وفاقی حکومت ملکی اتے غیر ملکی سرمایہ کاراں دی ہکو سویں حوصلہ افزائی کریندی پئی اے، نویں کاروبار کرݨ اچ رکاوٹاں اتے مسئلے مکاوݨ حکومت دی ترجیحات اچ شامل اے، وزیراعظم محمد شہباز شریف

اسلام آباد۔23اکتوبر(اے پی پی)وزیراعظم محمد شہباز شریف آکھیے وفاقی حکومت ملکی اتے غیر ملکی سرمایہ کاراں دی ہکو سویں حوصلہ افزائی کریندی پئی اے، نویں کاروبار کرݨ اچ رکاوٹاں اتے مسئلے مکاوݨ حکومت دی ترجیحات اچ شامل اے ، برآمدات اچ ودھارا اتے نویاں صنعتاں دے قیام نال معیشت دے مثبت اشاریے دیرتئیں معاشی ترقی اچ بدالیے ونڄ سڳدن ، ملکی مصنوعات اتے ملک اچ کاروبار کوں نہ صرف علاقائی بلکہ عالمی سطح تے پرکشش بݨاوݨ حکومت دی معاشی منزل اے، وفاقی حکومت دے ادارے مجموعی معاشی ترقی کیتے ماہرین اتے کاروباری لوکاں دیاں سفارشات تے حکمت عملی اچ ٻئے بہتری گھن آسن۔ وزیراعظم دفتردے میڈیا ونگ توں جاری بیان موجب اے ڳالھ معیشت و صنعت دے مختلف شعبیں دے نمائندہ صنعتی و کاروباری شخصیات کوں آکھی جنہاں وزیراعظم نال ملاقات کیتی۔ ملاقات اچ معیشت و صنعت دے مختلف شعبہ جات دے نمائندیں آپݨے متعلقہ مسئلے اتے مختلف حکومتی اقدامات کیتے سفارشات پیش کیتیاں۔ ملاقات اچ ملکی معیشت اچ بہتری اتے سرمایہ کاری اچ ودھارے کیتے کاروباری شخصیات ولوں پیش کیتیاں ڳئیاں سفارشات دا جائزہ گھدا ڳیا۔ ملاقات اچ وفاقی وزیر خزانہ محمد اورنگزیب، وفاقی وزیر توانائی سردار اویس احمد خان لغاری، وفاقی وزیراکنامک افیئرز ڈویژن احد خان چیمہ، وفاقی وزیر ریلوے حنیف عباسی، وفاقی وزیر اطلاعات و نشریات عطاء اللہ تارڑ، وفاقی وزیر تجارت جام کمال، وفاقی وزیر قومی تحفظ خوراک رانا تنویر حسین، وفاقی وزیر انفارمیشن ٹیکنالوجی شزا فاطمہ خواجہ، وزیر مملکت خزانہ بلال اظہر کیانی اتے متعلقہ وزارتاں دے سرکاری افسراں شرکت کیتی۔ وزیراعظم سارے نمائندیں دیاں سفارشات دے تناظر اچ بہترین حکمت عملی ترتیب ݙیوݨ دی ہدایات جاری کیتیاں تاں جو ملکی معیشت کوں کاروباری حضرات دے تعاون نال دیرتئیں ترقی اتے مثبت سمت تے گامزن کیتا ونڄ سڳے۔ اجلاس اچ خاص کر صنعتی پیداوار دے خرچے گھٹ کرݨ، علاقائی سطح تے ٻئے ملکاں دیاں مصنوعات دے مقابلے اچ پرکشش بݨاوݨ اتے پاکستان اچ صنعت و تجارت اچ بین الاقوامی سرمایہ کاری دے امکانات دا تفصیلی جائزہ ڳھدا ڳیا۔ کاروباری شخصیات مختلف شعبیں اچ حکومتی اقدامات دے پیش نظر میکرو اکنامک استحکام دی تعریف کیتی اتے آکھیا جو ایں مثبت سمت اچ ٻئے مؤثر کَم کرݨ نال ملک اچ معاشی صورتحال سرمایہ کاری کیتے ٻئے سازگار بݨائی ونڄ سڳدی اے۔ وزیراعظم آکھیا جو ملکی برآمدات اچ ودھارا اتے نویاں صنعتاں دے قیام نال معیشت دے مثبت اشاریے وقتی دیرتئیں معاشی ترقی اچ بدالیے ونڄ سڳدن ۔وفاقی حکومت ملکی اتے ٻاہرلے سرمایہ کاراں دی ہکو سویں حوصلہ افزائی کریندی اے اتے نویں کاروبار کرݨ اچ سارے ممکنہ رکاوٹاں اتے مسئلے مکاوݨ حکومت دی ترجیحات اچ شامل اے۔ وزیراعظم آکھیا جو ملک اچ صنعتی و معاشی ترقی کیتے کاروباری حضرات کوں ہر طرح دی سہولت ݙیوݨ حکومت دی اولین ترجیحات اچ شامل اے، ملکی معیشت دی دیر تئیں ترقی کیتے سرکاری و نجی شعبیں دے آپت دے اتے عملی تعاون نال مثبت نتیجے حاصل کیتے ونڄ سڳدن۔ وزیراعظم آکھیا جو ملکی مصنوعات اتے ملک اچ کاروبار کوں نہ صرف علاقائی بلکہ عالمی سطح تے پرکشش بݨاوݨ حکومت دی معاشی منزل اے، ملکی مثبت معاشی اشاریے قومی ترقی و خوشحالی دی شکل اچ عوام تئیں بہم ݙیوݨ کیتے وفاقی حکومت اتے سارے متعلقہ ادارے ݙینھ رات محنت کریندے پئن ۔ وزیراعظم آکھیا جو بین الاقوامی سطح تے تجارت دے نال مصنوعات دی تیاری اتے پیداواری شعبے اچ ٻاہرلی سرمایہ کاری گھن آوݨ کیتے حکومت مؤثر اقدامات کریندی پئی اے، معاشی ترقی کیتے عالمی سطح دیاں کمپنیاں دی سرمایہ کاری دے علاوہ ملکی صنعتاں دے ودھارے کیتے بھرپور طریقے نال کَم جاری اے۔