وزیراعظم شہباز شریف دی متحدہ عرب امارات دے قومی ڈیہنہ دے موقع تے یو اے ای دی قیادت اتے عوام کوں دلی مبارکباد

اسلام آباد۔2 دسمبر (اے پی پی) وزیراعظم محمد شہباز شریف متحدہ عرب امارات دے قومی ڈیہنہ دے موقع تے یو اے ای دی قیادت اتے عوام کوں دلوں مبارکباد ڈتی اے۔ منگل کوں سماجی رابطے دی ویب سائٹ “ایکس” تے آپݨے بیان اچ وزیراعظم آکھیا جو پاکستان متحدہ عرب امارات نال آپݨی تریخی اتے پراݨی سانجھ کوں قدر نال ڈیکھدے جیڑھی جو آپسی عزت، سانجھے مفاد اتے ڈوہاں ملکاں دی عوام وچال تعلقات تے مبنی اے۔ انہاں آکھیا جو یو اے ای آچ رہݨ آلی متحرک پاکستانی کمیونٹی ڈوہیں ملکاں وچال ہک فخر آلا پُل دا کردار ادا کریندی پئی اے اتے متحدہ عرب امارات دی ترقی اتے کامیابی کیتے سرگرم اے۔ وزیراعظم آکھیا جو شیخ محمد بن زاید النہیان دی دانشمندانہ قیادت اچ متحدہ عرب امارات ترقی، جدیدیت اتے عالمی سطح تے اہم مقام حاصل کیتے۔ وزیراعظم اے پکا ارادہ کیتا جو ڈوہاں ملکاں وچال مختلف شعبیاں اچ تعاون کوں ٻیا مضبوط بݨایا ویسی اتے ڈو پاسے دی سانجھ کوں ڈوہیں ملکاں دے روشن اتے خوشحال مستقبل کیتے ودھایا ویسی۔