چاریں صوبیاں دی ترقی نال پاکستان اڳوں ودھسی ، خیبرپختونخوا کوں دہشت گردی نال نٻڑݨ کیتے 800 ارب روپے ݙتے، وزیراعظم شہباز شریف دا قومی ورکشاپ اچ خیبرپختونخوا دے شرکاء نال خطاب

اسلام آباد۔ 20 جنوری (اے پی پی) وزیراعظم محمد شہباز شریف جھوٹ تے پراپیگنڈے دی بنیاد تے نینگراں دے ذہناں اچ زہر گھولݨ کوں بدقسمتی قرار ݙیندیں ہوئیں آکھیے جو کجھ صوبیاں این ایف سی اچ ملݨ آلے وسائل توں فائدہ چا تے بھرپور ترقی کیتی اے  پر خیبرپختونخوا اچ اے نظر نہیں آندی، چاریں صوبیاں دی ترقی نال پاکستان اڳوں ودھسی ۔ سوشل میڈیا تے شہداء دی قربانیاں دی توہین کر تے سرحد پار دشمن دی آواز نال آواز ملائی ویندی اے۔ خیبرپختونخوا کوں دہشت گردی نال نبڑݨ کیتے 800 ارب روپے ݙتے، دہشت گرداں دا قلع قمع کرݨ تئیں قوم چین نال نہیں بہسی ۔افغانستان دی عبوری حکومت اساݙی ہک نہیں منی، ول انھاں کوں سبق سکھایا، ہݨ انھاں فیصلہ کرݨا اے جو پرامن ہمسائے دے طور تے رہݨا اے یا نئیں۔ اے ڳالھیں انھاں قومی ورکشاپ اچ خیبرپختونخوا دے شرکاء نال خطاب کریندیں ہوئیں کیتا۔ ایں موقع تے نائب وزیراعظم تے وزیر خارجہ سینیٹر اسحاق ڈار، وفاقی وزراء خواجہ محمد آصف، عطاء اللہ تارڑ تے ٻئے وی موجود ہن۔ وزیراعظم خیبرپختونخوا کوں پاکستان دا ہک انتہائ اہم تے سٹریٹجک صوبہ قرار ݙیندیں ہوئیں اتھوں دے عوام دی غیرت، جرات تے بہادری کوں سراہیا تے آکھیا جو خیبرپختونخوا نے دہشت گردی دے خلاف جنگ اچ بے مثال قربانیاں ݙتین۔ انھاں آکھیا جو افغان جنگ دے نتیجے اچ جو کجھ تھیا او تاریخ دا حصہ اے، 40 لکھ افغان پناہ گزین ہجرت کر تے آئے تاں پاکستان دے عوام انھاں دی میزبانی اچ کوئی کسر نہ چھوڑی، اے بطور مسلمان اساݙا فرض ہئی پر ایندے نتیجے اچ ملک اچ کلاشنکوف کلچر تے دہشت گردی آئی۔ خیبرپختونخوا ایں جنگ اچ فرنٹ لائن تے رہیا جتھاں ہر شعبہ ہائے زندگی دے لوکاں جاناں قربان کیتیاں۔ وزیراعظم آکھیا جو 2018 اچ دہشت گردی ختم تھی ڳئی ہئی پر ایندے بعد کجھ فاش غلطیاں تھیاں، سوات توں دہشت گرداں کوں رہا کیتا ڳیا تے افغانستان توں ہزاراں کوں واپس آن تے وسایا ڳیا جیندے نال دہشت گردی ولا  شروع تھئی۔ انھاں آکھیا جو شہداء دی قربانی دا جتنا احترام کیتا ونڄے تھوڑا اے پر سوشل میڈیا تے انھاں دی توہین کر تے دشمن دا ساتھ ݙتا ویندے ۔ وزیراعظم یاد ݙوایا جو 2010 دے این ایف سی ایوارڈ اچ پنجاب پہل کیتی تے صوبیاں اپݨے حصے اچوں ہک فیصد خیبرپختونخوا کوں دہشت گردی دے مقابلے کیتے ݙیوݨ دا فیصلہ کیتا۔ 15 سالاں اچ 800 ارب روپے ݙتے ڳئن  اتے اے سلسلہ اڄ وی جاری اے ۔ انھاں آکھیا جو حکومت دا ایمان اے جو چاریں صوبے ترقی کریسن تاں پاکستان ترقی کریسی۔ انھاں ایں عزم دا اظہار کیتا جو تمام خارجی جیہڑے پاکستان دے اندر تے ٻاہروں حملہ آور ہن، انھاں دا مکمل خاتمہ کرݨ تئیں قوم چین نال نہ بہسی۔ بلوچستان دی 850 کلومیٹر خونی سڑک کیتے 400 ارب روپے مختص کیتے، بلوچستان توں ہک پائی نہیں منگی۔ صوبے دے کساناں کیتے سولر پینلز دی فراہمی کیتے 75 ارب روپے دے منصوبے اچوں 50 ارب روپے وفاق ݙتے جنھاں نال اڄ ٹیوب ویل چلدے پئے ہن۔ آزاد کشمیر تے گلگت بلتستان اچ دانش سکولاں دا جال وچھایا ویندا پئے ، شاگرداں کوں میرٹ تے لیپ ٹاپ تے وظیفے ݙتے ویندے پئن جیندے کیتے فنڈ قائم کیتا ڳئے۔وزیراعظم یاد ݙوایا جو خیبرپختونخوا دی عوام 1947 اچ پاکستان دے حق اچ ووٹ ݙتا تے قائدِ اعظم دی قیادت اچ کھڑے تھئے، 1971 دی جنگ اچ رضا کارانہ طور تے افغانستان دے نال ٹرانزٹ ٹریڈ بند کر ݙتی۔ اللہ تعالیٰ خیبرپختونخوا کوں معدنیات دی دولت نال نوازیا اے ، اے وسائل عوام دی فلاح کیتے خرچ تھیوݨے چاہیدے ہن پر باقی صوبیاں نال خیبرپختونخوا دی ݙاہ سالہ کارکردگی دا موازنہ کرو تاں کھیر دا کھیر تے پاݨی دا پاݨی تھی ویسے۔وزیراعظم آکھیا جو 6 مئی کوں بھارت پاکستان تے جارحیت کریندیں ہوئیں 53 بے گناہ پاکستانیاں کوں شہید کیتا تاں پاکستان سخت جوابی کارروائی کیتی اتے دشمن دے 7 لڑاکا طیارے سٹ ݙتے۔ فیلڈ مارشل سید عاصم منیر دی قیادت اچ دشمن کوں او سبق سکھایا جیندی مثال نہیں ملدی ۔افغانستان نال تعلقات دے سوال تے انھاں آکھیا جو افغانستان ہمسایہ ملک اے اتے اساں ہک ٻئے نال جڑے ہوئے ہیسے ۔ افغانستان دی حکومت اساݙی میزبانی دی قدر نہیں کیتی، بھرا چارے دے جواب اچ بھرا چارہ نہیں ݙکھایا ڳیا جیہڑا افسوسناک اے ۔افغان سرزمین توں پاکستان دے خلاف دہشت گردی تھیندی پئی اے، ٹی ٹی پی تے بی ایل اے سمیت بھارتی آشیرباد نال چلدے پراکسیز کوں روکݨ دا آکھیا پر انھاں مثبت جواب نہیں ݙتا، ول انھاں کوں سبق سکھایا۔ انھاں اساکوں مجبور کیتا جو ٹرانزٹ ٹریڈ بند کروں، اساں انسانی بنیاداں تے دوائیاں تے ضروری سامان نہیں روکیا، ہݨ افغان عبوری حکومت تے اے جو او پرامن ہمسائے بݨ تے رہݨ چاہندن یا نئی۔خیبرپختونخوا حکومت نال تعلقات دے سوال تے وزیراعظم آکھیا جو وفاق تے خیبرپختونخوا اچ سرد جنگ دا تاثر غلط اے، میں سہیل آفریدی کوں وزیراعلیٰ بݨݨ تے مبارکباد ݙتی ہئی پر انھاں مثبت جواب نہیں ݙتا۔ہک ٻئے سوال تے انھاں ݙسایا جو وزیراعظم صحت پروگرام ولا  شروع کر ݙتا ڳئے ،ایں پروگرام دے تحت وفاقی دارالحکومت، گلگت بلتستان تے آزاد کشمیر دے عوام دے مفت علاج کیتے 40 ارب روپے فراہم کیتے ویسن ۔