کہیں قیدی نال سیاسی ڳالھ مہاڑ دی اجازت نی ہوندی، بانی پی ٹی آئی نال ملاقاتاں اچ سیاسی معاملیں تے ڳالھ مہاڑ، ریاست دے خلاف لوکاں کوں اُکساوݨ جیھاں سرگرمیاں رپورٹ تھی ڳئن، قانون دی خلاف ورزی کرݨ آلے دی ملاقات بند کر ݙتی ویسی، عطاء اللہ تارڑ

اسلام آباد۔ 4 دسمبر (اے پی پی) وفاقی وزیر اطلاعات و نشریات عطاء اللہ تارڑ آکھیے کہیں قیدی نال سیاسی ڳالھ مہاڑ دی اجازت نی ہوندی، بانی پی ٹی آئی نال ملاقاتاں اچ سیاسی معاملیں تے ڳالھ مہاڑ، ریاست دے خلاف لوکاں کوں اُکساوݨ جیھاں سرگرمیاں رپورٹ تھی ڳئن ۔ قانون دی خلاف ورزی کرݨ آلیاں دی ملاقات بند کر ݙتی ویسی، جے جیل دے ٻاہر امن و امان دی صورتحال خراب کرݨ دی کوشش کیتی ڳئی تاں اوں دا سختی نال نوٹس ڳھدا ویسی۔ پی ٹی وی ہیڈ کوارٹرز اچ وفاقی وزیر قانون اعظم نذیر تارڑ دے نال پریس کانفرنس توں خطاب کریندے وفاقی وزیر اطلاعات آکھیا جو بانی پی ٹی آئی 190 ملین پاؤنڈ دے میگا کرپشن کیس اچ سزا یافتہ قیدی ہِن۔انہاں آکھیا جو پی ٹی آئی دی ہک تِرَیمت رہنما بھارتی اَتے افغان میڈیا تے اے تاثر ݙتا جو بانی پی ٹی آئی دی جان کوں خطرہ اے حالانکہ بانی پی ٹی آئی کوں جیل اچ او سہولتاں مِلیاں ہوئیاں ہِن جیڑھیاں کہیں عام قیدی کوں دستیاب نی ، کہیں قیدی کوں ٹریڈ مل اَتے سائیکل جیھاں سہولتاں کݙاہیں نی ݙتیاں ڳئیاں۔ بانی پی ٹی آئی روزانہ ݙڈھ گھنٹہ ٹریڈ مل استعمال کریندن جݙاں جو ہک پاسے عالمی میڈیا تے اے پروپیگنڈا کیتا ویندا پئے جو انہاں دی جان کوں خطرہ اے، ایں دا مقصد پاکستان دی حکومت اَتے اداریں کوں بدنام کرݨا اے۔ وفاقی وزیر آکھیا جو بانی پی ٹی آئی دا سویرے دا ناشتہ ہک غریب آدمی دی ہفتہ بھر دی خوراک دے برابر اے جݙاں جو مُلکی تاریخ اچ کݙاہیں کہیں قیدی کوں ایں نوعیت دیاں سہولتاں نی مِلیاں۔انہاں آکھیا جو بانی پی ٹی آئی آپݨے دور اچ مُنہ تے ہتھ پھیر تے اے آکھیا ہئی جو “میں انہاں دے اے سی لہویساں” بانی پی ٹی آئی ایں حد تئیں ڳئے جو آپݨے سیاسی مخالفت اچ اے تئیں آکھیا جو مخالف دی دھی کوں اوں دے سامݨے گرفتار کرو تاں جو انہاں کوں تکلیف پُڄے، اے ساریاں ڳالھیں جیں لہجے، انداز اَتے غرور و تکبر نال آکھیاں ڳئیاں، انہاں تے انہاں کوں اللہ تعالیٰ توں معافی منڳݨی چاہیدی اے۔ وفاقی وزیر آکھیا جو بانی پی ٹی آئی دیاں ترائی بھیݨاں نو مئی کوں کور کمانڈر ہاؤس دے ٻاہر موجود ہن اَتے انہاں دی موجودگی دے ثبوت وی موجود ہِن۔ ہݨ اے مسلسل اڈیالہ جیل اچ امن و امان خراب کرݨ دی کوشش کریندیاں پئن ۔ انہاں آکھیا جو قواعد موجب کہیں قیدی نال سیاسی نوعیت دی ڳالھ مہاڑ دی اجازت نی ہوندی اَتے اے رپورٹ کیتا ڳیا جو ملاقات دے دوران سیاسی ڳالھ مہاڑ تھئی، ایں واسطے اڄ توں بعد عظمیٰ خان دی ملاقات تے وی پابندی اے۔ انہاں آکھیا جو سیاسی معاملیں تے ڳالھ مہاڑ کرݨ، ریاست دے خلاف لوکاں کوں اُکساوݨ سودھے ٻئیاں سرگرمیاں رپورٹ تھئن۔وفاقی وزیر اطلاعات آکھیا جو جیل سپرنٹنڈنٹ دی موجودگی اچ ملاقاتاں تھیندن اَتے جو وی قاعدے قانون دی خلاف ورزی کریسی اوں دی ملاقات بند کر ݙتی ویسی۔ انہاں آکھیے جے جیل دے ٻاہر امن و امان دی صورتحال خراب کرݨ دی کوشش کیتی ڳئی تاں اوں دا سختی نال نوٹس ڳھدا ویسی۔ وفاقی وزیر اطلاعات آکھیا جو اے ممکن کائنی جو کوئی بندہ جیل دے اندر ٻہہ تے بھارت اَتے افغانستان دا بیانیہ اگوں ودھاوے اَتے ٻاہر آتے فوج اَتے اوں دے سربراہ دے خلاف ٹویٹس کرے اَتے پُورے نظام کوں نقصان پُڄاوݨ دی کوشش کرے اَتے ول بھارت اَتے افغانستان دے میڈیا کوں انٹرویوز ݙیوے۔ انہاں آکھیا جو قواعد دی خلاف ورزی ہووے تاں قانون کہیں وی صورت ملاقات دی اجازت نی ݙیندا، انہاں کوں ہک موقع ݙتا ہئی پر جیں جیں خلاف ورزی کیتی اے انہاں دیاں ملاقاتاں بند کر ݙتیاں ڳئن۔ انہاں آکھیا جو بانی پی ٹی آئی دے جیل دے اندر توں پیغام آندن جو اداریں دے خلاف ٹویٹ کیتا ونڄے او صرف مایوسی دا اظہار اے۔ عظمیٰ خان درست آکھیا جو بانی پی ٹی آئی غصے اَتے فرسٹریشن اچ ہن۔ انہاں کوں سوچݨا چاہیدا ہئی جو میگا کرپشن کرݨ ویندے پِن تاں انہاں دی وی واری آ سڳدی اے پر اوں ویلھے اے آکھدے ہن جو “میں کہیں کوں نی چھوڑینداں” ایں قسم دی ڳالھ مہاڑ انہاں دی سیاست دا مرکز ہئی۔ انہاں آکھیا جو پی ٹی آئی دے دور اچ ماواں، بھیݨاں اَتے دھیاں کوں گرفتار کیتا ڳیا۔ انہاں دے آپݨے کرتوت اے ہِن جو 190 ملین پاؤنڈ دا میگا کرپشن سکینڈل کیتا جیں دا انہاں دے کول اڄ تئیں کوئی قانونی جواب کائنی۔ جݙاں انہاں توں پُچھیا ونڄے تاں او جواب اچ آکھدن جو اساں ریاست مدینہ دا ناں گھندے ہاسے ایں واسطے سزا ݙتی ڳئی جݙاں جو حقیقت اے اے جو تحریک انصاف دا کوئی رہنما ایں کیس دا قانونی دفاع پیش نی کر سڳیا۔وفاقی وزیر اطلاعات آکھیا جو ریاست فیصلہ کر ڳھدے جے جیل دے ٻاہر امن و امان دی صورتحال پیدا کرݨ دی کوشش کیتی ڳئی تاں اوکھے ہتھاں نال نبڑیا ویسی اَتے ایں حوالے نال زیرو ٹالرنس دی پالیسی اے۔ انہاں آکھیا جو اے روز جیل دے ٻاہر تماشا لیندن، پولیس اہلکاراں کوں دھکے ݙیندن جݙاں جو اساں آپ وی وکیل دے طور تے جیلاں اچ ویندے رہیوں پر نہ کݙاہیں سڑک بلاک کیتی اَتے نہ ہی امن و امان دی صورتحال پیدا کیتی۔ انہاں آکھیا جو اساں کݙاہیں جیل توں ٻاہر آ تے ریاستی اداریں یا مُلکی دفاع دے خلاف ڳالھ نی کیتی۔ ماضی اچ جݙاں میاں نواز شریف دی صحت خراب ہئی اَتے ڈاکٹر عدنان تئیں رساٸی نہ مِلدی ہئی، ول وی اساں ایں طرح دا رویہ اختیار نی کیتا۔ وفاقی وزیرآکھیا قواعد دی خلاف ورزی کرݨ آلے کُہیں وی بندے کوں ملاقات دی اجازت نہ مِلسی۔ جے لاء اینڈ آرڈر دی صورتحال پیدا کیتی ڳئی تاں ریاست آپݨی رٹ پکی بݨیسی۔ ایں اچ کوئی ابہام نہ راہوے، ایں حوالے نال ہدایتاں ݙتیاں ڳئن۔ انہاں آکھیا جو قانون دی خلاف ورزی کرݨ آلیں کوں قانون موجب ہی جواب ݙیتا ویسی۔ انہاں آکھیا جو ملاقاتاں دا مقصد قانونی مشاورت اَتے خیریت پُچھݨ ہوندے لیکن جیل اچ ٻہہ تے اے ریاست کوں کمزور کرݨ دی ڳالھ کریندن، ایں ریاست کوں جیں بھارت کوں شکست ݙتی اَتے آپݨے مشرقی و مغربی سرحدی دفاع کوں مضبوط بݨایا۔ انہاں آکھیا جو اڄ دنیا پاکستان دی خارجہ پالیسی دی تعریف کریندی پئی اے پر اے آپݨی عادت توں باز نی آندے۔ اے چاہندن جو مُلک دا دفاع کمزور تھیوے اَتے ریاست دی سالمیت متاثر تھیوے۔ وفاقی وزیر آکھیا جو انہاں مُلک دے ڈیفالٹ دیاں دعائیں کیتیاں پر اللہ دے کرم نال معیشت ٹیک آف کیتا، زرمبادلہ دے ذخائر ودھیے، مہانگ گھٹی اَتے اڄ وی مُلکی معیشت دا موازنہ کیتا ونڄے تاں او ایں توں ٻہوں بہتر اے جو پی ٹی آئی چھوڑ تے ڳئی ہئی۔ انہاں آکھیا جو “اُڑان پاکستان” دے تحت معیشت ترقی دی راہ تے ٹُردی پئی اے۔ وفاقی وزیر آکھیا جو بانی پی ٹی آئی دا مقصد صرف “میں، میں اَتے میں اے” مکمل انا پرستی اَتے ذاتی مفاد کیتے قومی مفاد کوں قربان کرݨ ہی انہاں دا رویہ رہیے، مُلک و قوم انہاں کیتے کوئی اہمیت نی رکھیندے، کݙاہیں اے غلامی دا نعرہ لیندن اَتے کݙاہیں اوں کوں من گھندن۔ ہر معاملے تے یوٹرن گھندن۔ انہاں آکھیا جو شہیداں دیاں یادگاراں دی بے حرمتی پہلے کݙاہیں نی تھئی پر پی ٹی آئی شہیداں دا مذاق تئیں اُݙایا۔ انہاں آکھیا جو اے چاہندن جو انہاں دی انا دے سامݨے قومی مفاد کوں ہتھیار سٹوا ݙتا ونڄے جو کہیں وی صورت قبول کائنی۔ انہاں آکھیا جو سَبھ توں پہلے پاکستان اے اَتے پاکستان ہمیشہ زندہ باد راہسی، اے آپݨے ذاتی مقاصد اچ ناکام ہی راہسن۔ ہک سوال دے جواب اچ وفاقی وزیر اطلاعات آکھیا جو وزیراعلیٰ خیبر پختونخوا دا این ایف سی اجلاس اچ شرکت کرݨ خوش آئند اے، ایہو انہاں دی بُنیادی ذمّے واری اے۔ انہاں آکھیا جو او ہݨ سڑکاں دی سیاست توں ہٹ تے اجلاساں اچ شریک تھیندے پِن۔ وزیر اطلاعات آکھیا جو انہاں کوں ایپکس کمیٹی دے اجلاس اچ وی شریک تھیوݨا چاہیدے اَتے آپݨاں کردار ادا کرݨا چاہیدے۔ انہاں ݙسیا جو وزیراعظم ٻہوں واری اے پیشکش دہرا چُکن جو صوبے دی بہتری اَتے عوام دی بھلائی کیتے رَل تے کم کرݨ کیتے تیار ہِن۔ ہک ٻئے سوال دے جواب اچ انہاں آکھیا جو سماجی رابطے دے پلیٹ فارم “ایکس” تے ہک فیچر متعارف تھی ڳئے جیں توں معلوم تھی ویندے جو ایکس اکاؤںٹ کیڑحے مُلک توں آپریٹ تھیندا پئے، پی ٹی آئی دے ادھے اکاؤںٹ انڈیا اَتے ادھے افغانستان توں چل پئن، ہݨ ایں اچ کوئی ابہام نی رہیا۔ انہاں آکھیا جو مُلک اچ قانون اَتے آئین موجود اے، ہک سزا یافتہ مجرم جو کرپشن دے کیس اچ قید اے، اوں کوں اے اجازت نئیں جو او ایں طرح دا بیانیہ کھنڈا سڳے۔ ہک سوال دے جواب اچ انہاں آکھیا جو ضمنی انتخابات اچ لاہور توں تحریک انصاف دے چار چار امیدوار کھڑے ہن، ہری پور اچ صوبائی مشینری دے باوجود اے الیکشن ہر ڳئے، تحریک انصاف دی ایڈمنسٹریشن، پولیس اَتے عملہ انہاں دا آپݨا ہئی اَتے اُتھوں مسلم لیگ (ن) دا سیاسی ورکر بابر نواز جت تے آیا، پی ٹی آئی دے کوڑ، مکر اَتے فریب تے کہیں کوں دھیان نی ݙیوݨا چاہیدا۔ ہک سوال دے جواب اچ وفاقی وزیر آکھیا جو پنجاب حکومت کوں سپرنٹنڈنٹ اڈیالہ جیل ولوں درخواست مِل ڳئی اے جو معمول دی ملاقاتاں اچ مشکلاں دا سامݨا اے اَتے صورتحال پریشانی دا سبب بݨیندی پئی اے۔ انہاں آکھیا جو ہݨ لاء اینڈ آرڈر خراب نہ تھیوݨ ݙتا ویسی اَتے کہیں کوں وی قانون ہتھ اچ گھنݨ دی اجازت نہ ݙتی ویسی۔