نائب وزیراعظم / وزیرخارجہ اسحاق ڈار دی صدارت اچ ہاکی دے ودھارے اتے بحالی متعلق اجلاس

اسلام آباد۔22اکتوبر(اے پی پی)نائب وزیراعظم / وزیر خارجہ محمد اسحاق ڈار آکھیے جو ہاکی قومی فخر اتے پاکستان دی شناخت دی علامت اے، ایں کھیݙ دی بحالی اتے ودھارے کیتے حکومت ہر ممکن تعاون کریسی۔ اے ڳالھ انہاں ہاکی دے ودھارے اتے بحالی متعلق اجلاس دی صدارت کریندے آکھی۔ دفتر خارجہ توں جاری بیان موجب اجلاس اچ وفاقی وزیربین الصوبائی رابطہ رانا ثناء اللہ، وفاقی وزیراطلاعات ونشریات عطا اللہ تارڑ، وزیراعظم دے معاون خصوصی مالیات طارق باجوہ، ڈائریکٹر جنرل پاکستان سپورٹس بورڈ اتے پاکستان ہاکی فیڈریشن دے سیکرٹری و نائب صدر سودھے سینئر حکام شرکت کیتی۔ اجلاس اچ پاکستان دی عالمی ہاکی اچ تاریخی عظمت کوں بحال کرݨ کیتے تلویں سطح تے کھیݙ دے ودھارے، جدید کوچنگ نظام، چنڳاں انفراسٹرکچر ݙیوݨ اتے میرٹ تے مبنی کھیݙاریاں دی ترقی جیھے اقدامات تے تفصیلی غور کیتا ڳیا۔ نائب وزیراعظم / وزیر خارجہ آکھیا جو پاکستان ہاکی دے سنہرے دور دی بحالی کیتے جامع منصوبہ بندی لازمی اے۔ انہاں متعلقہ اداریں کوں ہدایت کیتی جو ہاکی دی ترقی اتے نینگراں دی شمولیت کوں ودھارا ݙیوݨ کیتے ہک جامع بحالی روڈ میپ وقتی تیار کریسن۔ انہاں ایں عزم دا اعادہ کیتا جو حکومت ہاکی سودھے سارے قومی کھیݙاں دے ودھارے کیتے پرعزم اے اتے ایں ضمن اچ سارے ضروری وسائل بروئے کار گھن آئے ویسن۔