یارہویں قومی مالیاتی کمیشن دا افتتاحی اجلاس، شرکاء دا مستقبل دے اجلاساں دے شیڈول اَتے مخصوص امور کیتے تکنیکی ذیلی گروپس بݨاوݨ تے اتفاق

اسلام آباد۔ 4 دسمبر (اے پی پی) 11ویں قومی مالیاتی کمیشن (این ایف سی) دے افتتاحی اجلاس دے شرکاء پاکستان دے عوام کیتے منصفانہ اَتے پائیدار این ایف سی ایوارڈ تشکیل ݙیوݨ کیتے ایوارڈ دے عمل کوں شفافیت، پیشہ ورانہ انداز، آپسی احترام اَتے تعاون دے نال اگوں ودھاوݨ دے عزم دا اظہار کیتے۔ 11ویں قومی مالیاتی کمیشن (این ایف سی) دا افتتاحی اجلاس خمیس کوں اِتھاں وفاقی وزیرِ خزانہ و محصولات سینیٹر محمد اورنگزیب دی صدارت اچ وزارت خزانہ اچ منعقد تھیا۔ اجلاس اچ سندھ توں وزیراعلیٰ سید مراد علی شاہ اَتے ڈاکٹر اسد سعید (رُکن ایف ایف سی)، خیبر پختونخوا توں وزیراعلیٰ محمد سہیل آفریدی اَتے ڈاکٹر مشرف رسول سائیں، پنجاب توں وزیر خزانہ میاں مجتبیٰ شجاع الرحمن اَتے ناصر محمود کھوسہ، بلوچستان توں وزیر خزانہ میر شعیب نوشیروانی اَتے محفوظ علی خان شرکت کیتی۔ ایں توں علاوہ خیبر پختونخوا کیتے وزیراعلیٰ دے مشیر خزانہ مزمل اسلم وی خصوصی طور تے سݙئے ڳئے ہن۔ چارے صوبیں دے سیکرٹری خزانہ وی اجلاس اچ موجود ہن۔ اجلاس دا آغاز تلاوت قرآن پاک توں تھیا۔وزیر خزانہ سینیٹر محمد اورنگزیب سارے شرکاء دا خیرمقدم کریندے این ایف سی دی آئینی اہمیت اَتے آپسی تعاون دی لوڑھ تے زور ݙتا۔ انہاں ݙسیا جو وزیراعظم دی ہدایت تے وفاق کوشش کیتی اے جو 11ویں این ایف سی دا پہلا اجلاس فوراً سݙیا ونڄے، اگرچہ تباہ کُن چھل پاروں اجلاس موخر کرݨا پیا لیکن اڄ دا اجلاس ایں ڳالھ دا اظہار اے جو سارے فریقین آپݨے آئینی ذمے واری پُوری کرݨ کیتے پُرعزم ہِن۔ انہاں ایں ڳالھ دا اعادہ کیتا جو وفاقی حکومت شفاف اَتے مخلصانہ ڳالھ مہاڑ کیتے حاضر اے اَتے صوبیں دے موقف کوں سُݨݨ اَتے قومی مفاد اچ رَل تے کم کرݨ کیتے پُرعزم اے۔ وزیرِ خزانہ صوبیں ولوں قومی مالیاتی معاہدہ تے دستخط اچ تعاون اَتے آئی ایم ایف دے تقاضیں موجب مالی سرپلس ݙیوݨ دیاں کوششاں دی تعریف کیتی۔وزیراعلیٰ سندھ سید مراد علی شاہ وفاق دا شکریہ ادا کریندے آکھیا جو چھل دے باوجود 11ویں این ایف سی دا اجلاس جلدی منعقد کیتا ڳئے۔ انہاں آکھیا جو سندھ پاکستان دی ترقی، اتحاد اَتے خوشحالی کیتے مکمل طور تے پُرعزم اے اَتے اتفاق رائے صرف ایں فورم اچ ڳالھ مہاڑ دے ذریعے پیدا تھی سڳدے۔ وزیراعلیٰ خیبر پختونخوا سہیل آفریدی وی وفاق دا شکریہ ادا کیتا اَتے آکھیا جو مضبوط صوبے اَتے مضبوط وفاق ہی ہک مضبوط پاکستان دی ضمانت ہِن۔ انہاں دہشت گردی جیں اچ بدقسمتی نال ولوں ودھارا تھئے، دے خلاف خیبر پختونخوا دے عوام دیاں قربانیاں دا ذکر کیتا اَتے امید ظاہر کیتی جو 11ویں قومی مالیاتی کمیشن (این ایف سی) توں جون 2018ء توں 7ویں این ایف سی دی قانونی حداں توں ودھ ونجݨ دے معاملے حل تھیسن اَتے خیبر پختونخوا دے نویں ضم شدہ ضلعیں دی آبادی اَتے ٻئے عناصرکوں شامل کرتے صوبے دے حصے کوں اپ ڈیٹ کیتا ویسی تاںجو انہاں کوں مناسب نمائندگی ݙتی ونڄ سڳے۔ انہاں ایں ضمن اچ ٻئے صوبیں توں مثبت ردعمل دی وی درخواست کیتی۔ انہاں ایں ڳالھ تے زور ݙتا جو خیبر پختونخوا دے پُورے صوبے کوں شامل کرتے 7ویں این ایف سی ایوارڈ کوں آئین موجب گھن آوݨ ضروری اے۔پنجاب دے وزیر خزانہ میاں مجتبیٰ شجاع الرحمن آکھیا جو اتفاقِ رائے ضروری اے اَتے ایں کیتے ساریں کوں محنت کرݨی ہوسی۔ انہاں وسائل دی صاف شفاف ونڈ اَتے وفاق و صوبیں دے درمیان پالیسی دے تسلسل تے زور ݙتا۔ وزیرخزانہ بلوچستان میر شعیب نوشیروانی آکھیا جو بلوچستان ہمیشہ وفاق اَتے صوبیں دے نال تعاون کریندا آئے اَتے اے سلسلہ آئند وی جاری رہسی۔ انہاں سوئی گیس، ریکو ڈیک اَتے سیندک جیھے منصوبیں دا حوالہ ݙیندے بلوچستان دے کردار کوں اُجاگر کیتا۔اجلاس اچ 11ویں این ایف سی ایوارڈ دی حکمت عملی تے عمومی ڳالھ مہاڑ تھئی۔ ایں توں بعد چارے صوبیں اَتے وفاق آپݨے مالیاتی حالات اَتے ترجیحات نال متعلق تفصیلی پریزینٹیشنز ݙتیاں۔ شرکاء مستقبل دے اجلاساں دے شیڈول تے وی اتفاق کیتا اَتے فیصلہ کیتا جو مخصوص امور کیتے تکنیکی ذیلی گروپس بݨائے ویسن۔ اجلاس اچ فیصلہ کیتا ڳیا جو سابق فاٹا/ضم شدہ ضلعیں دے حصے نال متعلق ہک ذیلی گروپ تشکیل ݙتا ویسی جو جنوری 2026ء دے وچال آپݨیاں سفارشاں پیش کریسی۔ اجلاس ایں عزم دے نال مُک ڳئے جو 11ویں این ایف سی دے عمل کوں شفافیت، پیشہ ورانہ انداز، آپسی احترام اَتے تعاون دے نال اگوں ودھایا ویسی تاں جو پاکستان دے عوام کیتے ہک منصفانہ اَتے پائیدار این ایف سی ایوارڈ تشکیل ݙتا ونڄ سڳے۔