ نظر دے ذریعے چنڳاں بݨاوݨ سانڳے کیتے ویندے پئن۔ انہاں بلوچستان دے عوام دے فیدے کیتے صوبے دی بے پناہ اقتصادی صلاحیتاں دے ادراک تے زور ݙتا۔ انہاں سول سوسائٹی دے تعمیری کردار کوں قبول کریندے خاص کر نینگراں کوں شامل کرݨ اتے بااختیار بݨاوݨ اچ پائیدار ترقی اچ انہاں دے اہم کردار تے زور ݙتا اتے بلوچستان اچ طویل مدتی خوشحالی دے تناظر اچ ذاتی سیاسی ایجنڈیں دی نفی کیتی۔ آرمی چیف ایں ڳالھ تے زور ݙتا جو بھارتی حمایت یافتہ پراکسیز، فتنہ الہندستان اتے فتنہ الخوارج تشدد کرݨ کیتے بُری نیت نال عوام دشمن اتے ترقی مخالف ایجنڈیں دا پرچار کریندن۔ انہاں آکھیا جو انہاں دہشت گرداں دا تعاقب کرݨ اتے صوبے کوں ایں لعنت توں نجات ݙیواوݨ کیتے سارے ضروری اقدامات کیتے ویندے پئن۔ فیلڈ مارشل ایں ڳالھ دا اعادہ کیتا جو پاکستان علاقائی امن اتے استحکام چاہندے، ایں دی علاقائی سالمیت دی کہیں وی بالواسطہ یا بلاواسطہ خلاف ورزی دا مضبوط اتے فیصلہ کن جواب ݙتا ویسی اتے آپݨے شہریاں دیاں زندگیاں اتے فلاح و بہبود دا تحفظ کیتا ویسی۔ ورکشاپ دا اختتام ہک واضح انٹرایکٹو سوال و جواب دے سیشن نال تھیا۔