مسلم ملکاں ولوں فلسطین کیتے 12 ارب ڈالر دا اعلان خوش آئند اے، خؤاجہ محمد آصف

اسلام آباد۔ 20 فروری(اے پی پی)وزیر دفاع خواجہ محمد آصف آکھیے جو مسلم ملکاں ولوں فلسطین کیتے 12 ارب ڈالر دا اعلان خوش آئند اے۔ ہک بیان اچ انہاں آکھیے جو پاکستان کوں بین الاقوامی فورمز تے ہک نویکلی سنڄاݨ ملی اے اتے پاکستانی قیادت دی پوری دنیا اچ تعریف تھیندی پئی اے، امریکی صدر ٹرمپ 60 توں 70 واری پاکستان دی تعریف کیتی اے، بین الاقوامی تقریب اچ پاکستان دی تعریف ہک وڈی کامیابی اے۔ خواجہ آصف آکھیا جو پاک فوج اتے آرمی چیف دیاں صلاحیتاں دا اعتراف ماݨ دی ڳالھ اے اتے وزیراعظم شہباز شریف دی سیاسی بصیرت کوں وی سراہیا ڳئے۔ انہاں آکھیا جو غزہ دی ول آباد کاری اتے فلسطین کیتے اہم قدم چاتے گئن، انشاء اللہ غزہ اتے فلسطین ولا آباد تھیسن۔ وزیر دفاع آکھیا جو رمضان برکتاں آلا مہینہ اے، دعا اے جو مسلماناں دیاں مشکلاں حل تھیون، فلسطینیاں تے تھیوݨ آلے مظالم مکاوݨ کیتے پوری دنیا کوں کٹھا تھیوݨاں پوسی۔