ٓرمی چیف، چیف آف ڈیفنس فورسز و فیلڈ مارشل دا نیشنل پولیس اکیڈمی دا دورہ

راولپنڈی۔20 جنوری(اے پی پی)آرمی چیف، چیف آف ڈیفنس فورسز و فیلڈ مارشل سید عاصم منیر آکھیے جو قانون نافذ کرݨ ہک مقدس امانت اے، مسلح افواج ہمیشہ بہادر اتے با وقار پولیس نال مونڈھا رلا تے کھڑیاں رہسن۔ پاک فوج دے شعبہ تعلقات عامہ (آئی ایس پی آر) دے مطابق آرمی چیف، چیف آف ڈیفنس فورسز و فیلڈ مارشل نیشنل پولیس اکیڈمی دا دورہ کیتے۔ ایں موقع تے وفاقی وزیر داخلہ محسن نقوی اتے وزیر مملکت داخلہ طلاق چودھری وی موجود ہن۔

سید عاصم منیر پولیس اکیڈمی دے افسران نال وی ملین۔ نیشنل پولیس اکیڈمی پڄݨ تے کمانڈنٹ ولوں فیلڈ مارشل دا گرم جوشی نال استقبال کیتا گیا اتے پولیس دستے انہاں کوں گارڈ آف آنر پیش کیتا۔ انہاں پولیس مارٹرز مونومنٹ تے پھل چڑھائے اتے شہدا کیتے فاتحہ خوانی کیتی۔

انہاں پولیس اہلکاراں کوں خراج عقیدت پیش کیتا جیڑھے امن قائم رکھݨ، قانون دی بالادستی اتے عوام دی حفاظت کیتے اپݨیاں جاناں قربان کر چکین۔ فیلڈ مارشل دہشتگردی، جرائم اتے داخلی سلامتی دے چیلنجز سانڳے پولیس دیاں قربانیاں دی تعریف کیتی۔ فیلڈ مارشل آئی جی پولیس، ایڈیشنل آئی جی اتے ٻئے سینئر پولیس افسران نال خطاب اچ بین الآرگنائزیشن تعاون، جدید پولیسنگ دے طریقہ کار اتے عوام دا اعتماد ودھاوݨ دے اقدامات تے زور ݙتے۔ انہاں آکھیا جو ہک مضبوط، پیشہ ورانہ اتے عوام دوست پولیس فورس داخلی سلامتی اتے قانون دی بالادستی کیتے ݙاݙھی ضروری اے، قانون نافذ کرݨ ہک مقدس امانت اے، مسلح افواج ہمیشہ بہادر اتے با وقار پولیس نال مونڈھا رلا تے کھڑیاں رہسن۔

سینئر پولیس قیادت جدید سلامتی چیلنجز دے مطابق پولیسنگ دا معیار ٻیا تکڑا کرݨ، پیشہ ورانہ صلاحیت ودھاوݨ اتے ادارہ جاتی اصلاحات ودھاوݨ دا عزم دوہرایا۔