وزیراعظم شہباز شریف دا عالمی یومِ سیاحت تے پیغام

اسلام آباد۔27 ستمبر (اے پی پی) وزیراعظم محمد شہباز شریف پاکستان تے دنیا اچ شعبۂ سیاحت نال جڑئے لوکاں تے سیاحواں دے ذوقِ تحقیق و تجسس تے شوقِ سیر و سفر کوں خراجِ تحسین پیش کریندے آکھیے جو سیاحت تے تفریح تے توجہ دراصل صحت مند ذہن تے خوش آئند ترجیحات دا مظہر اے۔ پاکستان بے مثال قدرتی مناظر، شاندار تہذیبی و ثقافتی ورثے، تاریخی تے مذہبی جاہواں دے نال شعبۂ سیاحت اچ روشن امکانات رکھیندے۔ وزیراعظم دفتر دے میڈیا ونگ موجب اے ڳالھ وزیراعظم محمد شہباز شریف عالمی یومِ سیاحت دے موقع تے اپݨے پیغام اچ آکھی جیڑھا اڄ منایا ویندا پئے۔ وزیراعظم آکھیا جو سیاحت دے میدان اچ دلکش قدرتی مناظر، قدیم تاریخی یادگاراں، تہذیبی ورثہ تے متنوع ثقافتی رنگ بنیادی محرکات دی حیثیت رکھیندن۔ اللہ دے فضل نال پاکستان بے مثال قدرتی مناظر، شاندار تہذیبی و ثقافتی ورثے، تاریخی تے مذہبی مقامات دے نال شعبۂ سیاحت اچ روشن امکانات رکھیندے۔ وزیراعظم آکھیا جو حکومت ملکی سیاحت دے ودھارے، سیاحتی بنیادی ڈھانچے دی بہتری تے ایں شعبے نال جڑئے مقامی آبادی تے نوجواناں کیتے روزگار و ترقی دے مواقع پیدا کرݨ کیتے کم کریندی پئی اے۔ حکومت پرعزم اے جو پاکستان کوں ہک محفوظ، پرکشش تے مسابقتی سیاحتی مقام دے طور تے دنیا دے سامݨے اجاگر کیتا ونڄے۔ وزیراعظم آکھیا جو پاکستان دا معتدل موسم، پہاڑی علاقیں دی پرفضا آب و ہوا تے خوشگوار وادیاں عالمی سیاحت کوں متوجہ کرݨ دی بھرپور صلاحیت رکھیندن۔ پاکستان دی دھرتی، وادیٔ سندھ تے گندھارا سودھے ہزاراں سال قدیم تہذیباں تے شاندار ثقافتی ورثے دی امین اے۔ مذہبی سیاحت دے حوالے نال پاکستان سکھ مت، بدھ مت تے ٻئے مذاہب دے پیروکاراں کیتے تاریخی تے اہم مقدس جاہواں دا مسکن اے۔ وزیراعظم شہباز شریف آکھیا جو ملکی سطح تے سیاحت دا ودھارا، معاشی ترقی تے ملکاں وچال چنڳے رابطیں پاروں اے تے انفرادی سطح تے کثیر الجہتی ثقافتی رنگاں نال واقفیت دراصل انسانی صلاحیتاں کوں نکھارݨ اچ اہم کردار ادا کریندی اے۔ سیاحت تے تفریح تے توجہ دراصل صحت مند ذہن تے خوش آئند ترجیحات دا مظہر اے۔ وزیراعظم آکھیا جو آؤ، اساں سارے رل تے پاکستان دے شعبۂ سیاحت دیاں بھرپور صلاحیتاں کوں بروئے کار گھن آوݨ اچ اپݨا تعمیری کردار ادا کروں تاں جو دنیا دے سامݨے اپݨی مہمان نوازی تے شاندار ثقافتی ورثے کوں اجاگر کرسڳوں