خدام الحجاج دی اعلیٰ معیار دی تربیت لائقِ تحسین اے، سردار محمد یوسف

اسلام آباد۔ 18 فروری (اے پی پی) وفاقی وزیرِ مذہبی امور سردار محمد یوسف حج 2026 کیتے خدام الحجاج دی تربیت دی تعریف کریندے آکھیے جو حکومت ایں سال حج تے ونڄݨ آلے عازمین کوں کھاوݨ پیوݨ، رہائش تے ٹرانسپورٹ دیاں معیاری سہولتاں ݙیسی۔ او حج کمپلیکس اسلام آباد وچ خدام الحجاج دی 10 ڈینھ وار دی تربیت مکمل تھیوݨ تے سرٹیفکیٹ ونڈݨ دی تقریب توں خطاب کریندے پئے ہن۔ انھاں آکھیے جو 38 ہزار امیدواراں وچوں 800 خوش نصیباں کوں “خدام الحجاج” بݨݨ دا موقع ملیے، اے محض ڈیوٹی کائنی بلکہ ہک اعزاز اے۔ انھاں آکھیا جو 2013 توں 2018 دے دوران اساں پنج بہترین حج کروائن تے ایں واری تریمتاں دی مدد کیتے فی میل سٹاف دی تعداد وی 45 توں ودھا تے 85 کر ݙتی ڳئی اے۔ سی ایف او ذوالفقار خان آکھیے جو خدام الحجاج کوں جدید ترین طریقے نال تربیت ݙتی ڳئی اے تاں جو او سعودی عرب پڄدے ہی اپݨا کم شروع کرسڳن۔