چیئرمین سینیٹ نال کرغزستان دے صدر دی ملاقات

اسلام آباد۔ 4 دسمبر(اے پی پی) چیئرمین سینیٹ سید یوسف رضا گیلانی کرغزستان دے نال اعتماد، علاقائی استحکام اَتے امن و خوشحالی دے سانجھے عزم تے مبنی دیرپا سٹریٹجک شراکت داری دے قیام کیتے پاکستان دے غیر متزلزل عزم دا اعادہ کیتے اَتے آکھیے جو ݙو طرفہ سیاسی مشاورت اَتے مشترکہ وزارتی کمیشن جیھے میکنزم وپار، رابطیں، صحت، تعلیم، توانائی، سیاحت اَتے ٹیکنالوجی سودھے ٻئے شعبیں اچ تعاون کوں ودھاوݨ کیتے موثر فریم ورک مہیا کریندن۔ سینیٹ سیکرٹریٹ توں جاری بیان موجب چیئرمین سینیٹ سید یوسف رضا گیلانی نال صدر کرغزستان صادر ژپاروف اِتھاں ملاقات کیتی اَتے آپسی دلچسپی، ݙو طرفہ اہمیت اَتے کثیر الجہتی تعاون نال متعلق امور تے ڳالھ مہاڑ کیتی۔ ملاقات دے دوران سپیکر قومی اسمبلی سردار ایاز صادق، سینیٹر کامل علی آغا، سیکرٹری سینیٹ سید حسنین حیدر اَتے چیئرمین سینیٹ دی مشیر، سفیرآئی ایس سی مصباح کھر وی موجود ہن۔چیئرمین سینیٹ علاقائی تعاون کوں مضبوط بݨاوݨ کیتے بین الپارلیمانی رابطیں دے ودھارے دے حوالے نال پاکستان دے عزم دا اعادہ کیتا۔ ݙوہیں فریقاں ݙو طرفہ تعلقات دے سارے رُخ دا جائزہ ڳھدا، خاص طور تے وپار، سرمایہ کاری، مختلف شعبیں اچ تعاون، علاقائی رابطیں اَتے عوامی سطح تے تبادلیں کوں مزید ودھاوݨ تے توجہ ݙتی۔ چیئرمین سینیٹ کرغزستان دی سپریم کونسل دے نال پارلیمانی تعاون کوں مزید مضبوط بݨاوݨ دے عزم دا اظہار کیتا جیں اچ فرینڈشپ گروپس، ادارہ جاتی ڳالھ مہاڑ اَتے تبادلہ پروگرام شامل ہن۔سید یوسف رضا گیلانی کرغز صدر کوں جی آیاں آکھدے ہوئیں آکھیا جو پاکستان اَتے کرغزستان وچال دوستی گھاٹے سانجھے اقدار، ثقافتی ، اسلامی ورثے اَتے آپت دے احترام دی لَمبی تاریخ تے مبنی اے۔ انہاں ݙوہیں بھرا آلے مُلکاں دے مضبوط سیاسی تعلقات دا ذکر کیتا جو اعلیٰ سطحی رابطیں اَتے اقوام متحدہ، او آئی سی، ای سی او اَتے ایس سی او سودھے مختلف بین الاقوامی فورمز تے تعاون دے ذریعے مزید مستحکم تھئن۔ انہاں آکھیا جو ݙو طرفہ سیاسی مشاورت (بی پی سی) اَتے مشترکہ وزارتی کمیشن (جے ایم سی) جیھے میکنزم وپار، رابطیں، صحت، تعلیم، توانائی، سیاحت اَتے ٹیکنالوجی سودھے ٻئے شعبیں اچ تعاون کوں ودھاوݨ کیتے موثر فریم ورک مہیا کریندن۔آپسی تعلقات دیاں اہم تاریخی جھلکیاں کوں یاد کریندے چیئرمین سینیٹ 1995ء اچ شہید محترمہ بے نظیر بھٹو دے کرغزستان دے تاریخی دورے، 2010ء اچ صدر آصف علی زرداری دی کرغز قیادت نال ملاقات اَتے 2011ء اچ آپݨے وزارت عظمیٰ دے دور اچ بشکیک دے سرکاری دورے دا ذکر کیتا جیں دوران وپار، عسکری تربیت اَتے مشترکہ بزنس کونسل دے قیام متعلق اہم معاہدے تھئن۔ انہاں تاشقند اچ آئی پی یو اسمبلی دے دوران کرغز پارلیمنٹ دے سپیکر نال آپݨے اڄوکےملاقات دا وی حوالہ ݙتا جیں نال پارلیمانی تعلقات کوں مزید وسعت ملی۔چیئرمین سینیٹ ای سی او اَتے او آئی سی دے پلیٹ فارمز تے بین الپارلیمانی اقدامات اچ کرغزستان دے تعمیری کرداردی تعریف کیتی۔ نومبر 2025ء اچ اسلام آباد اچ منعقدہ بین الپارلیمانی سپیکرز کانفرنس (آئی ایس سی) دی کامیابی دا ذکر کریندے انہاں ’’اسلام آباد کمیونیک‘‘ دی منظوری کوں عالمی پارلیمانی سفارتکاری کوں مضبوط بݨاوݨ دی اہم پیشرفت قرار ݙتا۔ انہاں کرغزستان دے وفد دی فعال شرکت تے شکریہ ادا کریندے آکھیا جو کانفرنس دا موضوع ’’امن، سلامتی اَتے ترقی‘‘ اڄ دنیا کوں سامݨے آوݨ آلے وݙے چیلنجز دی عکاسی کریندے۔ انہاں ݙسیا جو اسلام آباد اچ کانفرنس دے دوران خودکش دھماکے دے باوجود سارے مندوبین پاکستان اچ کانفرنس دے مُکݨ تئیں موجود رہے جو جمہوریت دی مضبوطی دی نشانی اے۔ توانائی دے شعبے تے ڳالھ مہاڑ کریندے انہاں CASA-1000 منصوبے کوں وسطی اَتے جنوبی ایشیا کوں صاف توانائی نال جوڑݨ آلا ہک نمایاں منصوبہ قرار ݙتا۔ انہاں دفاع، دہشت گردی دے خلاف کارروائی، سائنسی تحقیق اَتے اعلیٰ تعلیم دے شعبیں اچ تعاون ودھاوݨ دی خواہش دا اظہار کریندے آکھیا جو ایں ویلھے کرغزستان اچ زیر تعلیم 18 ہزار توں ودھ پاکستانی طلباء ݙوہیں مُلکاں وچال ہک مضبوط پُل دا کردار ادا کریندے پِن۔ انہاں سیاحت، ثقافتی تبادلے، سِدھے فضائی رابطیں اَتے ویزا اچ سوکھ دے وسیع موقعیں دا وی ذکر کیتا اَتے آکھیا جو عوامی سطح تے رابطے ݙو طرفہ تعلقات کوں مضبوط بݨاوݨ کیتے ٻہوں اہم ہِن۔سید یوسف رضا گیلانی کرغزستان دے نال اعتماد، علاقائی استحکام اَتے امن و خوشحالی دے سانجھے عزم تے مبنی دیرپا سٹریٹجک شراکت داری دے قیام کیتے پاکستان دے غیر متزلزل عزم دا اعادہ کیتا۔ صدر صادر ژپاروف پاکستان دے نال سفارتی اَتے اقتصادی تعاون کوں مزید وسعت ݙیوݨ دی خواہش دا اظہار کیتا۔ انہاں وپار اَتے سرمایہ کاری کوں مزید مضبوط بݨاوݨ دے عزم دا اعادہ کیتا اَتے ݙوہیں مُلکاں دے متعلقہ اداریں وچال نیڑے ہم آہنگی دی لوڑھ تے زور ݙتا۔ انہاں بین الاقوامی فورمز تے پاکستان دے موقف دی بھرپور حمایت دا یقین ݙویندے پاکستان کرغزستان تعلقات دے روشن مستقبل تے اعتماد دا اظہارکیتا۔ سپیکر قومی اسمبلی سردار ایاز صادق ݙوہیں مُلکاں وچال پارلیمانی، سفارتی اَتے اقتصادی تعاون دے ودھارے دی اہمیت تے روشنی پاتی۔