مہاندرے سرجن، منیے ہوئے یورالوجسٹ ڈاکٹر مرلی دھر دی کتاب “صحت سب کیلئے” دی تقریب رونمائی

کراچی۔20 جنوری(اے پی پی)پاکستان دے معروف سرجن اتے ایس آئی یو ٹی کراچی دے شعبہ یورولوجی دے سربراہ ڈاکٹر مرلی دھر دی کتاب ” صحت سب کیلئے” دی کراچی اچ رونمائی تقریب تھئی۔ کراچی پریس کلب اچ تھیوݨ آلی تقریب دی صدارت نورالہدیٰ شاہ کیتی۔ ڈاکٹر وسعت اللہ خان، ڈاکٹر توصیف احمد خان، ڈاکٹر جبار احمد خان، ڈاکٹر ریاض شیخ، سینئر صحافی سہیل سانگی، ڈاکٹر پشپا اتے کملیشور لوہانہ خطاب کیتے۔ ایں موقع تے نورالہدیٰ شاہ آکھیا جو ڈاکٹر خود فرشتہ صفت ہوندن اتے چنڳے ماحول اچ رہ تے انسان ٻیا چنڳاں ٻݨ ویندے۔ ڈاکٹر جبار خٹک آکھیا جو اے کتاب کہیں بند کمرے اچ لکھی گئی تحریراں دا مجموعہ نئیں، ٻھل او خیالات ہین جیڑھے ڈاکٹر مرلی دھر اخبارات اچ کالماں، سندھی تخلیقات اتے اردو زبان دے ذریعے براہِ راست عوام تئیں پڄاوے، ڈاکٹر مرلی دھر قلم ہووے، کتاب یا کیمرہ ہر ذریعے نال ہکو سنیہا ݙیندن اتے او ہے صحت سب کیتے۔ انہان آکھیا جو اے ڳالھ منݨ دی اے جو ڈاکٹر مرلی دھر اپݨے سنیہاں کوں صرف کاغذ تئیں محدود نئیں رکھیا ٻھل یوٹیوب چینل توں عوام تئیں پچایا، اتے اے سنیہا اخبار اچ پڑھا گیا، کتاب اچ محفوظ تھیا اتے ڈیجیٹل دنیا اچ محسوس کیتا گیا۔ اے ثبوت اے جو سچا سنیہا ہر دور دے ذریعے کوں قبول کریندے، اصل علاج نسخیاں نال نئیں ٻھل نیت اتے عمل نال تھیندے۔ ڈاکٹر پلوشہ آکھیا جو اے پندھ سوکھا نا ہا، ٻھل ناممکن وی نئیں ریہا، میں اتے مرلی ایں پندھ اچ ٹریے، راہ اوکھی ہئی ٻھل آخرکار کتاب مکمل تھئی، جیڑھی اہم معلومات تے مشتمل اے اتے ہر کہیں کیتے فیدہ مند اے، جتھاں سنیہا پچاوݨ دی لوڑھ ہووے اتھاں ضرور پچاوݨا چاہیدے۔ تقریب اچ ڈاکٹر کملیشور آکھیا جو اے کتاب ایں سوچ دی عملی مثال اے جتھاں طب صرف علاج تئیں محدود نئیں ٻھل آزاد شعور اتے انسانی ہمدردی دا ذریعہ وی ٻݨدی اے، یورولوجی جھئیں حساس شعبے تے عوام کیتے لکھݨ نہ صرف علمی ٻھل اخلاقی ذمہ داری وی اے، اینڄھیاں تحریراں مریضاں دا خوف ڳھٹیندن۔ چھیکڑ تے کتاب دے مصنف ڈاکٹر مرلی دھر آکھیا جو عوام تئیں درست معلومات پچاوݨ میݙی پہلی ذمہ داری اے، تہوں میں یوٹیوب تے مختصر معلوماتی ویڈیوز وی ٻݨیدا پیاں جیندے نال لوکاں دی سمجھ اتے آگاہی ودھی اے۔