وزیرِ خزانہ سینیٹر محمد اورنگزیب نال یو اے ای دے وزیر دی ملاقات

ڈیووس۔ 20 جنوری (اے پی پی) وفاقی وزیر برائے خزانہ و محصولات سینیٹر محمد اورنگزیب نے منگل دے ݙینہہ ڈیووس اچ عالمی اقتصادی فورم دی سالانہ کانفرنس دے موقع تے متحدہ عرب امارات دے وزیرِ مملکت برائے مالی امور محمد الحسینی نال ملاقات کیتی۔ ملاقات اچ ݙوہیں پاسوں پاکستان اتے متحدہ عرب امارات وچال جاری اقتصادی رابطیاں دا جائزہ گھدا ڳیا اتے ݙو طرفہ، قریبی اتے ہمہ جہت تعلقات کوں مزید مضبوط بݨاوݨ دے طریقیاں تے ڳالھ مہاڑ کیتی ڳئی۔ اماراتی وزیر پاکستان اتے آئی ایم ایف وچال جاری پروگرام اتے پیشرفت بارے معلومات ڳھدیاں۔ سینیٹر محمد اورنگزیب اپݨے ہم منصب کوں آئی ایم ایف پروگرام دے تسلسل، ایکسٹینڈڈ فنڈ فیسلٹی دے تحت جاری جائزے اتے کلائمٹ ریزیلینس پروگرام دے پہلے جائزے بارے تفصیلی بریفنگ ݙتی۔ انھاں متحدہ عرب امارات دی مسلسل حمایت تے شکریہ ادا کیتا اتے آکھیا جو ݙوہیں ملکاں دے تعلقات، خاص طور تے متحدہ عرب امارات دے صدر دے حالیہ دورہِ پاکستان دے بعد توں مزید مضبوط تھیندے پئن۔ محمد الحسینی ݙوہیں ملکاں دی قیادت وچال مضبوط تعلقات کوں سراہیا اتے عوامی سطح تے رابطیاں دی اہمیت تے زور ݙتا۔ وفاقی وزیر خزانہ متحدہ عرب امارات دی مالی امداد، بشمول ݙو طرفہ ڈیپازٹس اتے لین دین تے شکریہ ادا کیتا اتے زور ݙتا جو روایتی مالی مدد کوں لمبی مدت دی سرمایہ کاری اچ بدلݨ ݙوہیں ملکاں کیتے فائدہ مند اے۔ سینیٹر محمد اورنگزیب ابھردی مالی ٹیکنالوجیز بارے یو اے ای دے تجربے دا اعتراف کیتا اتے پاکستان اچ ریگولیٹری فریم ورک کوں مضبوط بݨاوݨ کیتے حالیہ اقدامات دا ݙسایا۔ ݙوہیں رہنماواں علاقائی اتے عالمی معاشی صورتحال تے وی ڳالھ مہاڑ کیتی۔ اماراتی وزیر آکھیا جو پچھلا سال پاکستان کیتے مثبت رہے۔ سینیٹر محمد اورنگزیب ݙسایا جو پاکستان دی معاشی صورتحال اچ واضح بہتری آئی اے اتے مہنگائی اچ وی کمی تھئی اے۔ انھاں اصلاحات کیتے حکومت دے پختہ عزم دا اعادہ کیتا اتے نجکاری دے اقدامات بارے وی ݙسایا۔