پی ٹی آئی دا 27 ستمبر دا لانگ مارچ ”کھٹیا پہاڑ نکلیا چوہا“ دے مترادف ثابت تھئے ”ساݙا مارچ ساݙی مرضی“ آکھݨ آلیں دا اے اے نہ مارچ اے نہ مرضی، عطاء اللہ تارڑ

اسلام آباد۔26 ستمبر (اے پی پی) وفاقی وزیرِ اطلاعات و نشریات عطاء اللہ تارڑ وزیراعظم دے کوآرڈینیٹر اختیار ولی تے سینیٹر زاہد خان دے رلے پریس کانفرنس کریندے آکھیا جو پی ٹی آئی دا 27 ستمبر دا لانگ مارچ ”کھٹیا پہاڑ نکلیا چوہا“ ثابت تھئے۔ تحریکِ انصاف دی ایں مارچ کیتے کوئی تیاری کائناں ہئی تے خیبر پختونخوا دا دورہ کرݨ نال پتہ لڳدے جو گزریل ساڈھے 13 سالاں توں صوبے اچ حکومت کرݨ آلی پارٹی اتنی سیاسی طور تے کمزور پہلے کݙاہیں نہ تھئی ہئی۔ پنج اکتوبر دی نویں تاریخ ݙیوݨ نال وی انہاں دی سیاسی نااہلی تے بزدلی تے کوئی پردہ نی پئے سڳدا۔ انہاں وزیراعظم شہباز شریف دے اقوامِ متحدہ دی جنرل اسمبلی دے خطاب دی بھرپور تعریف کیتی، جیندے اچ فلسطین اچ اسرائیلی مظالم، غزہ، شام تے لبنان دی صورتحال، کشمیر دے حقِ خودارادیت تے اسلامو فوبیا تے پاکستان دا موقف واشگاف الفاظ اچ پیش کیتا ڳیا۔ انہاں ݙسایا جو وزیراعظم دے خطاب کوں عالمی سطح تے سراہیا ڳئے جݙاں جو پاکستان فلسطین کیتے مسلسل امدادی سامان تے فلسطینی میڈیکل طلبہ کوں تعلیم دے موقع ݙے تے اپݨے عملی اقدامات دا ثبوت وی ݙیندا پئے۔ وزیرِاطلاعات خیبر پختونخوا دی صوبائی حکومت تے وزیراعلیٰ سہیل خان آفریدی کوں شدید تنقید دا نشانہ بݨیندے انہاں کوں بزدل تے سیاسی و انتظامی طور تے ناکام قرار ݙتا۔ انہاں آکھیا جو صوبائی حکومت دہشت گرداں دے خلاف کارروائیاں دی اونرشپ نی گھنݨ چاہندی تے پی ٹی آئی واحد جماعت اے جیڑھی اڄ وی دہشت گرداں دی مذمت توں گریزاں اے۔ انہاں دا آکھݨ ہئی جو صوبے اچ پولیٹیکل ٹیرر کرائم نیکسس تے بھتہ خوری چلدی پئی اے جیندے تے صوبائی حکومت دی کوئی توجہ کائنی۔ انہاں مزید آکھیا جو خیبرپختونخوا پولیس تے سیکیورٹی فورسز دے جوان مکمل عزم دے نال قربانیاں ݙیندے پئن لیکن صوبائی حکومت انہاں کوں نہ جدید آلات ݙتن تے نہ ہی سی ٹی ڈی یا فرانزک لیب دا موثر نظام بݨائے۔ گزریل 13 سالاں اچ این ایف سی ایوارڈ دے تحت لاء اینڈ آرڈر تے کاؤنٹر ٹیررازم کیتے ݙتا ڳیا ڈڈھ ݙو سو ارب روپیہ پولیس دی استعداد کار ودھاوݨ دے بجائے جلسیں تے کریناں تے خرچ کیتا ڳئے۔ انہاں واضح کیتا جو قانون دی خلاف ورزی کرݨ آلے لوکاں تے مجرماں دی گرفتاری کیتے سپیکر توں اجازت گھنݨ دیاں ڳالھیں انارکی کھنڈاوݨ دا باعث بݨسن۔ عطاء اللہ تارڑ زور ݙے تے آکھیا جو دہشت گردی دے خلاف جنگ اچ بنیادی ذمہ واری صوبائی حکومت دی اے، تے جے او غافل رہسی تاں دہشت گرداں کوں کھلی چھوٹ نی ݙتی ونڄ سڳدی جو او جیڑھا دل اچ آوے کریندے رہن، صوبائی حکومت کوں گھٹ توں گھٹ کہیں مرحلے تے انہاں دی مذمت کرݨی چاہیدی اے تے انہاں کوں نکیل پاوݨی چاہیدی اے۔