خطے وچ بدامنی تے عدم استحکام دے ذمہ وار نریندر مودی تے نیتن یاہو ہن، مشعال ملک

اسلام آباد۔16مارچ(اے پی پی) چیئرپرسن پیس اینڈ کلچر آرگنائزیشن تے حریت رہنما یاسین ملک دی ذال مشعال حسین ملک آکھیے خطے وچ کھنڈݨ الی بدامنی تے عدم استحکام دے ذمہ وار بھارتی وزیراعظم نریندر مودی تے نیتن یاہو ہن۔ ݙوہیں رہنما خطے وچ کشیدگی ودھاوݨ تے امن دی کوششاں کوں ضیان پڄاوݨ وچ کردار ادا کریندے پئن، افغانستان بھارت تے اسرائیل دے ہتھاں وچ نہ کھیݙے۔ ساݙی لڑائی افغانستان نال کائنی بلکہ اتھاں موجود پراکسیز نال اے۔ صحافیاں نال ڳالھ کریندے انھاں آکھیا جو یاسین ملک کشمیر دی آزادی دا علم چاتے تے شہادت ساݙی منزل اے۔مشعال ملک آکھیا جو نیتن یاہو فلسطینیاں دے تے نریندر مودی کشمیریاں دے قاتل ہن۔ انھاں ݙوہیں رہنماواں کوں دورِ حاضر دے “یزید” قرار ݙیندے عالمی انسانی حقوق دی تنظیماں توں مطالبہ کیتا جو او مظلوم قوماں دا ساتھ ݙیون۔ انھاں آکھیا جو پاکستان دی قیادت خصوصاً فیلڈ مارشل سید عاصم منیر دی کوششاں پاروں غزہ دے مسئلے دا پرامن حل لبھݨ دیاں کوششاں کیتیاں ڳئن، جیں کیتے “بورڈ آف پیس” قائم کیتا ڳیا جیندے وچ بین الاقوامی اسٹیبلشمنٹ وی شامل ہئی۔ انھاں مطالبہ کیتا جو مسئلہ کشمیر کیتے وی ایجھا بورڈ بݨایا ونڄے تاں جو بھارتی جیلاں وچ قید یاسین ملک، شبیر شاہ تے آسیہ اندرابی دی رہائی ممکن تھی سڳے۔ انھاں افغان سفیر کوں وی پیغام ݙتا جو افغانستان کوں بھارت دے ہتھاں وچ نی کھیݙݨا چاہیدا تے اپݨے ملک توں بھارتی و اسرائیلی پراکسیز دا خاتمہ کرݨا چاہیدے۔