وفاقی وزیر انسانی حقوق سینیٹر اعظم نذیر تارڑ نال فرانس دے سفیر نیکولس گالے دی ملاقات

اسلام آباد۔ 4 دسمبر (اے پی پی) وفاقی وزیر انسانی حقوق، سینیٹر اعظم نذیر تارڑ نال فرانس دے سفیر نیکولس گالے وزارت انسانی حقوق دفتر اچ ملاقات کیتی۔ ملاقات اچ انسانی حقوق دے ودھارے اَتے مضبوطی دے حوالے نال ݙو طرفہ تعاون دے امکانات تے ڳالھ مہاڑ کیتی ڳئی۔ وزارت توں جاری پریس ریلیز موجب ملاقات دے دوران وفاقی وزیر مُلک اچ انسانی حقوق دے شعبے اچ اڄوکی پیشرفت تے روشنی پاتی اَتے آکھیا جو حقوق انسانی دیاں خلاف ورزیاں اچ صاف کمی آئی اے اَتے اداریں دی کارکردگی اَتے جوابدہی دے نظام اچ بہتری ݙیکھݨ اچ آئی اے۔ وزارت انسانی حقوق متعلقہ اداریں دے نال رَل تے قانونی تحفظات کوں مضبوط بݨاوݨ اَتے شکایتاں دے اَزالے دے نظام کوں موثر بݨاوݨ کیتے اقدامات کریندی پئی اے۔وفاقی وزیر قانونی اصلاحات دی تفصیلات ݙسیندے آکھیا جو فوجداری ضابطے اچ ٻہوں ساریاں ترمیمیاں کیتیاں ڳئن جنہاں دا مقصد عوام کیتے انصاف تئیں سوکھی رساٸی کوں پکا بݨاوݨ اَتے حکومت دے قانونی جدیدکاری اَتے شفاف حکمرانی دے عزم کوں ظاہر کرݨا اے۔ انہاں ݙسیا جو پارلیمنٹ اچ کجھ جرائم کیتے موت دی سزا دے بدل دے طور تے عمر قید دے لاگو کرݨ تے غور جاری اے جیڑھا عالمی انسانی حقوق دے معیار موجب مُلکی قوانین کوں ہم آہنگ کرݨ دیاں کوششاں دی عکاسی کریندے۔وفاقی وزیر آکھیا جو پاکستان عالمی تجارتی مراعات دے پروگرام دے نال وابستہ رہندے حکمرانی اچ اصلاحات، ادارہ جاتی مضبوطی اَتے پائیدار ترقی دے عمل اچ نمایاں کردار ادا کریندا پئے ۔ انہاں آکھیا جو اے اقدامات انسانی حقوق دے تحفظ اَتے مُلکی قوانین کوں بین الاقوامی معیار موجب کرݨ اچ اہمیت رکھیندن۔ انہاں پاکستان دے اڄوکے انتخاب کوں اقوام متحدہ دی انسانی حقوق کونسل اچ عالمی اعتماد دی علامت قرار ݙتا۔وفاقی وزیر آزاد کمیشناں دے کردار کوں وی اُجاگر کیتا جنہاں اچ قومی کمیشن انسانی حقوق، قومی کمیشن وقار نسواں، قومی کمیشن حقوق اطفال اَتے صحافیاں دے تحفظ دا کمیشن شامل ہِن۔ سینیٹر اعظم نذیر تارڑ آکھیا جو قومی کمیشن انسانی حقوق دی بین الاقوامی اداریں دے تحت ’’اے درجے‘‘ دی سند پاکستان دی انسانی حقوق دے حوالے نال عالمی معیار دے عزم دی عکاسی کریندی اے۔وفاقی وزیر نیشنل کمیشن اقلیتاں دے ٻل دی اڄوکی منظوری دا ذکر کیتا جیں کوں فرانسیسی سفیر اقلیتاں دے حقوق دے تحفظ کیتے مثبت اقدام قرار ݙتا۔ وفاقی وزیر قوانین دے غلط استعمال، بشمول توہین رسالت قانون، دے حوالے نال جامع طریقہ کار دی تیاری تے زور ݙتا جو تحقیقات، گواہیں دے تحفظ اَتے غیر جانبدار قانونی کارروائی دے ذریعے انصاف کوں پکا بݨاوݨ اَتے کمزور طبقیں دے حقوق دا تحفظ کرن۔فرانسیسی سفیر پاکستان دیاں کوششاں دی تعریف کیتی اَتے قانونی اصلاحات اَتے ادارہ جاتی اقدامات اچ پیشرفت دا خیرمقدم کیتا۔ ملاقات دے مُکݨ تے ݙوہیں فریقین انسانی حقوق، قانونی اصلاحات اَتے جامع پالیسی دے ودھارے کیتے نیڑے تعاون جاری رکھݨ تے اتفاق کیتا۔