پاکستان دا فلسطینیاں دی غیر متزلزل حمایت دا اعادہ، مغربی کنارے اچ اسرائیل دے اڄوکی غیر قانونی اقدامات دی مذمت، انصاف دے بغیر امن کائنی، فلسطینیاں دے حقوق دے بغیر کوئی حل کائنی، نائب وزیراعظم تے وزیر خارجہ سینیٹر محمد اسحاق ڈار

اقوام متحدہ۔19 فروری (اے پی پی) نائب وزیراعظم تے وزیر خارجہ سینیٹر محمد اسحاق ڈار پاکستان ولوں فلسطینیاں دی غیر متزلزل حمایت کریندیں ہوئیں مغربی کنارے تے اسرائیل دے حالیہ غیر قانونی اقدامات بشمول الحاق دی کوششاں، وستیاں دے قیام تے فلسطینیاں دی زمیناں کوں ’’ریاستی زمین‘‘ قرار ڈیوݨ دی سخت مذمت کیتی اے اتے واضح کیتے جو انصاف دے بغیر پائیدار امن ممکن کائنی، فلسطینی عوام کوں حقِ خودارادیت ݙتے بغیر کوئی حل کائنی، پاکستان مستقل جنگ بندی، امداد اچ اضافے، غزہ دی تعمیر نو تے مربوط سفارت کاری دے ذریعے فلسطینی عوام دے حقِ خودارادیت دے حصول دی حمایت کیتے بورڈ آف پیس اچ شامل تھیا۔ خمیس کوں اقوام متحدہ دی سلامتی کونسل دی مشرقِ وسطیٰ بشمول مسئلۂ فلسطین تے تھیوݨ آلی بریفنگ اچ پاکستان دا موقف پیش کریندیں ہوئیں نائب وزیراعظم تے وزیر خارجہ سینیٹر محمد اسحاق ڈار غزہ اچ جنگ بندی کوں مستحکم ٻݨاوݨ، شہریاں دی تکلیفاں گھٹ کرݨ اتے غزہ تنازع دے خاتمے دے جامع منصوبے تے عملدرآمد دی جاری سفارتی کوششاں کوں اجاگر کیتا جیندے دی توثیق سلامتی کونسل دی قرارداد 2803 دے ذریعے کیتی ڳئی اے۔ نائب وزیراعظم تے وزیر خارجہ سینیٹر محمد اسحاق ڈار امریکی صدر ڈونلڈ جے ٹرمپ دی قیادت اچ امن اقدامات کوں سراہیندے ہوئیں آکھیا جو پاکستان، انڈونیشیا، متحدہ عرب امارات، سعودی عرب، قطر، اردن، مصر تے ترکیہ سمیت اٹھ عرب تے اسلامی ملکاں دے گروپ نال رل تے منصفانہ حل کیتے فعال کردار ادا کریندا پئے۔ انہاں مغربی کنارے تے اسرائیل دے حالیہ غیر قانونی اقدامات بشمول الحاق دی کوششاں، وستیاں دے قیام دے فروغ تے زمیناں کوں ’’ریاستی زمین‘‘ قرار ڈیوݨ دی سخت مذمت کریندیں ہوئیں آکھیا جو اے اقدامات بین الاقوامی قانون، چوتھے جنیوا کنونشن، سلامتی کونسل دی قرارداد 2334 تے 2024 اچ بین الاقوامی عدالتِ انصاف دی مشاورتی رائے دی خلاف ورزی ہن۔ نائب وزیراعظم و وزیر خارجہ سینیٹر محمد اسحاق ڈار غزہ اچ اسرائیل ولوں جنگ بندی دی ولا ولا خلاف ورزیاں تے شدید تشویش دا اظہار کیتا اتے اقوامِ متحدہ دے دفاتر تے تنصیبات تے حملیاں، انسانی امداد تے پابندیاں تے امدادی سرگرمیاں اچ رکاوٹاں دی مذمت کریندے ہوئیں صورتحال کوں ناقابلِ قبول تے نہایت نازک قرار ݙتا۔ انہاں آکھیا جو 1967 توں پہلے دی سرحداں دی بنیاد تے القدس الشریف کوں دارالحکومت بنڑیندیں ہوئیں فلسطینی ریاست دے قیام کیتے ہک قابلِ اعتماد، ناقابلِ واپسی تے وقت دے تعین دے نال سیاسی عمل ضروری اے جو بین الاقوامی جواز تے اقوامِ متحدہ دی قرارداداں دے مطابق ہووے۔ محمد اسحاق ڈار جو واشنگٹن اچ بورڈ آف پیس دے افتتاحی اجلاس اوچ وزیراعظم محمد شہباز شریف دے وفد اچ شامل ہن، آکھیا جو پاکستان امن کوششاں کوں تقویت ڈیوݨ کیتے ایں اجلاس اچ شرکت کریسی۔