پارلیمنٹ دے سانجھے اجلاس اچ قومی اسمبلی سیکرٹریٹ ملازمین ترمیم بل 2025 متفقہ طور تے منظور

اسلام آباد۔2 دسمبر (اے پی پی) پارلیمنٹ دے سانجھے اجلاس اچ قومی اسمبلی سیکرٹریٹ ملازمین ترمیم بل 2025 متفقہ طور تے منظور کر ڳھدا ڳئے۔ ایں بل دی منظوری دے بعد قومی اسمبلی اچ ملازمین دی تعداد موجودہ اراکین قومی اسمبلی دی تعداد توں 4 گُݨا تئیں ہوسی، موجودہ کہیں ملازم کوں نوکری توں نہ کڈھیا ویسی البتہ آندے ویلھے مقررہ تعداد توں ودھ ملازمین بھرتی نہ تھی سڳسن۔ پیپلز پارٹی دے رکن قومی اسمبلی نوید قمر قومی اسمبلی سیکرٹریٹ ملازمین ترمیمی بل 2025 پیش کرݨ دی تحریک پیش کیتی۔ وفاقی وزیر پارلیمانی امور طارق فضل چوہدری بل دی حمایت کیتی۔ ایں دے بعد سپیکر ایوان دی رائے گھنݨ دے بعد متفقہ طور تے بل منظور کر ڳھدا۔ ایم این اے نوید قمر بل دے حوالے نال ایوان کوں ݙسیا جو ایں بل دے مطابق ہݨ قومی اسمبلی وچ ملازمین دی تعداد اراکین دی مجموعی تعداد توں 4 گُݨا توں ودھ نہ ہوسی۔ ایں پابندی تے عمل درآمد یقینی بݨایا ویسی پر لڳی ہوئی نوکری ختم نہ تھیوے۔ سپیکر قومی اسمبلی سردار ایاز صادق آکھیا جو سپیکر دے اختیارات گھٹ نئیں کیتے ڳئے، فنانس کمیٹی اچ مشورے دا عمل ودھایا ڳئے۔ انہاں یقین ݙیوایا جو ایں ویلھے جِتنے وی ملازمین ہن انہاں اچوں کہیں کوں نہ کڈھیا ویسی۔