گزریل سال فریضہ حج ادا کرݨ آلے 66 ہزار 377 حاجیوں کوں 3 ارب 45 کروڑ 65 لکھ 85 ہزار روپے واپس کرݨ دا فیصلہ

اسلام آباد۔23اکتوبر (اے پی پی) وزارت مذہبی امور گزریل سال فریضہ حج ادا کرݨ آلے 66 ہزار 377 حاجیوں کوں 3 ارب 45 کروڑ 65 لکھ 85 ہزار روپے واپس کرݨ دا فیصلہ کیتے، رقماں دی منتقلی دا عمل حاجیاں دے بینک اکاؤنٹس اچ 31 اکتوبر تئیں مکمل کر ݙتا ویسی، حج 2026 کیتے 40 ݙینھ دے حج پیکیج دی رقم 11 لکھ 50 ہزار روپے جݙاں جو 25 ݙینھ دے شارٹ حج دا پیکیج 12 لکھ روپے مقرر کیتا ڳیا ۔ خمیس کوں وفاقی وزیر مذہبی امور سردار محمد یوسف وزارت مذہبی امور اچ پریس کانفرنس توں خطاب کریندیں ہوئیں آکھیا جو وزارت مذہبی امور اتے حکومت دی کوشش ہوندی اے جو حج اخراجات کوں ممکنہ حد تئیں گھٹ توں گھٹ رکھیا ونجے اتے حج انتظامات کوں چنڳا بݨایا ونجے۔ انہاں آکھیا جو گزریل سال عازمین حج کوں سعودی عرب اچ قدَم قدم تے رہنمائی ݙیوݨ کیتے حج ناظم دی سکیم منظور کیتی ڳئی، حاجیاں دے گروپ تے ہک ناظم مقرر تھیا۔ انہاں آکھیا جو حج 2025 دے دوران رہائشی عمارتاں، کھاوݨ پیوݨ، ٹرانسپورٹ سَمیت ٻئے معاملات اچ تقریباً ساݙھے تریھائی ارب روپے دی بچت کیتی ڳئی جیہڑی رقم حاجیاں کوں واپس کیتی ویندی پئی اے۔ انہاں آکھیا جو گزریل سال فریضہ حج ادا کرݨ آلے 12 ہزار 286 حاجیاں کوں 12 ہزار فی کس، 13 ہزار 939 حاجیاں کوں 25 ہزار، 8 ہزار 496 حاجیاں کوں 48 ہزار، 20 ہزار 302 حاجیاں کوں 75 ہزار، 10 ہزار 945 حاجیاں کوں 90 ہزار اتے 400 حاجیاں کوں ہِک لکھ 10 ہزار فی کس دے حساب نال رقم واپس کیتی ویندی پئی اے، اے واپسی اڄ توں شروع تھی ویسی اتے 31 اکتوبر تئیں رقماں دی واپسی دا عمل مکمل کر ݙتا ویسی۔ انہاں آکھیا جو جیہڑے حاجیاں کوں رقم واپس نئی کیتی ڳئی انہاں حجاز مقدس اچ ݙتی ڳئی ساری سہولیتاں توں مکمل استفادہ کر ڳھدا ہا، جیہڑے لوکاں کوں رقم واپس کیتی ڳئی اے اے لوک رہائشی عمارتاں، ٹرانسپورٹ اتے ٻئی سہولیتاں توں مکمل استفادہ نئی کر سڳیے ۔ انہاں آکھیا جو حج 2026 دے موقع تے وی حاجیاں کوں سفری بیگ اتے سعودی کمپنی دی موبائل فون سم ݙتی ویسی جِتھ انٹرنیٹ دے نال نال 300 توں 600 تئیں فون کالز دی سہولت وی میسر ہوسی۔ انہاں آکھیا جو حج تربیت دے نظام کوں ٻئیا بہتر بݨایا ویندا پئے۔ حج 2026 کیتے پیکیج دا اعلان کریندیں ہوئیں انہاں آکھیا جو 40 ݙینھ دے حج دا پیکیج 11 لکھ 50 ہزار اتے 25 ݙینھ دے حج دا پیکیج 12 لکھ روپے مقرر کیتا ڳئے، ایں طرح سرکاری سکیم دے سارے درخواست گزاراں کوں ساڑھے 6 لکھ روپے دی ݙوجھی قسط جمع کراوݨی پوسی۔ انہاں آکھیا جو اساں سعودی تعلیمات دے مطابق حج انتظامات کیتن، پرائیویٹ سکیم دے تحت وی حج کوٹہ تے تقریباً بکنگ مکمل تھئی ڳئی اے، وزارت مذہبی امور دی کوشش ہوندی اے جو ودھ توں ودھ لوکاں کوں حج دی سعادت مِل ونجے۔ ہک سوال دے جواب اچ سیکرٹری مذہبی امور ڈاکٹر عطاء الرحمن آکھیا جو گزریل سال حج دے موقع تے منیٰ اتے عرفات اچ چاہ تئیں ݙتی ڳئی، سارے حاجیاں کوں ٹرانسپورٹ دی سہولت میسر ہئی، جِتھ شکایتاں سݨی ویندی ہن انہاں تے کارروائی کر تے انہاں دا ازالہ وی کیتا ویندا پئے۔ انہاں آکھیا جو طبی سہولت دے نظام کوں ٻئیا بہتر بݨایا ویسی تاہم کینسر جیہڑے موذی مرض وچ مبتلا اتے شدید بیمار شخص کوں حج تے نئی ونجݨا چاہیدا۔