سائبر کرائم دا مقابلہ جدید ٹیکنالوجی تے تربیت یافتہ افرادی قوت نال کیتا ونڄ سڳدے، محسن نقوی

لاہور۔27 ستمبر (اے پی پی) وفاقی وزیرِ داخلہ محسن نقوی سائبر کرائم دے خلاف کارروائیاں مزید تکھیاں کرݨ دی ہدایت کریندے آکھیے جو آن لائن مالیاتی فراڈ، نقلی اکاؤنٹس، ڈیجیٹل بلیک میلنگ، ہراسانی تے منظم سائبر کرائم نیٹ ورکس دے خلاف بلاامتیاز کارروائی کیتی ونڄے۔ اے ہدایت انہاں نیشنل سائبر کرائم انویسٹی گیشن ایجنسی (این سی سی آئی اے) سینٹرل زون ہیڈکوارٹرز دے دورے دے موقع تے سائبر کرائمز دے خلاف جاری آپریشنز تے تحقیقات دے جائزہ اجلاس دی صدارت کریندے ݙتی۔ انہاں شکایات سیل، فرانزک لیب تے انویسٹی گیشن ونگ دا معائنہ کیتا تے شہریاں دی اوکھ دے اندراج توں گھن تے تفتیش تے ملزمان دے خلاف کارروائی تئیں پورے نظام دا جائزہ ڳھدا۔ اجلاس اچ آن لائن مالیاتی فراڈ، ہراسانی تے منظم سائبر کرائم نیٹ ورکس دے خلاف کریک ڈاؤن مزید تکھا کرݨ دا فیصلہ کیتا ڳئے۔ وفاقی وزیرِ داخلہ آکھیا جو سائبر کرائم کرݨ آلا جتھاں وی ہووے اونکوں قانون دی گرفت اچ گھن آوݨا ہوسی۔ انہاں ہدایت کیتی جو مالیاتی فراڈ دی شکایت موصول تھیندے ہی فوری رسپانس دا نظام موثر بݨایا ونڄے تاں جو متعلقہ اداریں نال وقتی رابطے دے ذریعے متاثرہ شہری دی رقم کوں محفوظ بݨاوݨ تے ملزمان تئیں پڄݨ دے امکانات ودھائے ونڄ سڳن۔ محسن نقوی آکھیا جو شہری کوں شکایت درج کراوݨ دے بعد مہینے انتظار نی کرݨا چاہیدا، ہر شکایت تے وقتی پیشرفت نظر آوݨی چاہیدی اے۔ انہاں زیرِالتوا مقدمے تے شکایات دا کیس ٹو کیس جائزہ گھنݨ تے غیر ضروری تاخیر ختم کرݨ دی وی ہدایت کیتی۔ وفاقی وزیرِداخلہ ڈیجیٹل فرانزک دی استعداد ودھاوݨ، جدید فرانزک ٹولز دے استعمال تے تفتیشی افسران دی خصوصی تربیت تے زور ݙیندے آکھیا جو سائبر کرائم دے نویں طریقیں دا مقابلہ روایتی تفتیش نال نی بلکہ جدید ٹیکنالوجی تے تربیت یافتہ افرادی قوت نال کیتا ونڄ سڳدے۔ انہاں آکھیا جو این سی سی آئی اے کوں حقیقی معنے اچ پاکستان دی سائبر پولیس بݨاوݨا ہوسی جیڑھی جدید ٹیکنالوجی دے ذریعے شہریاں کوں ڈیجیٹل دنیا اچ تحفظ ݙیوے۔ انہاں شہریاں دے ڈیٹا، پرائیویسی تے مالی مفادات دے تحفظ کوں این سی سی آئی اے دی بنیادی ذمہ واری قرار ݙیندے آکھیا جو ایں مقصد کیتے ادارے کوں جدید ٹیکنالوجی، ضروری وسائل تے تربیت ݙتی ویندی پئی اے۔ وفاقی وزیرِ داخلہ تریمتاں تے ٻالاں کوں درپیش آن لائن ہراسانی، بلیک میلنگ تے ڈیجیٹل استحصال متعلق شکایات کوں خصوصی ترجیح ݙیوݨ دی ہدایت کیتی۔ انہاں سائبر کرائم توں بچݨ کیتے عوامی آگاہی مہم موثر بݨاوݨ تے شہریاں کوں آن لائن فراڈ دے نویں طریقیں دا وقتی ݙساوݨ دی وی ہدایت کیتی۔ ایں موقع تے ڈی جی این سی سی آئی اے وفاقی وزیرِ داخلہ کوں سینٹرل زون دی کارکردگی، زیرِ تفتیش مقدمات، سائبر فراڈ دے رجحانات تے جاری کارروائیاں تے بریفنگ ݙتی۔ اجلاس اچ ڈی جی ایف آئی اے، آئی جی اسلام آباد پولیس، ڈائریکٹر ایف آئی اے لاہور زون تے ٻئے متعلقہ حکام وی موجود ہن۔