صدر مملکت آصف علی زرداری اَتے کرغزستان دے صدر صادر ژپاروف دا ݙوہیں مُلکاں وچال تجارت، توانائی، تعلیم، بینکاری اَتے عوامی رابطیں سودھے مختلف شعبیں اچ تعاون مزید ودھاوݨ دے سانجھے عزم دا اظہار

اسلام آباد۔ 4 دسمبر (اے پی پی) صدر مملکت آصف علی زرداری اَتے کرغزستان دے صدر صادر ژپاروف ݙوہیں مُلکاں وچال تجارت ، توانائی، تعلیم، بینکاری اَتے عوامی رابطیں سودھے مختلف شعبیں اچ تعاون کوں مزید ودھاوݨ دے سانجھے عزم دا اظہار کیتے۔ ایوان صدر دے پریس ونگ توں جاری بیان موجب صدر مملکت ایوان صدر اچ کرغزستان دے صدر صادر ژپاروف دا خیرمقدم کیتا۔ وفد دی سطح تے مذاکرات توں پہلے ݙوہیں رہنماواں ݙو طرفہ تعلقات دے جائزے کیتے ہک مختصر (ون آن ون) ملاقات کیتی۔صدر مملکت معزز مہمان دا خیرمقدم کریندے آکھیا جو تقریباً ویہہ سال بعد کرغزستان دے کہیں صدر دا اے اعلیٰ سطحی دورہ اے اَتے اے دورہ کرغزستان دے نال پہلے توں موجود دوستانہ تعلقات اچ نویں جان پاوݨ اچ مددگار ثابت تھیسی۔ انہاں آکھیا جو پاکستان کرغزستان دے نال آپݨے نیڑے دے اَتے بھراواں آلے تعلقات کوں قدر دی نظر نال ݙیکھدے جیڑھے سانجھے مذہب، تاریخی ورثے اَتے ثقافتی ہم آہنگی تے مبنی ہِن۔ݙوہیں صدور مختلف شعبیں اچ تعاون دا جائزہ ڳھدا اَتے ایں ڳالھ تے اتفاق کیتا جو موجودہ تجارتی حجم ݙوہیں مُلکاں دی اصل صلاحیت دی عکاسی نی کریندا۔ انہاں آپسی تجارت دے ودھارے دی لوڑھ تے زور ݙتا۔ صدر آصف علی زرداری پاکستان-کرغزستان بزنس فورم اچ کرغز کاروباری وفد دی شرکت کوں خوش آئند قرار ݙیندے آکھیا جو اے ݙوہیں مُلکاں وچال اقتصادی رابطیں کوں مضبوط بݨاوݨ دی سانجھی خواہش دا اظہار اے۔ صدر مملکت کاسا 1000 منصوبے دے کرغز حصے دی تکمیل تے کرغزستان دی تعریف کیتی ۔ انہاں ایں منصوبے دے پاکستانی حصے دی ویلھے سِر تکمیل دے عزم کوں دُہرایا جیڑھا ہݨ تکمیل دے چھیکڑی مرحلیں اچ اے۔ ݙوہیں صدور علاقائی رابطیں تے وی ڳالھ مہاڑ کیتی اَتے چار فریقی ٹریفک ان ٹرانزٹ معاہدے دے تحت فعال زمینی راہداری تے اطمینان دا اظہار کیتا۔صدر آصف علی زرداری کرغزستان کوں بحیرہ عرب تئیں سَاریں توں مختصر اَتے گھٹ لاگت دی راہداری مہیا کرݨ دی تیاری دا اعادہ کیتا اَتے تجارت، سیاحت اَتے عوامی رابطیں دے ودھارے کیتے سِدھیاں پروازاں دے ودھارے دی لوڑھ تے زور ݙتا۔ انہاں کرغزستان دی حکومت اَتے عوام دا وݙی تعداد اچ پاکستانی طلباء اَتے کارکناں دی میزبانی تے شکریہ ادا کیتا۔ صدر مملکت معزز مہمان کوں آگاہ کیتا جو پاکستان کرغزستان کوں آپݨے بزنس ویزا لسٹ اَتے ویزا پرائر ٹو ارائیول کیٹیگریز اچ شامل کر ڳھدے اَتے پاکستانی تاجراں اَتے مسافراں کیتے ایہو جیھی سہولت کاری دی حوصلہ افزائی کیتی۔ صدر مملکت ایں موقع تے اے وی یاد ݙیوایا جو شہید محترمہ بینظیر بھٹو 1995ء اچ کرغزستان دی آزادی توں بعد دورہ کرݨ آلی پہلی پاکستانی وزیراعظم ہن اَتے او آپ وی ایں دورے اچ انہاں دے نال ہن۔ملاقات اچ ݙوہاں مُلکاں تجات، توانائی، رابطیں، تعلیم، بینکاری اَتے عوامی رابطیں سودھے مختلف شعبیں اچ تعاون کوں مزید ودھاوݨ دے سانجھے عزم دا اظہار کیتا۔ صدر ژپاروف صدر آصف علی زرداری کوں آگاہ کیتا جو کرغزستان دے اڄوکے عام انتخابات توں بعد ہک نواں قانون منظور کیتا ڳئے جیں دے تحت گھٹ توں گھٹ 30 فیصد نشستاں تِریمتاں کیتے مخصوص کیتیاں ڳئن۔ انہاں کرغزستان دی اقوام متحدہ دی سلامتی کونسل دی غیر مستقل نشست کیتے پاکستان دی حمایت تے شکریہ ادا کیتا اَتے صدر پاکستان کوں آپݨی سہولت موجب کرغزستان دے دورے دی دعوت ݙتی۔ ایں موقع تے علاقائی اَتے بین الاقوامی صورتحال نال متعلق امور وی زیر بحث آئے۔ملاقات اچ ݙوہیں پاسوں دے اعلیٰ حکام شرکت کیتی۔ کرغز وفد اچ وزیر خارجہ ژینبیک کلوبائیف، وزیر سائنس، اعلیٰ تعلیم اَتے جدت بختیار اَوروزوف، وزیر توانائی تالائبیک ابراہیو، وزیر معیشت و تجارت بکت سیدیکوف، نیشنل انویسٹمنٹ ایجنسی دے ڈائریکٹر راوشان بیک سبیروف، صدارتی انتظامیہ دے شعبہ خارجہ پالیسی دے سربراہ ساگن بیک عبدو متالیپ، کرغزستان دے اٹارنی جنرل مکسات اسان علییف اَتے پاکستان اچ کرغزستان دے سفیر کلچ بیک سلطان شامل ہن۔ پاکستانی وفد اچ نائب وزیراعظم و وزیر خارجہ سینیٹر محمد اسحاق ڈار، وزیر تجارت جام کمال خان، وزیر وفاقی تعلیم و پیشہ ورانہ تربیت ڈاکٹر خالد مقبول صدیقی، وزیر توانائی اَتے بجلی سردار اویس احمد خان لغاری، سینیٹر شیری رحمان، سینیٹر سلیم مانڈوی والا، رُکن قومی اسمبلی راجہ پرویز اشرف، سابق چیئرمین سینیٹ نیئر بخاری، سیکریٹری خارجہ، سیکریٹری نیشنل ہیلتھ سروسز ریگولیشنز اینڈ کوآرڈینیشن اَتے کرغزستان اچ پاکستان دے سفیر شامل ہن۔ملاقات توں بعد معزز مہمان دے اعزاز اچ ضیافت دا انتظام کیتا ڳیا جیں اچ وزیراعظم محمد شہباز شریف، چیئرمین سینیٹ سید یوسف رضا گیلانی، سپیکر قومی اسمبلی سردار ایاز صادق، وفاقی کابینہ دے ارکان، گورنر پنجاب سردار سلیم حیدر خان، گورنر گلگت بلتستان سید مہدی شاہ، چیف آف آرمی سٹاف فیلڈ مارشل سید عاصم منیر، چیف آف ایئر سٹاف ایئر چیف مارشل ظہیر احمد بابر سدھو، چیف آف نیول سٹاف ایڈمرل نوید اشرف، سندھ دے سینئر وزیر شرجیل میمن اَتے سفارتی کور دے ارکان شرکت کیتی۔ صدر مملکت صدر صادر ژپاروف کوں سالگرہ دی پیشگی مبارخ وی ݙتی جیڑھے 6 دسمبر کوں 57 سال دے تھی ویسن۔ ایں موقع دی مناسبت نال آرکسٹرا وائلن تے ’’ہیپی برتھ ڈے‘‘ وی وڄایا۔