تریمتیں دا معاشی بااختیار ہووݨ محض مساوات دا معاملہ نہیں بلکہ پاکستان دی پائیدار ترقی کیتے ہک سٹریٹجک لوڑھ اے، چیئرمین سینیٹ سید یوسف رضا گیلانی

اسلام آباد۔ 20 جنوری (اے پی پی) چیئرمین سینیٹ سید یوسف رضا گیلانی آکھیے جو تریمتیں دا معاشی بااختیار ہووݨ محض مساوات دا معاملہ نہیں بلکہ پاکستان دی پائیدار ترقی کیتے ہک سٹریٹجک لوڑھ اے۔ او اسلام آباد دے ہک مقامی ہوٹل اچ منعقدہ چوتھی آل پاکستان ویمن چیمبرز پریذیڈنٹس انٹرنیشنل کانفرنس توں بطور مہمانِ خصوصی خطاب کریندے پئے ہن۔ انھاں آکھیا جو اے کانفرنس ہک قومی تحریک دی نمائندہ اے جتھاں تریمتیں کوں معاشی تبدیلی دی معمار تسلیم کیتا ویندا پئے ۔ انھاں تریمتیں کاروباری شخصیات دی جرات تے عزم کوں خراجِ تحسین پیش کیتا۔ انھاں محترمہ بینظیر بھٹو شہید کوں زبردست خراجِ عقیدت پیش کریندیں ہوئیں انھاں کوں تریمتیں کوں بااختیار بݨاوݨ دی علمبردار قرار ݙتا۔ انھاں آکھیا جو ویمن سٹڈیز سینٹرز، فرسٹ ویمن بینک، سرکاری نوکریاں اچ کوٹہ تے لیڈی ہیلتھ ورکرز پروگرام جہیے اقدامات انھاں دی دور اندیش قیادت دا ثبوت ہن۔ چیئرمین سینیٹ آکھیا جو سینیٹ آف پاکستان خواتین دے معاشی، سماجی تے قانونی مسئلیاں دے حل کیتے اہم کردار ادا کریندا پئے ۔ انھاں زور ݙتا جو تریمتیں دی معیشت اچ شمولیت ودھاوݨ کیتے سماجی رکاوٹاں کوں ختم کرݨا ہوسی۔