چیئرمین سینیٹ دی مشیر مصباح کھر دی متحدہ عرب امارات دے سفیر نال ملاقات

اسلام آباد۔ 19 فروری (اے پی پی) چیئرمین سینیٹ پاکستان دی مشیر مصباح کھر اسلام آباد وچ متحدہ عرب امارات دے سفیر سالم محمد سالم البواب الزعابی نال ملاقات کیتی ۔ ملاقات دا مقصد پاکستان تے متحدہ عرب امارات دے درمیان پراݨے تے برادرانہ تعلقات کوں مزید مضبوط بݨاوݨاں ہئی۔ ملاقات دے دوران ݙوطرفہ تعاون کوں ودھاوݨ، سرمایہ کاری وچ ودھارے، پارلیمانی رابطے دے استحکام، تجارتی تعلقات دے ودھارے تے عوامی سطح تے رابطے ودھاوݨ سودھے اہم معاملیں تے تفصیلی ڳالھ مہاڑ کیتی ڳئی۔ مصباح کھر جیڑھی انٹر پارلیمنٹری سپیکرز کانفرنس (آئی ایس سی) دی سیکرٹری وی ہن، انھاں چیئرمین سینیٹ سید یوسف رضا گیلانی دے اڄوکے غیر ملکی دوریں تے خاص طور تے متحدہ عرب امارات وچ تھیوݨ آلی اہم ملاقاتاں توں سفیر کوں تفصیلی طور تے ݙسایا۔ انھاں پارلیمانی سفارتکاری کوں ودھاوݨ تے ݙوہیں بھرا ملکاں وچال سٹریٹجک تعاون کوں وسعت ݙیوݨ وچ انھاں رابطے دی اہمیت تے زورݙتا۔ متحدہ عرب امارات دے سفیر پاکستان وچ اڄوکے انٹر پارلیمنٹری سپیکرز کانفرنس دے کامیاب انعقاد تے مصباح کھر کوں مبارخ ݙتی تے چیئرمین سینیٹ کیتے نیک تمناواں دا اظہار کیتا۔ انھاں پارلیمانی قیادت دے درمیان مکالمے تے ادارہ جاتی رابطے ودھاوݨ کیتے پاکستان دی کوششاں دی تعریف کیتی۔