نائب وزیرِاعظم اسحاق ڈار دی زیرِ صدارت ایندھن سبسڈی متعلق قومی اسٹیئرنگ کمیٹی دا اجلاس، وزیرِاعظم دی خصوصی ریلیف سکیم دے نفاذ دا جائزہ

اسلام آباد۔19 ستمبر (اے پی پی) نائب وزیرِاعظم/وزیرِ خارجہ سینیٹر محمد اسحاق ڈار دی زیرِ صدارت ایندھن سبسڈی متعلق قومی اسٹیئرنگ کمیٹی دا اجلاس منعقد تھیا جیندے اچ وزیرِاعظم دی خصوصی ریلیف سکیم دے نفاذ دا جائزہ ڳھدا ڳیا۔ نائب وزیرِ اعظم دے دفتر توں جاری بیان موجب کمیٹی کوں ݙسایا ڳیا جو ملک اچ ایندھن اسٹیشناں دی باری اکثریت نظام تے فعال اے جݙاں جو ملک اچ 9771 تے ایس ایم ایس دے ذریعے رجسٹریشن دا عمل جاری اے تے شہری فیول ٹوکن حاصل کریندے پئن۔ کمیٹی انٹرنیٹ کنیکٹیویٹی توں محروم علاقیں اچ واقع پٹرول پمپاں کیتے ایس ایم ایس دے ذریعے ایندھن دے ٹوکن دی ریڈیمپشن دی منظوری ݙتی۔ آزاد جموں و کشمیر، گلگت بلتستان تے صوبے ایہوجیھے اسٹیشناں دیاں فہرستاں ݙیسن تاں جو انہاں کوں بلا تاخیر اسکیم اچ شامل کیتا ونڄ سڳے۔ اسٹیٹ بینک آف پاکستان کمیٹی کوں ݙسایا جو گزریل ترائے ݙینھاں اچ ملݨ آلی ساری پیمنٹ کلیمز مکمل طور تے حل کر ݙتے ڳئن تے ہر ݙینھ ملݨ آلے کلیمز ایں ݙینھ نبیڑئے ویندے پئن۔ نائب وزیرِاعظم/وزیرِ خارجہ ہدایت کیتی جو ہر او پٹرول پمپ جہڑا کھلا تے فعال اے، ایں کوں نظام اچ شامل کیتا ونڄے تے ڄہڑے اسٹیشن مستقل طور تے بند یا صرف ڈیزل دی فروخت نال وابستہ پاتے ونڄن، انہاں دی نشاندہی کرتے فہرست توں کڈھیا ونڄے تاں جو اسکیم دی کوریج زمینی صورتِ حال دی عکاسی کرے۔ نائب وزیرِاعظم/وزیرِ خارجہ صوبائی انتظامیہ دیاں کوششاں دی تعریف کیتی تے اسٹیٹ بینک آف پاکستان دے تعاون دا اعتراف کیتا تے آکھیا جو امداد بغیر کہیں رکاوٹ دے مطلوبہ مستفیدین تئیں پڄدی رہݨی چاہیدی اے۔ اجلاس اچ وزرائے پٹرولیم، اقتصادی امور، اطلاعات و نشریات تے آئی ٹی و ٹیلی کمیونیکیشن؛ ڈپٹی گورنر، اسٹیٹ بینک آف پاکستان، چیئرمین اوگرا، چیئرمین پاکستان ڈیجیٹل اتھارٹی، سیکرٹری پٹرولیم، چیف کمشنر آئی سی ٹی، پنجاب تے خیبر پختونخوا دے ایڈیشنل چیف سیکرٹریز تے آزاد جموں و کشمیر، گلگت بلتستان، بلوچستان تے متعلقہ وفاقی و صوبائی محکمیں دے سینئر افسراں شرکت کیتی۔