پاکستان دے خلاف دہشت گردی کیتے افغان سرزمین دے استعمال تے افغان ناظم الامور کوں ڈی مارش

اسلام آباد۔19 فروری (اے پی پی) دفترِ خارجہ اسلام آباد اچ افغان سفارت خانے دے ناظم الامور کوں گزریل ݙینھ سݙ تے 16 فروری کوں باجوڑ اچ پیش آوݨ آلے دہشت گرد حملے دے حوالے نال افغان عبوری حکومت کوں سخت احتجاجی مراسلہ (ڈی مارش) پڄایا، ایں دہشت گرد حملے دے نتیجے اچ 11 پاکستانی فوجی جوان شہید تھئے۔ خمیس کوں ترجمان دفتر خارجہ دے مطابق پاکستان باجوڑ اچ پاکستان دی مسلح افواج تے قانون نافذ کرݨ آلے اداریاں دی چوکی تے گاݙی اچ نصب خودکش بم حملے جیندے بعد مسلح فائرنگ دی کارروائی وی کیتی گئی، دی شدید ترین الفاظ اچ مذمت کیتی، اے حملہ فتنہ الخوارج / تحریک طالبان پاکستان (ٹی ٹی پی) ولوں کیتا ڳیا۔دفتر خارجہ ایں امر تے تشویش دا اظہار کیتا جو فتنہ الخوارج / ٹی ٹی پی جیندے دی قیادت افغانستان اچ موجود اے، افغان سرزمین توں بلا روک ٹوک سرگرمِ عمل اے۔ ایں امر دا اعادہ کیتا ڳیا جو پاکستان کوں افغان عبوری حکومت ولوں متعدد مواقع تے یقین دہانیاں موصول تھیاں تاہم انہاں دے باوجود کوئی نمایاں، ٹھوس تے قابلِ تصدیق اقدام سامݨے کائنی آیا۔ افغان عبوری حکومت کوں واضح طور تے ݙسایا ڳیا جو او آپݨی سرزمین توں سرگرم سارے دہشت گرد گروہاں بشمول انہاں دی قیادت دے خلاف فوری، مؤثر، ٹھوس تے قابلِ تصدیق اقدامات یقینی ٻݨاوے۔ مزید برآں، افغان عبوری حکومت کوں ݙو ٹوک انداز اچ مطلع کیتا گیا جو پاکستان آپݨے فوجیاں، شہریاں تے علاقائی سالمیت دے تحفظ کوں یقینی ٻݨاوݨ کیتے فتنہ الخوارج (ایف اے کے) نال وابستہ عناصر تے انہاں دے سہولت کاراں دے خلاف جتھاں کہیں وی او موجود ہن، کارروائی کرݨ دا حق محفوظ رکھیندے۔