وزیراعظم شہباز شریف دی امریکی-پاکستان بزنس کونسل تے بزنس کونسل آف انٹرنیشنل انڈرسٹینڈنگ دے مشترکہ وفد نال ملاقات

نیویارک۔25 ستمبر (اے پی پی) وزیرِاعظم محمد شہباز شریف پاکستان کوں امریکی کاروباری اداریں کیتے سرمایہ کاری دی اہم منزل قرار ݙیندے آکھیے جو قومی معیشت مستحکم تے ترقی آلے پاسے ٹردی پئی اے، پاکستان دی وݙی مارکیٹ تے نوجوان افرادی قوت ملک اچ سرمایہ کاری کیتے اہم عوامل ہن۔ امریکی کاروباری برادری بالخصوص مینوفیکچرنگ،زراعت، آئی ٹی، مصنوعی ذہانت، کان کنی تے معدنیات سودھے ٻئے شعبیں اچ سرمایہ کاری دے وسیع موقع توں فیدہ چا سڳدی اے۔ انہاں اے ڳالھ امریکی-پاکستان بزنس کونسل تے بزنس کونسل آف انٹرنیشنل انڈرسٹینڈنگ دے مشترکہ وفد کوں ملاقات اچ آکھی۔وزیراعظم وفد دا خیرمقدم کریندے آکھیا جو اے کونسلاں اسلام آباد تے واشنگٹن وچال اہم پل ہن۔ انہاں آکھیا جو امریکہ دے نال اساݙے تعلقات اچ گزریل ہک سال اچ بہتری آئی اے ایں کیتے ہݨ ویلھا آڳئے جو اساں رل تے پاکستان اچ موجود موقعیں تے سنجیدگی نال غور کروں۔ وزیراعظم آکھیا جو پاکستان اچ متنوع شعبیں اچ ٻہوں موقع تے صلاحیتاں کاروباری برادری تے سرمایہ کاراں دیاں منتظر ہن، اساں پاکستان اچ آپ دا خیرمقدم کرݨ تے سارے امور تے تفصیلی ڳالھ مہاڑ سانڳے تیار ہیسے۔وزیراعظم ݙسایا جو اساݙی معیشت ہݨ مستحکم تھیندی پئی اے تے اساں معاشی ترقی دے پاسے ودھدے پیوں، بدقسمتی نال اڄوکے خلیج بحران اساکوں اوکھ اچ پاتے تاں جو اساں اپݨے پیراں تے کھڑے تھیوݨ کیتے کوشاں ہیسے۔ انہاں آکھیا جو اساں قیامِ امن دیاں کوششاں اچ سہولت ݙیوݨ کیتے اپݨی پوری توانائی صرف کریندے پیوں۔ انہاں آکھیا جو گزریل جون اچ اساں درپیش صورتحال کوں بہتر بݨاوݨ اچ کامیاب تھئے ہاسے لیکن ایں دے بعد حالات ول خراب تھیوݨ شروع تھی ڳئے، توقع اے جو دوست ملکاں دے تعاون نال اساں ایں صورتحال کوں بہتر بݨاوݨ تے خطے اچ دیرتئیں امن قائم کرݨ اچ سرخرو تھیسوں۔وزیراعظم آکھیا جو خطے اچ امن و امان قائم رہݨ کاروبار تے سرمایہ کاری دے ودھارے کیتے ٻہوں اہم اے، اساں وݙے پیمانے تے ادارہ جاتی اصلاحات شروع کیتن، معیشت کوں ڈیجیٹائز کریندے پیوں، فیڈرل بورڈ آف ریونیو تے ای-گورننس کیتے تکھے کم جاری اے۔ انہاں زراعت سودھے ٻئے شعبیں اچ سرمایہ کاری دی نشاندہی کریندے آکھیا جو زراعت سرفہرست اے، اساں زراعت اچ مصنوعی ذہانت ہی نی بلکہ جدید ٹیکنالوجی تے جدید زرعی مشینری دے استعمال دی ڳالھ کریندوں، جنہاں اچ کمبائن ہارویسٹر تے ٻئے آلات شامل ہن تاں جو پیداوار تے کارکردگی اچ ودھارا تھیوے، خرچے گھٹ تھیون تے ہک ہک داݨے کوں محفوظ بݨایا ونڄ سڳے، اے او شعبہ اے جتھاں پاکستان کنے اڄ وی ساریں توں ودھ صلاحیت اے ۔وزیراعظم آکھیا جو کان کنی تے معدنیات دے شعبے اچ اللہ تعالی پاکستان کوں بے پناہ وسائل نال نوازیے، ایں دے علاوہ آئی ٹی تے اے آئی نال متعلقہ اقدامات ہن، اساݙی آبادی دی وݙی تعداد نوجواناں تے مشتمل اے، اساں انہاں کوں پیشہ ورانہ تربیت تے مہارت ݙے تے بااختیار بݨاوݨ دی پوری کوشش کریندے پیوں، اے نوجوان پاکستان دا وݙا اثاثہ ہن، انہاں تے توجہ ݙے تے انہاں کوں ثمر آور بݨاوݨا اے تے انہاں کیتے روزگار دے موقع ݙیوݨے ہن۔وزیراعظم اڄوکے بحران دا ذکر کریندے آکھیا جو اینکوں سامݨے رکھیندے اساکوں ٻہوں ساریاں یزاں سکھݨیاں ہوسن، پاکستان توانائی دے ذخیرے، ایندھن، گیس دے حوالے نال تحفظ تے سلامتی ݙوہیں یقینی بݨا سڳدے۔ وزیراعظم آکھیا جو ایں دے نال نال جہاز رانی تے بندرگاہواں اچ سرمایہ کاری دے وسیع موقع ہن۔ وزیراعظم شرکاء کوں آکھیا جو مذکورہ پنج ایہو جیھے شعبے ہن جنہاں کوں ترجیحی طور تے بیان کیتا ڳئے۔ انہاں آکھیا جو نجکاری دا شعبہ سرمایہ کاراں کیتے دلچسپی دا ہک ٻیا ٻہوں اہم شعبہ اے، ایں ویلھے پاکستان انٹرنیشنل ایئرلائن دی نجکاری تھی چکی اے نویں مالکان جیڑھے سارے پاکستانی ہن او ایں اچ بہتری گھن آسن۔ اساں ہک بینک دی نجکاری وی کیتی اے، اساں ہݨ بجلی دی تقسیم کار کمپنیاں دی نجکاری کرݨ ویندے پیوں، ایویں ہی سانجھی دلچسپی دے ٻہوں سارے ٻئے شعبے وی نجی شعبے دے حوالے کیتے ویندے پئن کیوں جو حکومت دا کم سہولت ݙیوݨ اے، اساں سمجھدوں جو حکومت دا کم نجی شعبے دی معاونت کیتے ہک عمل انگیز دے طور تے سازگار ماحول تے سہولت ݙیوݨ اے۔وزیراعظم دفتر دے میڈیا ونگ توں جاری بیان موجب نیویارک اچ اقوام متحدہ دی جنرل اسمبلی دے 81ویں اجلاس دے موقع تے امریکی-پاکستان بزنس کونسل تے بزنس کونسل آف انٹرنیشنل انڈرسٹینڈنگ دے مشترکہ وفد نال ملاقات اچ وزیراعظم امریکی کاروباری رہنماواں نال ڳالھ کریندے پاکستان تے امریکہ دے کاروباری شعبیں وچال طویل عرصے توں جاری تے نتیجہ خیز شراکت داری دی تعریف کیتی ۔ وزیراعظم امریکی سرمایہ کاراں کیتے پاکستان دی معیشت دے اہم شعبیں بالخصوص مینوفیکچرنگ، زراعت، آئی ٹی، مصنوعی ذہانت، کان کنی تے معدنیات سودھے ٻئے شعبیں اچ سرمایہ کاری دے وسیع موقعیں کوں اجاگر کیتا۔ وزیراعظم آکھیا جو ملک اچ کاروبار دوست ماحول دا قیام انہاں دی حکومت دی اولین ترجیحات اچ شامل اے۔ملاقات اچ پاکستان دے نال کاروباری سرگرمیاں اچ مصروف امریکی کمپنیاں بوئنگ، ایبٹ، پیپسی کو، کوکا کولا، ریسکیورٹی، ماسٹر کارڈ، این ویڈیا، ای ٹی ایس کیپیٹل، ٹی آر جی انٹرنیشنل، آرچر ڈینیئلزمڈلینڈ کمپنی، نارتھ شورمیڈیکل لیب، ریکٹ، ویزا تے ایکسیلیریٹ انرجی دے سینئر نمائندیں شرکت کیتی۔امریکی-پاکستان بزنس کونسل دی صدرایسپرانزا جیلیلیان امریکی کاروباری اداریں دے نال وزیراعظم دی مسلسل رابطہ کاری تے انہاں دا شکریہ ادا کیتا تے امریکی چیمبر آف کامرس دی طرفوں پاکستان اچ سرمایہ کاری دے موقعیں دے ودھارے کیتے منصوبیں دا وزیراعظم کوں ݙسائے۔ بزنس کونسل آف انٹرنیشنل انڈرسٹینڈنگ دے صدر پیٹر ٹچانسکی پاکستان اچ موجودہ سرمایہ کاری کوں وسعت ݙیوݨ تے نویں شراکت داری دے موقع ڳولݨ اچ بی سی آئی یو دی رکن کمپنیاں دی دلچسپی دا وزیراعظم کوں ݙسائے۔ امریکی-پاکستان بزنس کونسل تے بزنس کونسل آف انٹرنیشنل انڈرسٹینڈنگ وزیراعظم کوں یقین ݙوایا جو او تعاون دے ودھارے کیتے حکومتِ پاکستان تے نجی شعبے دے نال نیڑے رابطہ جاری رکھیسن۔وزیراعظم پاکستان کوں امریکی کاروباری اداریں کیتے ہک اہم سرمایہ کاری دی منزل قرار ݙیندے آکھیا جو پاکستان دی وݙی مارکیٹ تے نوجوان افرادی قوت ملک اچ سرمایہ کاری کیتے اہم عوامل ہن۔ امریکی-پاکستان بزنس کونسل تے بزنس کونسل آف انٹرنیشنل انڈرسٹینڈنگ دے ارکان اپݨی اپݨی ڳالھ کریندے پاکستان اچ اپݨے کاروباری مفادات، موجودہ سرگرمیاں تے ملک اچ اپݨی موجودگی کوں مزید وسعت ݙیوݨ دے منصوبیں دا وزیراعظم کوں ݙسائے۔ملاقات دے موقع تے وزیراعظم دی معاونت نائب وزیراعظم و وزیر خارجہ سینیٹر محمد اسحاق ڈار، وزیر دفاع خواجہ محمد آصف، وزیر خزانہ و محصولات محمد اورنگزیب، معاونِ خصوصی وزیراعظم طارق فاطمی، چیئرمین پی وی آر اے بلال بن ثاقب، اقوام متحدہ اچ پاکستان دے مستقل مندوب عاصم افتخار تے امریکہ اچ پاکستان دے سفیر رضوان احمد شیخ کیتی۔