وفاقی وزیر توانائی سردار اویس احمد خان لغاری نال کینیڈین ہائی کمشنر طارق علی خاں دی قیادت اچ وفد دی ملاقات

اسلام آباد۔ 4 دسمبر (اے پی پی) وفاقی وزیر توانائی سردار اویس احمد خان لغاری نال کینیڈین ہائی کمشنر طارق علی خاں دی قیادت اچ وفد ملاقات کیتی۔ ملاقات اچ پاکستان دے توانائی دے شعبے اچ ݙو طرفہ تعاون اَتے سرمایہ کاری دے امکانات تے تفصیلی ڳالھ مہاڑ کیتی ڳئی۔ ملاقات دے دوران طارق علی خاں کینیڈین کمپنیاں دی بجلی دی پیداوار دے شعبے اچ سرمایہ کاری اچ دلچسپی دا اظہار کیتا۔ وفاقی وزیر آکھیا جو حکومت مستقبل اچ بجلی مل گھنݨ دا ارادہ نی رکھیندی۔ انہاں آکھیا جو پاکستان دے توانائی دے شعبے اچ ٹرانسمیشن، نیٹ ورک اپ گریڈیشن اَتے جدید ٹیکنالوجیز اچ سرمایہ کاری دے موقع موجود ہِن جِتھاں سرمایہ کاراں کیتے پرکشش اَتے پائیدار مُنافع دے امکانات موجود ہِن۔ وفاقی وزیر دی بریفنگ توں بعد طارق علی خاں ٹرانسمیشن سیکٹر اچ وی دلچسپی ظاہر کیتی اَتے آکھیا جو کینیڈین کمپنیاں ایں شعبے اچ وی ممکنہ سرمایہ کاری دے ماڈلز اَتے موقعیں دا تفصیلی جائزہ گھنݨ دی خواہش رکھیندن ۔ ملاقات اچ اتفاق کیتا ڳیا جو پاور ڈویژن کینیڈین اداریں دے نال ٹرانسمیشن، متبادل توانائی اَتے بیٹری انرجی سٹوریج سسٹمز سودھے او سارے منصوبے شیئر کریسی جنہاں اچ سرمایہ کاری دے امکانات موجود ہِن تاں جو عملی پیشرفت کوں تکھا کیتا ونڄ سڳے۔ سردار اویس لغاری پاکستان اچ مسابقتی بجلی دی منڈی دی طرف منتقلی دا ذکر کریندے ݙسیا جو مستقبل اچ حکومتی پاور پرچیز ماڈل ختم تھی ویسی جیں توں بعد نجی شعبے کیتے زیادہ موقع پیدا تھیسن۔ انہاں آکھیا جو پاکستان بزنس کونسل وی ٹرانسمیشن اچ پی پی پی ماڈل دے تحت سرمایہ کاری اچ دلچسپی رکھیندی اے جیڑھی کینیڈین کمپنیاں دے نال سانجھ دے نویں رستے کھول سڳدی اے۔ وفاقی وزیر گلگت بلتستان اچ جاری یوٹیلٹی سکیل سولر پروجیکٹ دا ذکر کریندے ݙسیا جو ایں منصوبے دی سٹڈی جلدی پُوری تھی ویسی اَتے 4 توں 5 جاہواں تے تقریباً 85 میگاواٹ دی لوڑھ موجود اے جو سرمایہ کاری کیتے ہک وݙا موقع اے۔ انہاں گوادر اچ توانائی دے انفراسٹرکچر اَتے ترقیاتی منصوبیں اچ سرمایہ کاری دی موجودہ گنجائش توں وی وفد کوں آگاہ کیتا۔ اویس لغاری آکھیا جو حکومت گھٹ لاڳت دے اصول دے تحت سارے مستقبل دے منصوبے شفاف بُنیاداں تے اگوں ودھیندی پئی اے اَتے بیٹری انرجی سٹوریج سسٹمز اچ سرمایہ کاری دے وسیع امکانات موجود ہِن۔ ملاقات اچ ایں ڳالھ تے اتفاق کیتا ڳیا جو پاکستان اچ توانائی دے شعبے اچ کینیڈین سرمایہ کاری کوں ودھاوݨ کیتے نیڑے رابطہ، تکنیکی تعاون اَتے منصوبیں دی تفصیلات دے تبادلے دا سلسلہ جاری رکھیا ویسی۔