نائب وزیرِاعظم محمد اسحاق ڈار اقوامِ متحدہ دی جنرل اسمبلی دے اجلاس اچ شرکت کیتے نیویارک روانہ

اسلام آباد۔20 ستمبر (اے پی پی) نائب وزیرِاعظم تے وزیرِ خارجہ سینیٹر محمد اسحاق ڈار اسلام آباد توں نیویارک کیتے روانہ تھی ڳئن جتھاں او وزیرِاعظم محمد شہباز شریف دے رلے 21 توں 25 ستمبر تئیں اقوامِ متحدہ دی جنرل اسمبلی دے 81ویں اجلاس اچ شرکت کریسن۔ اتوار کوں ترجمان دفترِ خارجہ موجب نائب وزیرِاعظم دورے دے دوران جموں و کشمیر تے او آئی سی رابطہ گروپ دے اجلاس اچ شرکت کریسن جیں دوران او کشمیریاں دے حقِ خود ارادیت کیتے پاکستان دی غیر متزلزل حمایت کوں اجاگر کریسن۔ او جنرل اسمبلی دے اجلاس دے موقع تے او آئی سی دے کئی وزارتی اجلاساں اچ وی شرکت کریسن جنہاں اچ او آئی سی دے وزرائے خارجہ دے سالانہ رابطہ اجلاس دے نال نال ٻئے او آئی سی رابطہ گروپس دے اجلاس وی شامل ہن۔ فلسطینی کاز کیتے پاکستان دی بھرپور حمایت دی عکاسی دے طور تے وزیرِ خارجہ مسئلہ فلسطین تے کئی اعلیٰ سطح دے اجلاساں اچ شرکت کریسن جنہاں اچ 8 عرب اسلامی ملکاں دے گروپ دے اجلاس دے نال ݙو ریاستی حل دے نفاذ کیتے عالمی اتحاد دے اعلیٰ سطح دے وزارتی اجلاس وی شامل ہن۔ نائب وزیرِ اعظم و وزیرِ خارجہ اقوامِ متحدہ دی سلامتی کونسل دی مصنوعی ذہانت دے معاملے تے اعلیٰ سطح دی بریفنگ دے دوران وبائی امراض روکݨ ، تیاری تے ردِعمل متعلق اعلیٰ سطح دے اجلاس اچ شرکت دے علاوہ خطاب وی کریسن۔ او ای سی او کونسل آف منسٹرز دے اجلاس دی صدارت وی کریسن۔ نائب وزیرِاعظم و وزیرِ خارجہ کئی ملکاں دے اپݨے ہم منصباں دے نال ݙو طرفہ ملاقاتاں کریسن۔ اپݨی وسیع مصروفیات دے دوران او علاقائی تے بین الاقوامی امن و استحکام کیتے پاکستان دیاں جاری کوششاں تے روشنی سٹیسن تے اہم علاقائی تے بین الاقوامی چیلنجز تے ڳالھ کریسن