چیئرمین سینیٹ سید یوسف رضا گیلانی دا بیگم نصرت بھٹو دی 14ویں برسی دے موقع تے سنیھا

اسلام آباد۔23اکتوبر (اے پی پی) چیئرمین سینیٹ سید یوسف رضا گیلانی سابق خاتونِ اوّل، جمہوریت دی علمبردار اتے استقامت دی علامت بیگم نصرت بھٹو دی 14ویں برسی دے موقع تے انہاں کوں شاندار خراج عقیدت پیش کریندیں ہوئیں آپݨے سنیھے اچ آکھیا جو بیگم نصرت بھٹو دی زندگی جرأت، عزم اتے جمہوریت کیتے بے مثال قربانی توں بݨی ہوئی اے۔ خمیس کوں سینیٹ سیکرٹریٹ توں جاری بیان موجب انہاں آکھیا جو بیگم نصرت بھٹو شہید ذوالفقار علی بھٹو دا ہمیشہ ساتھ ݙتا اتے انہاں دے نال کھڑ  تے ملک دی ترقی و خوشحالی کیتے کَم کیتا، شہید ذوالفقار علی بھٹو دے بعد انہاں ظلم تے جبر دے مقابلے اچ عوام کوں حوصلہ، امید اتے قیادت فراہم کیتی، جمہوریت دی بحالی اچ انہاں دا کردار ہک روشن مثال اے۔ چیئرمین سینیٹ آکھیا جو بیگم نصرت بھٹو دی تربیت تے رہنمائی انہاں دی دھی شہید محترمہ بینظیر بھٹو سویں عظیم رہنما کوں جنم ݙتا۔ انہاں آکھیا جو بیگم نصرت بھٹو دی سیاسی جدوجہد کوں صدر مملکت آصف علی زرداری عزم و بصیرت نال اگوں وَدھایا اتے انہاں دے پُتر، چیئرمین بلاول بھٹو زرداری اج ایں مشن کوں نوجوان نسل دے جوش تے جذبے نال نویں سمت ݙیندے پئن، چیئرمین سینیٹ آپݨے سنیھے دے اختتام تے آکھیا جو بیگم نصرت بھٹو دی خدمات روشنی دا او چراغ ہن جیہڑا نسل در نسل جمہوری جدوجہد کرݨ آلیں کیتے مشعل راہ رہسی اتے انہاں دا ناں ہمیشہ قربانی، جمہوریت اتے استقلال دی علامت دے طور تے زندہ رہیسی۔