سحر تے افطار ویلھے کہیں وی علاقے لوڈ شیڈنگ کائناں تھیسی، گیس دی خصوصی نگرانی کیتی ویسی، سردار اویس لغاری تے علی پرویز ملک دی سانجھی پریس کانفرنس

اسلام آباد۔ 18 فروری (اے پی پی) وفاقی وزیر پاور ڈویژن سردار اویس احمد خان لغاری تے وفاقی وزیر پٹرولیم علی پرویز ملک رمضان المبارک دے حوالے نال خصوصی پیکیج تے اہم اقدامات تے بریفنگ ڈیندے آکھیے جو رمضان المبارک وچ روزہ داراں کوں زیادہ توں زیادہ سہولتاں ݙیوݨ سانڳے کوشاں ہیسے ، سحر تے افطار ویلھے کہیں وی علاقے بشمول نقصان آلے فیڈرز تے لوڈ شیڈنگ کائناں تھیسی، سارے فیڈرز دی مانیٹرنگ کیتے جدید نظام فعال اے، سحری تے افطاری ویلھے گیس پریشر برقرار رکھݨ کیتے انتظامات مکمل کر ڳھدن، سحری تے افطاری دے اوقات وچ گیس دی خصوصی نگرانی کیتی ویسی۔ اے ڳالھ انہاں سانجھی پریس کانفرنس نال خطاب کریندے آکھئن۔وفاقی وزیر پاور ڈویژن سردار اویس احمد خان لغاری آکھیے جو وزیراعظم محمد شہباز شریف دی ہدایت تے پاور ڈویژن تے پٹرولیم ڈویژن رمضان المبارک وچ صورتحال دا تفصیلی جائزہ ڳھدے۔ انھاں آکھیا جو رمضان المبارک دے دوران روزہ داراں دی سہولت دے پیشِ نظر وزیراعظم دی خواہش اے جو یوٹیلیٹی سروسز بالخصوص بجلی دی فراہمی وقتی تے مکمل طور تے یقینی بݨائی ونڄے تاں جو عوام کوں کہیں قسم دی دشواری دا سامݨا نہ کرݨاں پووے۔ انھاں ڈسایا جو فیصلہ کیتا ڳیے جو سحری تے افطار دے اوقات وچ کہیں وی علاقے وچ بجلی دی لوڈشیڈنگ کائناں کیتی ویسی، سوائے ایں صورت دے جو خدانخواستہ کوئی وݙا فالٹ آ ونڄے۔ انھاں آکھیا جو ہائی لاس فیڈرز تے تھیوݨ آلی اکنامک لوڈشیڈنگ وی سحری تے افطار دے ویلھے کائناں تھیسی تے پورے پاکستان وچ انھاں اوقات دے دوران بجلی دی بلا تعطل فراہمی کوں یقینی بݨایا ویسی۔ اویس لغاری آکھیا جو ایں مقصد کیتے پی آئی ٹی سی وچ ایکسپریشن کنٹرول روم بݨایا ڳئے جِتھاں سارے فیڈرز دی نگرانی کیتی ویسی۔ انھاں آکھیا جو شہری کہیں وی شکایت دی صورت وچ 118 نمبر تے رابطہ کرن جینکوں فوری طور تے حل کیتا ویسی۔وفاقی وزیر پٹرولیم علی پرویز ملک رمضان المبارک دی قوم کوں مبارخ ݙیندے آکھیا جو وزیراعظم شہباز شریف دی ہدایت تے رمضان المبارک وچ گیس ݙیوݨ دی عوام کوں سہولت ݙتی ویسی، سویلے3 وڄے توں رات ساڈھے 10 وڄے تئیں گیس دی فراہمی یقینی بݨائی ویسی۔ انھاں آکھیا جو سحری تے افطاری ویلھے گیس پریشر برقرار رکھݨ کیتے خصوصی انتظامات مکمل کر ڳھدن، عوامی سہولت دے پیشِ نظر اضافی گیس دا وی انتظام مکمل کر ڳھدا ڳئے۔ علی پرویز ملک آکھیا جو سوئی ناردرن تے سوئی سدرن دے ہیڈ آفسز وچ سچویشن رومز بݨا ݙتے گئن۔ انھاں آکھیا جو شہریاں دی سہولت کیتے شکایات دے اندراج دا نظام مکمل فعال اے، عوام گیس بارے شکایات 1199 ہیلپ لائن دے ذریعے درج کروا سگدن، ایم ڈیز خود شکایات دے ازالے دی نگرانی کریسن۔ وفاقی وزیر آکھیا جو صارفین دے اطمینان کیتے روبو کال سسٹم دے ذریعے شکایات دے حل دی تصدیق کیتی ویسی۔ انھاں آکھیا جو حکومت دی کوشش اے جو رمضان وچ عوام کوں زیادہ توں زیادہ سہولت ݙتی ونڄے۔