وزیراعظم شہباز شریف نال آئی اے ای اے دے ڈائریکٹر جنرل رافیل ماریانو گروسی دی ملاقات

ویانا۔ 17 فروری (اے پی پی) وزیراعظم محمد شہباز شریف کینسر دی تشخیص تے علاج، نیوکلیئر پاور جنریشن تے صنعتی ایپلی کیشنز جیہڑے شعبیاں اچ جوہری ٹیکنالوجی دے ذمہ دارانہ استعمال دے فروغ اچ بین الاقوامی ایجنسی برائے ایٹمی توانائی دے کردار کیتے پاکستان دی حمایت دا اعادہ کریندیں ہوئیں پاکستان تے آئی اے ای اے دے درمیان تعاون کوں سراہیا ۔ وزیراعظم محمد شہباز شریف نال ویانا انٹرنیشنل سینٹر (VIC) اچ جوہری توانائی دے بین الاقوامی ادارے (IAEA) دے ڈائریکٹر جنرل رافیل ماریانو گروسی ملاقات کیتی۔ وزیراعظم آفس دے میڈیا ونگ ولوں جاری بیان دے مطابق ملاقات اچ نائب وزیراعظم تے وزیرِ خارجہ سینیٹر محمد اسحاق ڈار، وزیرِ اطلاعات عطا اللہ تارڑ، وزیراعظم دے معاونِ خصوصی سید طارق فاطمی تے سیکرٹری خارجہ آمنہ بلوچ وی موجود ہن۔ وزیراعظم کینسر دی تشخیص تے علاج، زراعت، نیوکلیئر پاور جنریشن تے صنعتی ایپلی کیشنز جیہڑے شعبیاں اچ جوہری ٹیکنالوجی دے ذمہ دارانہ استعمال دے فروغ اچ آئی اے ای اے دے کردار کیتے پاکستان دی حمایت دا اعادہ کیتا۔ بعد اچ انسٹی ٹیوٹ آف نیوکلیئر میڈیسن اینڈ آنکولوجی (INMOL)، لاہور کوں آئی اے ای اے دے تعاون دے مرکز دے طور تے نامزد کرݨ دے معاہدے تے دستخط کیتے گئے۔ پاکستان تے آئی اے ای اے ولوں بالترتیب نائب وزیراعظم اسحاق ڈار تے ڈی جی گروسی معاہدے تے دستخط کیتے۔