وفاقی وزیر قومی غذائی تحفظ و تحقیق دی روم اچ اٹلی دے وزیر زراعت، فوڈ سَوورینٹی اَتے فاریسٹری نال ملاقات

روم۔ 4 دسمبر (اے پی پی) وفاقی وزیرقومی غذائی تحفظ و تحقیق رانا تنویر حسین روم اچ اٹلی دے وزیر زراعت، فوڈ سَوورینٹی اَتے فاریسٹری فرانچیسکو لولوبریجیدا نال ملاقات کیتی۔ اے ملاقات وفاقی وزیر دے اٹلی دے دورے دے دوران تھئی جِتھاں او ایف اے او کونسل اچ پاکستان دی نمائندگی کریندے پِن۔ وزارتِ قومی غذائی تحفظ و تحقیق ولّوں جاری اعلامیہ موجب ملاقات دے دوران ݙوہیں رہنماواں ݙوہیں مُلکاں دے پراݨے دوستانہ تعلقات تے اطمینان دا اظہار کیتا اَتے زراعت اَتے غذائی تحفظ دے شعبیں اچ مزید عملی اَتے مضبوط شراکت داری دے عزم دا اعادہ وی کیتا۔ݙوہیں وزیراں زیتون دے جاری منصوبیں تے پیشرفت دا جائزہ ڳھدا جنہاں اچ اطالوی ایجنسی ترقیاتی تعاون (اے آئی سی ایس) دے تعاون نال چلݨ آلا ’’اولیو کلچر سکیل اَپ پراجیکٹ‘‘ شامل اے۔ اے پروگرام ’’اولیو کلچر پراجیکٹ‘‘ (2022–2024) اَتے ’’پاکستان اچ تجارتی پیمانے تے زیتون دی کاشت دے ودھارے‘‘ (فیز II، 2021–2026) دی کامیابی تے قائم اے۔ رانا تنویر حسین اٹلی دی لگاتار تکنیکی معاونت تے اظہار تشکر کیتا اَتے جدید زرعی مشینری، تحقیق اَتے اعلیٰ معیار دی زیتون دے تیل دے کڈھݨ دیاں تکنیکاں اچ مزید تعاون دی درخواست کیتی۔ملاقات دے دوران ݙوہیں وزیراں مئی 2025 اچ مزدوراں نال متعلق دستخط کیتے ڳئے مفاہمتی یادداشت کوں وی ݙو طرفہ تعاون دے ودھارے اچ ہک اہم قدم قرار ݙتا۔ وزیر لولوبریجیدا امید ظاہر کیتی جو ’’پروفیشنل کیپسٹی بلڈنگ اَتے زرعی توسیع‘‘متعلق مجوزہ مفاہمتی یادداشت جو زرعی مہارتاں کوں تکنیکی و پیشہ ورانہ تربیت دے ذریعے مضبوط بݨاوݨ کیتے تیار کیتی ویندی پئی اے، جلدی حتمی شکل پاتے دستخط تھی ویسی۔ انہاں ݙسیا جو اطالوی ٹریڈ ایجنسی جیں 2023 دے وچال اسلام آباد اچ آپݨاں دفتر قائم کیتا، باغبانی دے شعبے کیتے 2 کروڑ یورو مالیت دا منصوبہ سپانسر کریندی پئی اے جیں دا مقصد پاکستانی افرادی قوت کیتے مقامی اَتے ٻاہرلے روزگار دے موقعیں کوں مزید بہتر بݨاوݨا اے۔اطالوی وزیر آپݨے پاکستانی ہم منصب کوں ایں نظام توں وی آگاہ کیتا جو اٹلی اچ زیتون دے تیل دی پُوری پیداواری زنجیر دے دوران معیار کوں پکا بݨاوݨ کیتے استعمال تھیندے اَتے آکھیا جو انہاں دا ادارہ ایں شعبے اچ آپݨا تجربہ پاکستان دے نال شیئر کرݨ کیتے تیار اے۔ انہاں تحقیق، مشینی زراعت اَتے جدید زیتون دے تیل دے کڈھݨ دے سلسلے اچ تعاون کوں اگوں ودھاوݨ کیتے ݙوہیں وزارتاں وچال ہک سانجھا تکنیکی گروپ بݨاوݨ دی تجویز پیش کیتی اَتے ݙسیا جو اٹلی ایں موضوع تے ہک اضافی مفاہمتی یادداشت وی پیش کریسی، جیں کوں ترجیحی بنیاداں تے پُورا کیتا ویسی۔وفاقی وزیر رانا تنویر حسین آپݨے اطالوی ہم منصب کوں پاکستان دی ’’اولیو ویلیو چین پالیسی‘‘ تے تھیوݨ آلی پیشرفت توں آگاہ کیتا جو وزیراعظم محمد شہباز شریف دی خصوصی سرپرستی اچ تیار کیتی ویندی پئی اے۔ انہاں بلوچستان اچ رہائی ڳئی اربیکینا قسم دے ’’لورالائی اولیو‘‘ دی نمایاں کامیابی دا وی ذکر کیتا، جیں مئی 2025 اچ نیویارک انٹرنیشنل اولیو آئل کمپٹیشن اچ 1200 توں ودھ عالمی برانڈز دے مقابلے اچ سلور میڈل جتیا۔ انہاں وزیر لولوبریجیدا کوں اڳلے سال دی پہلی سہ ماہی اچ پاکستان دے دورے دی دعوت ݙتی تاں جو مجوزہ مفاہمتی یادداشتاں تے دستخط کیتے ونڄ سڳن اَتے آکھیا جو ایں دورے نال ݙو طرفہ تعاون کوں مزید مضبوطی مِل ویسی۔ انہاں 6ویں مشترکہ اقتصادی کمیشن اَتے لیبر معاہدے دے تحت ݙوجھے مشترکہ ورکنگ گروپ دے اجلاس دی میزبانی کیتے وی آمادگی ظاہر کیتی جݙاں جو پہلا جے ڈبلیو جی اجلاس 15 ستمبر 2025 کوں روم اچ منعقد تھیا ہئی۔ملاقات دے مُکݨ تے ݙوہیں وزیراں ایں عزم دا اعادہ کیتا جو او آپسی تعاون کوں جاری رکھیندے پاکستان کوں اعلیٰ معیار دے زیتون دے تیل دی پیداوار اَتے برآمد دے قابل بݨاوݨ کیتے سانجھیاں کوششاں کریندے رہسن اَتے ایں مقصد کیتے اٹلی دے تجربے اَتے تکنیکی مہارت توں بھرپور فیدہ چاتا ویسی۔