قومی بیانیے دے خلاف شر انگیزی کھنڈاوݨ آلیاں کوں قانون دے کٹہرے اچ ڳھن آیا ویسی، عطا اللہ تارڑ

لاہور۔ 20 جنوری(اے پی پی) وفاقی وزیر اطلاعات و نشریات عطا اللہ تارڑ آکھیے جو دہشت گرداں کیتے کہیں وی قسم دا نرم گوشہ ملکی مفاد دے خلاف اے، پی ٹی آئی ملک اچ انتشار دی سیاست تے گالھیں مندیاں دے کلچر کوں ودھایا، ٹی ٹی پی دا خاتمہ یقینی بݨایا ویسی، قومی بیانیے دے خلاف شر انگیزی کھنڈاوݨ والیاں کوں قانون دے کٹہرے اچ ڳھن آیا ویسی، معرکہ حق اچ فتح تے بھارت اڄ وی اپݨے پھت چٹندا پئے، ملکی سلامتی کیتے پاک فوج قربانیاں دیاں نویاں داستاناں لکھدی پئی اے۔ انہاں اے ڳالھ “پاکستان فیڈرل یونین آف کالمسٹ اینڈ کری ایٹرز” (PFUCC) دے عہدیداراں دی حلف برداری تقریب نال خطاب اچ آکھی۔ ایں موقع تے معروف اینکر سہیل وڑائچ، تجزیہ نگار نجم ولی خان اتے ٻئے صحافتی نمائندے وی موجود ہن۔ وفاقی وزیر آکھیا جو معاشرے اچ صحافیاں دا کردار جمہوریت دی مضبوطی کیتے ریڑھ دی ہڈی آلی کار اے۔ حکومت صحافیاں دے مسئلیاں دے حل کیتے پرعزم اےاتے انھاں دے روزگار دے تحفظ کوں یقینی بݨاوݨ کیتے سارے وسائل ورتیے ویندے پئن۔ انھاں آکھیا جو حکومت اظہارِ رائے دی آزادی تے یقین رکھدی اے ٻھل ایندی اݙ اچ ملکی سلامتی کوں خطرے اچ پاوݨ دی اصلوں اجازت نہ ݙتی ویسی۔ عطا اللہ تارڑ ڈیجیٹل میڈیا کیتے پالیسی سازی تے زور ݙیندے آکھیا جو موبائل فون رکھݨ والا ہر بندہ آپ کوں تجزیہ نگار سمجھݨ لڳ پئے جیندے نال پیشہ ورانہ صحافت کوں نقصان تھیندا پئے۔ انھاں آکھیا جو پیکا قانون دے تحت ریگولیٹری ادارے بݨائے ویسن۔ انھاں ڈیجیٹل کانٹینٹ کری ایٹرز کوں وی ٹیکس ادا کرݨ دا آکھیا۔ وفاقی وزیر میڈیا اداریاں دے بقایاجات دی ادائیگی دا ݙسیندے آکھیا جو انھاں وزارت سنٻھلیندے ہی ݙیݙھ ارب روپے دے بقایاجات کلیئر کیتے۔ انھاں پی ٹی آئی تے تنقید کریندے آکھیا جو خیبرپختونخوا اچ انھاں دی کارکردگی زیرو اے اتے او دہشت گرداں دی پشت پناہی کریندن۔ انھاں واضح کیتا جو ٹی ٹی پی پاکستان دی دشمن اے اتے ریاست انھاں دا آخری دم تئیں پیچھا کریسی۔