عوام کوں معیاری اتے قابل اعتماد مصنوعات ݙیوݨ یقینی بݨاوݨ اولین ترجیح اے، وفاقی وزیر خالد حسین مگسی

اسلام آباد۔22اکتوبر(اے پی پی)وفاقی وزیر سائنس و ٹیکنالوجی خالد حسین مگسی سٹیل دے شعبے اچ معیاری اتے تصدیق شدہ مصنوعات دے ودھارے کیتے حکومت دے عزم دا اعادہ کریندے آکھیا جو وزیراعظم دے وژن موجب عوام کوں معیاری اتے قابل اعتماد مصنوعات ݙیوݨ یقینی بݨاوݨ اولین ترجیح اے۔ اے ڳالھ انہاں پاکستان ایسوسی ایشن آف لارج سٹیل پروڈیوسرز دے وفد نال ملاقات اچ آکھی۔ ملاقات اچ فولاد دی صنعت اچ معیار دے یقین ݙیواوݨ دے نظام کوں تکڑا بݨاوݨ اتے صنعتی ترقی دے اقدامات تے ڳالھ مہاڑ کیتی ڳئی۔ وفاقی وزیرخالد حسین مگسی آکھیا جو فولاد دی صنعت اچ صرف معیاری اتے تصدیق شدہ مصنوعات ہی قابل قبول ہوسن۔ انہاں ایں ڳالھ تے زور ݙتا جو معیارات دے ودھارے نال نہ صرف صارفین دا تحفظ ممکن ہوسی بلکہ ملکی برآمدات اتے صنعتی مسابقت اچ وی ودھارا تھیسی۔ وزیر سائنس و ٹیکنالوجی آکھیا جو قومی صنعتاں دا استحکام اتے ترقی حکومت دی اولین ترجیح اے، کیوں جو صنعتی ترقی نال معیشت مستحکم تھیندی اے اتے روزگار دے موقع پیدا تھیندن۔ انہاں ایں ڳالھ دا اعادہ کیتا جو حکومت دا حتمی مقصد معیاری پیداوار دے ذریعے برآمدات اچ ودھارا اے۔