آبادی اتے موسمیاتی خطریاں نال مؤثر طور تے نمٹیے بغیر پاکستان دی معاشی صلاحیت پوری نئیں تھی سڳدی، محمد اورنگزیب

اسلام آباد۔ ۱ دسمبر (اے پی پی) وفاقی وزیر برائے خزانہ و محصولات سینیٹر محمد اورنگزیب آکھیے جو آبادی اتے موسمیاتی خطریاں نال مؤثر طور تے نمٹیے بغیر پاکستان دی معاشی صلاحیت پوری نئیں تھی سڳدی۔ اسلام آباد اچ “پاکستان پاپولیشن سمٹ 2025” دے افتتاحی سیشن نال خطاب کریندے وزیر خزانہ آکھیا جو پاکستان کوں آبادی دے مسئلے دی نوعیت اتے اوندے اثرات دا پتا اے، پر اصل لوڑھ عملی اقدامات دی اے۔ انہاں موسمیاتی فنانسنگ دی عالمی مثال ݙیندے آکھیا جو پالیسی سازی دے نال نال بجٹ اتے منصوبہ بندی اچ ایں ترجیح کوں شامل کرݨ وزارت خزانہ دی ذمہ داری اے۔ موسمیاتی تبدیلی پہلے ای معاشی ودھارے کوں متاثر کریندی پئی اے اتے ایں سال دے سیلاب نال جی ڈی پی وچ کمی متوقع اے، ایویں ہی آبادی دا دباؤ حقیقی معاشی فائیدیاں کوں محدود کریندے۔ وزیر خزانہ ݙسایا جو عالمی بینک ولوں اپݨے کنٹری پارٹنرشپ فریم ورک دے تحت آندے ݙاہ سال تئیں سالانہ ݙو ارب ڈالر ݙیوݨ دا وعدہ کیتا ڳئے جیڑھا جو ٻالاں دی ودھوتری اچ کمی (Stunting)، تعلیمی معیار اتے موسمیاتی تبدیلی تے مرکوز ہوسی۔ انہاں آکھیا ہݨ پاکستان دی ذمہ داری اے جو او قابلِ سرمایہ کاری منصوبے تیار کرے۔ انہاں خود انحصاری دے اصول تے زور ݙیندے ہوئیں آکھیا جو پاکستان ہر بحران تے ٻاہرلی امداد کوں نی ݙیکھ سڳدا۔ انہاں آکھیا جو حالیہ سیلاب کیتے ریسکیو اتے ریلیف دے اخراجات وفاق اتے صوبیاں ولوں سانجھے طور تے بغیر ٻاہرلی امداد نال پورے کیتے ڳئن۔ وزیر خزانہ عوامی و نجی شراکت داری اتے نتیجاں تے مبنی فنڈنگ ماڈلز دا ݙسایا، اتے سوشل فنانسنگ فریم ورک اتے وقتی آوݨ آلے پاکستان سکلز بانڈ کوں نینگراں دی سکل ڈویلپمنٹ کیتے اہم پیش رفت قرار ݙتا ڳیا۔