وفاقی وزیرِ سائنس و ٹیکنالوجی دی کوئیکا دے صدر دی قیادت اچ کوریائی وفد نال ملاقات

اسلام آباد۔ 4 دسمبر (اے پی پی) وفاقی وزیر سائنس و ٹیکنالوجی خالد حسین مگسی نال کورین تعاون ایجنسی (کوئیکا) دے صدر چانگ وون سام دی قیادت اچ اعلیٰ سطحی کوریائی وفد ملاقات کیتی۔ ملاقات اچ پاکستان اَتے جمہوریہ کوریا وچال سائنس، ٹیکنالوجی اَتے ترقیاتی شعبیں اچ آپت دے تعاون کوں مزید ودھاوݨ تے تفصیلی ڳالھ مہاڑ تھئی۔وفاقی وزیر خالد حسین مگسی پاکستان اَتے کوریا وچال پراݨے دوستانہ تعلقات دی اہمیت کوں اُجاگر کریندے آکھیا جو ݙوہیں مُلک سائنسی ترقی، ٹیکنالوجی اَتے نویں جدت دے میدان اچ ہک ݙوجھے دے تجربیں توں بھرپور فیدہ چا سڳدن۔ انہاں امید ظاہر کیتی جو کوریا دی مہارت اَتے تعاون نال پاکستان آپݨے ترقیاتی اہداف دے حصول اچ وݙیاں کامیابیاں حاصل کریسی۔کوئیکا دے صدر چانگ وون سام پاکستان دے نال لَمبے ویلھے دی، پائیدار اَتے آپت دی شراکت داری دے عزم دا اعادہ کیتا۔ انہاں آکھیا جو کوریا ولوں ݙتی ونڄݨ آلی امداد اَتے سرمایہ کاری دا مقصد پاکستان اچ سائنس اَتے ٹیکنالوجی دے شعبے کوں مضبوط بݨاوݨا اے۔ انہاں کوریا کوں ہک مثالی شریک دار قرار ݙیندے آکھیا جو کوریا آپݨی تاریخ اچ سامݨے آوݨ آلی اوکھ دے باوجود شاندار ترقی دی مثال قائم کیتی اے۔کوئیکا صدر ایں ویلھے پاکستان کوریا ٹیسٹنگ لیبارٹری برائے پی وی ماڈیولز اَتے متعلقہ آلات دے افتتاح دے سلسلے اچ پاکستان اچ موجود ہِن۔ ملاقات اچ ݙوہیں فریقین ایں ڳالھ تے زور ݙتا جو پاکستان اَتے کوریا آپسی تعاون دے ذریعے پاکستانی عوام دے معیارِ زندگی کوں بہتر بݨاوݨ، پائیدار معاشی و سماجی ترقی اَتے اقوامِ متحدہ دے پائیدار ترقیاتی اہداف (ایس ڈی جیز) دے حصول کیتے سانجھے طور تے کم کریندے پِن۔وفاقی وزارتِ سائنس و ٹیکنالوجی اَتے کوئیکا دے درمیان سولر فوٹو وولٹائیک فیلڈ ٹیسٹنگ اَتے سولر انورٹر ٹیسٹنگ دے شعبیں اچ بین الاقوامی معیار موجب سانجھے منصوبیں تے وی ڳالھ مہاڑ تھئی۔ کوریائی وفد پاکستان اچ جاری ݙو طرفہ منصوبیں تے اطمینان دا اظہار کریندے ٹیکنالوجی اَتے نویں جدت دے شعبیں اچ تعاون مزید ودھاوݨ دے عزم دا اظہار کیتا۔