وفاقی وزیر ثقافت اورنگزیب خان کھچی دا انسٹیٹیوٹ آف سندھیالوجی دا دورہ، تاریخی نوادرات، ثقافتی ورثے اتے 600 سالہ قدیم قرآنِ پاک دے نسخے دی تعریف

حیدرآباد۔ 20 جنوری(اے پی پی) وفاقی وزیر برائے ثقافت اتے قومی ورثہ اورنگزیب خان کھچی اتے وفاقی سیکرٹری اسد الرحمن گیلانی حیدر آباد اچ انسٹیٹیوٹ آف سندھیالوجی دا دورہ کیتا۔ انھاں وائس چانسلر پروفیسر ڈاکٹر فتح محمد مری تے ڈائریکٹر سندھیالوجی ڈاکٹر فیاض لطیف نال ملاقات دے بعد میوزیم، لائبریری اتے ادارے دے ٻئے شعبیاں دا معائنہ کیتا۔ انھاں اتھاں محفوظ تاریخی نوادرات، ثقافتی و تہذیبی ورثے، نامور شخصیات دے بݨائے ہوئے کارنرز اتے علمی خزانے کوں ٻہوں دلچسپی نال ݙٹھا اتے انھاں دی بہترین ترتیب تے سانٻھ دی تعریف کیتی۔ وفاقی وزیر اورنگزیب خان کھچی میڈیا نال ڳالھ مہاڑ کریندے ہوئیں آکھیا جو سندھیالوجی نہ صرف سندھ ٻھل پورے پاکستان دا ہک ٻہوں اہم علمی، ادبی، تاریخی اتے ثقافتی ادارہ اے، اتھاں نایاب تاریخی اتے ادبی ورثے کوں ٻہوں سوہݨے طریقے نال محفوظ کیتا ڳئے۔ انھاں آکھیا جو ریسرچ لائبریری اچ قرآنِ پاک دے 600 سالہ قدیم نسخے دے نال ٻیا تاریخی مواد ݙٹھے) جیندے توں او ٻہوں متاثر تھئن۔ انھاں آکھیا جو ایں دورے دا مقصد پاکستان دے ثقافتی اداریاں کوں ہک ٻئے نال جوڑݨ اتے انھاں دی ترقی کیتے ہر ممکن تعاون ݙیوݨ اے۔ انھاں آکھیا جو سندھیالوجی جھیں ادارے اساݙا قیمتی ترکہ ہین جیندی ترقی اساں ساریاں دی کٹھی ذمہ داری اے۔ انھاں ݙسایا جو اساں ٻہوں تیکھے اسلام آباد اچ ہک وݙی علمی اتے ثقافتی کانفرنس کرویندے پئے ہیں جیندے اچ سندھیالوجی کوں وی سݙیا ویسی۔ انھاں اے وی آکھیا جو اسلام آباد اچ سندھیالوجی دی تاریخی شیواں دی نمائش کرائی ویسی تاں جو ملک دے ٻئے لوگ وی ایں اثاثے توں واقف تھی سڳن۔ وفاقی سیکرٹری اسد الرحمن گیلانی آکھیا جو سندھیالوجی ہک شاندار ادارہ اے جتھاں سندھ دے ثقافتی رنگ محفوظ ہن۔ انھاں آکھیا جو اتھاں موجود کارنرز کوں اڄ دے دور دے مطابق ڈیجیٹلائز کرݨ دی ٻہوں ضرورت اے۔ جامعہ سندھ دے وائس چانسلر ڈاکٹر فتح محمد مری وفاقی وزیر کوں خوش آمدید آکھیا اتے امید کیتی جو انھاں دا دورہ ادارے کیتے فائدہ مند ثابت تھیسی۔ انھاں اسلام آباد اچ نمائش دی پیشکش کوں قبول کیتا اتے آکھیا جو ایں بارے تیکھے پروپوزل ٻݨایا ویسی۔ ڈائریکٹر سندھیالوجی ڈاکٹر فیاض لطیف مہماناں دا شکریہ ادا کیتا اتے انھاں کوں سندھ دی سوغات اجرک دے تحفے وی پیش کیتے۔